வேண்டாம் நியூட்ரினோ ஆய்வு மையம் !

விஞ்ஞானிகள் என்று தங்களைச் சொல்லிக் கொள்பவர்களே, இயற்கையோடு இணைந்து எந்த ஆய்வையும் மேற்கொள்ளுங்கள்.நாங்கள் சம்மதிக்கிறோம். இயற்கையை சிதைத்து செய்யப்படும் எந்த ஆராய்ச்சியும் உங்களுக்கு வெற்றியைத் தராது. ஏற்கனவே கல்பாக்கம் அணுமின்நிலையத்தால் பாதிப்புகள் இருப்பது தெரிந்தும், பெரிய அளவிளான எதிர்ப்பு இருந்தும் கூடங்குளம் அணுமின்நிலையம் உருவாக்கப்பட்டு செயல்பட்டு வருகிறது. ஆளும் அரசுகள் மக்களின் உணர்வுகளுக்கும் , போராட்டத்திற்கும் மதிப்பளிக்கவில்லை.

இந்த சூழ்நிலையில் அடுத்த அதிர்ச்சியாக மற்ற இடங்களில் அமைய இருந்து துரத்தியடிக்கப்பட்ட திட்டமான ' நியூட்ரினோ ஆய்வு மையம் ' தேனி மாவட்டத்தில் பொட்டிபுரம் மலைப்பகுதியில் அமைய இருக்கிறது. மக்களின் எதிர்ப்புகளை கண்டுகொள்ளாமல் தொடர்ந்து ஆய்வகப்பணி நடந்து வருகிறது. மற்ற நாடுகளில் இருப்பதால் நாங்களும் நியூட்ரினோ ஆய்வு மையம் அமைக்கிறோம் என்று சொல்கிறார்கள். சரிங்க. நீங்கள் சொல்லும் மற்ற நாடுகள் , பாதுகாப்பான குடிநீர் , தரமான மருத்துவ வசதி , தரமான படைப்பூக்க கல்வி , தரமான சாலை வசதி போன்ற அடிப்படைத் தேவைகளை எல்லோருக்கும் உறுதி செய்த பிறகே மற்ற விசயங்களில் கவனம் செலுத்துகின்றன. இந்தியாவின் நிலைமை அப்படியா ? இன்னும் எல்லோருக்குமான குடிநீர் வசதி , கழிப்பிட வசதியே உறுதி செய்யப்படாத நிலையில் 1500 கோடி செலவில் இயற்கையை சிதைக்கும் நியூட்ரினோ ஆய்வு மையம் தேவையா ?
ஒரு லட்சம் கோடியில் புல்லட் ரயிலும் தேவையா ? முதலில் அடிப்படைத்தேவைகளை நிறைவு செய்யுங்கள் .சிறிய முதலீட்டில் இயற்கையை பாதிக்காத ஆராய்ச்சிகளுக்கு முன்னுரிமை கொடுங்கள். அப்படியே இந்திய நியூட்ரினோ ஆய்வு விஞ்ஞானிகள் மீது நம்பிக்கை இருந்தால் அவர்களை அரசு செலவில் கூட ஏற்கனவே வேறு நாட்டில் அமைக்கப்பட்டிருக்கும் ஆய்வகத்திற்கு அனுப்பி வைய்யுங்கள் .அதைவிட்டுவிட்டு புதிதாக ஆய்வுமையம் அமைப்பது தேவையில்லாதது.

முதலில் சீனாவிலிருந்து இறக்குமதியாகும் பொருட்களை இந்தியாவில் தயாரிக்க முயற்சி செய்யுங்கள். ஒரு நகவெட்டியைக் கூட பல தசாப்தங்களாக இறக்குமதி செய்து கொண்டுதானிருக்கிறோம். ஒரு வருடத்தில் பல இலட்சம் இன்ஜினியர்கள் கல்லூரிகளிலிருந்து படிப்பை முடித்து வெளியே வருகிறார்கள். இன்ஜினியரிங் துறை சார்ந்த பொருட்களின் இறக்குமதி குறையவில்லை. 1990 கு பிறகு பெரிய பொதுத்துறை நிறுவனம் எதுவும் உருவாக்கப்படவில்லை . எல்லாம் தனியாரிடத்தில். மக்களுக்கு வழங்கும் மானியங்களை குறைக்கும் அதே நேரத்தில் வருமானம் தரக்கூடிய பொதுத்துறை நிறுவனங்களை உருவாக்க முன்வர வேண்டும். அதைவிட்டுவிட்டு நியூட்ரினோ ஆய்விலும் , புல்லட் ரயிலிலும் கவனம் செலுத்துவது தேவையில்லாதது.

நியூட்ரினோ ஆய்வு மையம் அமைய இருப்பதில் இருக்கும் பெரிய அளவிலான வணிக ஆதாயங்கள் தான் மக்களின் மனங்களை திசை திருப்பும் ஆதரவு கூட்டங்களை கூட்டுகிறது. அணுசக்தி கழகத்திற்கு அணுக்கழிவைக் கொட்ட இடம் கிடைக்கிறது. ஆய்வு மையத்தை அமைக்கப்போகும் பன்னாட்டு வணிக நிறுவனத்திற்கு பெரிய லாபம் கிடைக்கப் போகிறது. இங்கு பணியாற்றப் போகும் விஞ்ஞானிகளுக்கு பெரிய சம்பளம் கிடைக்கப் போகிறது. இப்படி இருக்கையில் இயற்கையாவது , மக்கள்நலனாவது என்று தான் நினைக்கிறார்கள். ஆதாயத்திற்காக எதையும் செய்யத் தயராக இருக்கிறார்கள். மிகத்தீவிரமான ஒட்டுமொத்த மக்கள் போராட்டதால் மட்டுமே இத்திட்டத்தை தடுத்து நிறுத்த முடியும்.

வேண்டாம் நியூட்ரினோ ஆய்வு மையம் !
வேண்டாம் புல்லட் ரயில் !