புதுக்கோட்டை உப்பிற்கு தடை விதித்து

பாயிடம் இருந்து ஏதாவது தகவல் திரட்ட வேண்டும் என்ற முடிவில், 'பல வருஷங்களா திருச்சியில் இருப்பதாகச் சொல்றீங்களே... புதுக்கோட்டை சமஸ்தானத்தைச் சேர்ந்தவர்களில் யாரையாவது தெரியுமா? சமஸ்தானம் பற்றி சுவையான செய்தி ஏதாவது தெரிந்திருந்தால் கூறுங்களேன்...' என்றேன்.

'தெரியும்ப்பா... பேலசுல டிரைவரா இருந்த ஒருத்தர் என் பிரெண்டு தான்... பல விஷயங்களைச் சொல்லி இருக்காரு...' என்றவர், சற்று நிறுத்தி, சிக்கன் லெக் பீஸ் சைசில் இருந்த நன்னீர் இறா, 'ப்ரை'யைப் பதம் பார்த்தார்; பின்னர் தொடர்ந்தார்...

'திருச்சி மாவட்டத்துல ஒரு காலத்துல உப்பளம் இருந்ததுன்னு சொன்னா நம்புவாயா... ஆனா, இது உண்மை; கடல் இல்லாமலே உப்பு கிடைச்சதாம்.

'திருச்சி மாவட்ட தென்பகுதி தாலுகாக்களான திருமயம், ஆலங்குடி, கீரனூர் (குளத்தூர்) தாலுகாக்களை கொண்ட பகுதிகளுக்கு, 'புதுக்கோட்டை சமஸ்தானம்'ன்னு பெயர். 1948ம் ஆண்டுக்கு முன் இந்த சமஸ்தானம் தனி ராஜ்யமாக இருந்தது. கள்ளர் இனத்தைச் சேர்ந்த தொண்டமான் குலத் தமிழ் மன்னர்கள் இந்த சமஸ்தானத்தை ஆண்டு வந்தாங்க...

'இங்கு, பொட்டல் நிலங்கள் அதிகம்; வெயில் காலத்துல அந்தப் பொட்டல் நிலங்கள்ல உப்பு வெளிப்படும். உப்பு மண்ணை மேலாகச் சுரண்டி எடுத்து, பானையில் கொட்டி, தண்ணி ஊத்திக் கரைப்பாங்க... மண் கரைஞ்சு தண்ணி தெளிஞ்சதும், அந்தத் தண்ணிய இறுத்து, மண்பானையில் ஊத்தி அடுப்பிலேத்தி தீயிட்டுக் காய்ச்சுவாங்க; தண்ணி சுண்டியதும் உப்பு வரும்.

'இப்படிக் காய்ச்சி எடுத்த உப்பை பொட்டல் நிலத்தில் அம்பாரமாக கொட்டி, அதிகாரிங்க மேற்பார்வையில விற்பனை செய்வாங்க. வெளி மாவட்ட வியாபாரிங்க போட்டியிட்டு இந்த உப்பை வாங்குவாங்களாம்... இதுக்கு, 'காய்ச்சிய உப்பு'ன்னு பேரு...

'இந்த உப்பு வெள்ளையாவும், அதிக கரிப்புடன், மிருதுவாகவும் இருக்குமாம்... கடலுப்பை விட மக்கள் இந்த உப்பை அதிகமாக விரும்பினாங்களாம்.

'காய்ச்சிய உப்புக்கு மதிப்பு உயர உயர கடலுப்பு விற்பனை பாதிக்கப்பட்டு, உப்பு வரி மூலம் வெள்ளையராட்சிக்குக் கிடைச்ச வருமானம் குறைய ஆரம்பிச்சதாம். எனவே, புதுக்கோட்டை உப்பிற்கு தடை விதித்து, தடுத்ததாம் வெள்ளையர் ஆட்சி.

'தடையும், தடுப்பும் பயன்பட வில்லையாம். இறுதியில் புதுக்கோட்டை ராஜாவோட பேரம் பேசி, உப்பளம் நடத்துவதால் கிடைக்கும் லாபத்தை அவருக்கு கொடுத்து விடுவதாக வாக்களித்து, 'காய்ச்சு' உப்பளங்களை மூடும்படி செய்துட்டார்களாம்... இது நடந்தது நூறு ஆண்டுகளுக்கு முன்பாம்...' என, அதிசயச் செய்தி ஒன்றைக் கூறினார்.

- அந்துமணி பா.கே.ப. Dinamalar

நிஜமாகவே இது அதிசய செய்தி தான்.....பகிர்வுக்கு மிக்க நன்றி மணி !
.
.
.
மணி, செய்தியை படிவிடும்போது, இப்போது மேலே உள்ளது போல கொஞ்சம் இடைவெளி விட்டு பதிவு செய்யுங்கள், படிக்க எளிதாக இருக்கும்...இப்போது நான் செய்துவிட்டேன்

அன்புடன்,
கிருஷ்ணாம்மா