4 மொழிகளுக்கு செம்மொழி அந்தஸ்து: ஆதாரங்களை தாக்கல் செய்ய உத்தரவு

தெலுங்கு, மலையாளம், ஒடியா, கன்னடம் ஆகிய மொழிகளுக்கு
செம்மொழி அந்தஸ்து எப்படி வழங்கப்பட்டது என்பதற்கான
ஆதாரத்தை ஆவணங்களுடன் மத்திய அரசு அதிகாரிகள் நேரில்
ஆஜராக வேண்டும் என்று சென்னை உயர் நீதிமன்றம் உத்தரவிட்டுள்ளது.

இதுதொடர்பாக மூத்த வழக்குரைஞர் ஆர்.காந்தி தாக்கல் செய்த பொது
நல மனுவில் கூறியிருப்பதாவது: 2 ஆயிரம் ஆண்டுகளுக்கு பழைமை
வாய்ந்த, இலக்கண, இலக்கிய நூல்கள் இருக்கும் மொழிகளுக்கு மட்டுமே
செம்மொழி அந்தஸ்து வழங்கப்படும்.

இதனால், கிரேக்கம், லத்தீன், ஹீப்ரூ, தமிழ், சம்ஸ்கிருதம், சீனம் ஆகிய
மொழிகளுக்கு இந்த அந்தஸ்து வழங்கப்பட்டுள்ளது.

இந்த நிலையில், மலையாளம், ஒடியா, கன்னடம், தெலுங்கு ஆகியவற்றுக்கு
செம்மொழி அந்தஸ்தை மத்திய அரசு வழங்கியுள்ளது.

எந்த ஒரு தகுதியும் இல்லாத 4 மொழிகளுக்கு செம்மொழி அந்தஸ்து வழங்கி
மத்திய அரசு பிறப்பித்த உத்தரவை ரத்து செய்யவேண்டும் என கூறியிருந்தார்.

இந்த வழக்கு தலைமை நீதிபதி எஸ்.கே.கௌல், நீதிபதி ஆர்.மகாதேவன்
ஆகியோர் முன்பு விசாரணைக்கு வந்தது.

அப்போது, ஆர்.காந்தி ஆஜராகி, "தொல்காப்பியம், திருக்குறள்,
சிலப்பதிகாரம் போன்ற தமிழ் இலக்கியங்கள் 2 ஆயிரம் ஆண்டுகளுக்கு
பழைமையானவை. இதுபோன்றவை கன்னடம், தெலுங்கு, மலையாளம்,
ஒடியா மொழிகளில் இருந்தால், மத்திய அரசு தாக்கல் செய்யலாம்.

தமிழில் அனைத்துச் சொற்களும் உள்ளதால், பிற மொழி சொல் இல்லாமல்
தமிழை சிறப்பாகப் பயன்படுத்தலாம்.

சம்ஸ்கிருத வார்த்தைகள் இல்லாமல், தெலுங்கு, மலையாளம் உள்ளிட்ட
மொழிகளே இல்லை. ஆகவே, செம்மொழி அந்தஸ்து வழங்கியது தவறு
என்பதால், ரத்து செய்யவேண்டும் என்று வாதிட்டார்.

இதையடுத்து, மத்திய அரசு சார்பில் ஆஜரான கூடுதல் சொலிசிட்டர்
ஜெனரல் ராஜகோபாலன், "பிற மொழிகள் கலந்து விட்டால், அதற்கு
செம்மொழி அந்தஸ்து கொடுக்க முடியாது என்று மனுதாரர் கூறுகிறார்.

விவசாயம் என்ற சம்ஸ்கிருத வார்த்தை, தமிழில் பிரதானமாகப் பயன்
படுத்தப்படுகிறது என்றார்.

அப்போது நீதிபதி ஆர்.மகாதேவன், "விவசாயம் என்பது சம்ஸ்கிருத
சொல்தான். ஆனால், "உழவு' என்ற தமிழ் சொல் உள்ளது என்றார்.

இரு தரப்பு வாதங்களையும் கேட்டறிந்த நீதிபதிகள், 4 மொழிகளுக்கு
எந்த அடிப்படையில் செம்மொழி அந்தஸ்து வழங்கப்பட்டது என்பதற்கான
ஆதாரம், ஆவணங்களுடன் மத்திய அரசு சார்பில் தகுந்த உயர் அதிகாரிகள்
ஜூலை 13-இல் நேரில் ஆஜராகவேண்டும் என்று உத்தரவிட்டனர்.
-
---------------------------------
தினமணி