அன்னை தெரசா

--
நேற்றைய இந்தியர்களைக் கேட்டால் சொல்வார்கள்,
அமெரிக்க ஜனாதிபதிகளில் அழியாத புகழைப் பெற்ற
ஜான் எஃப் கென்னடி பற்றி. நேருவும் அவரும் அன்பின்
அரியணையை ஆண்ட சமகாலத்தவர்கள். போர்
விமானங்களைப் புறக்கணித்து, அமைதியின் ஆகாயத்தில்
சமாதானப் புறாக்களைப் பறக்க விட்டனர். அது அறுபதுகளின்
அர்த்த சாஸ்திரம்!
-
காந்தி, நேரு ஃபோட்டோக்களுக்குப் பிறகு கென்னடியின்
புகைப்படங்கள் இந்தியாவின் குக்கிராமங்களின் தேநீர்க்
கடைகளிலும் வீடுகளிலும்கூட சகஜமாகக் காணப்பட்டது.
அந்த அளவுக்கு அவர் அரை இந்தியர்.
-
அத்தகைய உயர்ந்த மனிதர் ஜான் எஃப் கென்னடி தெரசாவைத் தேடி
நேரில் வந்து விட்டார். பெரு வியாதிக்காரர்களின் புண்ணுக்கு மருந்திடும்
புனிதமான பணியில் தெரசா மும்முரமாக இருந்தார்.
-
மரியாதை நிமித்தமாக கை குலுக்க வேண்டித் தன் நேசக் கரங்களை
தெரசாவை நோக்கி நீட்டினார் கென்னடி.
-
சீழும் ரத்தமும் சிந்திக் கிடக்கும் கறை படிந்த கைகளை எப்படி உலகத்தின்
ஒரே நாயகனிடம் நீட்டுவது... தெரசா தயங்கினார்.
-
"தயவுசெய்து மன்னியுங்கள். என்னுடைய கைகளை இன்னமும் நான்
கழுவவில்லை''.
-
"அம்மா... தொண்டுகளால் அசுத்தமாகிக் கிடக்கும் உங்களின் புனிதக்
கைகளைத் தொடுவதை நான் வாழ்நாளில் கிடைத்த பாக்யமாக நினைக்கிறேன்''
என்றார் அமெரிக்க அதிபர்.
-
தெரசாவின் சேவைக்குக் கிடைத்த நிரந்தர நற்சான்றிதழ் அது!
-
அயல்நாடுகள் கொடுத்த அங்கீகாரத்தைக் காட்டிலும் இந்தியா
கொடுக்கும் அங்கீகாரம்தான் தெரசாவை அகமகிழச் செய்தது.
அந்த வகையில் தெரசாவின் 14 ஆண்டுக்கால சேவைகளைப் பாராட்டும்
வகையில் 1962-ஆம் ஆண்டு இந்திய அரசு கொடுத்த முதல் பூங்கொத்து
பத்மஸ்ரீ விருது. தேசிய அளவில் பாரதம் வழங்கும் இரண்டாவது சிறந்த பரிசு.
-
அதிலும் ஒரு சிறப்பு அவருக்கு. அந்நிய மண்ணில் பிறந்த ஒருவர் பத்மஸ்ரீ
பெறுவது அதுவே முதல் முறை.
-
26 ஜனவரி 1962. டெல்லி. இந்தியாவின் குடியரசுத் திருநாள். நறுமணம் கமழும்
வாசனைத் திரவியங்கள் நாசிகளைத் துளைத்தன. மிக உயர்ந்த புதிய
ஆடைகளை, விழாவுக்காகப் பிரத்யேகமாக அனைத்து விஐபிகளும் அணிந்து
வந்திருந்தார்கள். அத்தகைய உயர்ந்த கனவான்களுக்கு மத்தியில் ஒரு
துப்புரவுத் தொழிலாளியின் கோலத்தில் தெரசா மேடைக்குச் சென்றார்.
-
ஒட்டுமொத்த சபையும் ஒரு விநாடி நிசப்தமாகிப் போனது.
அந்த மகராசிக்காக நெஞ்சம் உருகியது. தெரசாவின் எளிமையைப் பார்த்து
பிரதமர் நேருவிடம் அவரது சகோதரி விஜயலட்சுமி பண்டிட் கண்கள் கலங்கினார்.
நேருவும் நெஞ்சம் நெகிழ்ந்தார்.

அன்றைய ஜனாதிபதி ராஜேந்திர பிரசாத் தெரசாவுக்கான பத்மஸ்ரீ பதக்கத்தை
வழங்கினார். தெரசாவுக்குக் கிடைத்த அரசு மரியாதைக்காக நேரு தனிப்பட்ட
முறையில் தன் வாழ்த்துகளைக் கூறினார்.

அதே ஆண்டில் தெரசாவுக்கு மகசேசே உயர் விருதை பிலிப்பைன்ஸ் நாடு
அளித்தது. அந்தப் பரிசின் மதிப்பு 50,000 ரூபாய். அதை அப்படியே ஆக்ரா சிறுவர்
இல்லத்துக்காகக் கொடுத்துவிட்டார் தெரசா.

1964. மும்பையில் கிறிஸ்தவ மதத்தினரின் மாநாடு. குடியரசுத் தலைவர்
டாக்டர் எஸ்.ராதாகிருஷ்ணன் தலைமை. ஆறாவது போப் ஆண்டவர் இரண்டாம்
ஜான்பால் வருகை தந்திருந்தார். தெரசாவுடனான சந்திப்பில் விளைந்தது ஆத்ம
சந்தோஷம்.

அவரது சேவைகளில் அகமகிழ்ந்து தனது வெண்மை வழியும் "லிங்கன்
கான்டினெண்டல்' காரைப் பரிசாக வழங்கினார் இரண்டாம் ஜான்பால்.
தெரசாவின் நற்பணிகள் விரைவாக நடக்கட்டும் என்ற நல்லெண்ணத்தின்
வெளிப்பாடு அது.

இந்தியா வருவதற்கு முன்பு, போப் அமெரிக்காவுக்குச் சென்றிருந்தார். அப்போது
அவருக்கு அமெரிக்க அதிபர் லிண்டன் பி.ஜான்சன் அன்பளிப்பாகக் கொடுத்த கார்
அது. போப் இந்தியாவில் சுற்றுப்பயணம் செய்ய உதவியது. அதைத்தான் தெரசாவுக்கு
வழங்கியிருந்தார் போப்.

இனி தெரசாவை வீதிகளில் காண முடியாது. சொகுசாகப் ப்ளஷர் காரில் அவர்
பவனி வருவார் என எல்லோரும் எதிர்பார்த்தனர். ஆனால் ஆறே மணி நேரத்தில்
அனைவரையும் திகைக்கச் செய்தார் தெரசா. தனக்கான போப் ஆண்டவரின்
அன்பளிப்பான அந்தக் காரை மிகப்பெரிய தொகை கூறி உடனடியாக ஏலம் விட்டார்!
அதில் கிடைத்த வருமானத்தில் புதிய தொழுநோய் மருத்துவமனை உருவானது.

நடமாடும் தொழுநோய் சிகிச்சை முகாம்கள் மூலம் நான்கு மில்லியன்களுக்கும்
மேற்பட்டவர்கள் குணமடைந்தனர்.
-
-------------------------------------
-
பா.தீனதயாளன் எழுதிய "அன்னை தெரசா' என்ற நூலிலிருந்து
தொகுப்பு: கேசி
நன்றி- தினமணி