நம் தமிழை முறையாக அறிவோமே !

by **M.Jagadeesan** Fri Jun 17, 2016 8:53 am

First topic message reminder :

காற்பந்தா? கால் பந்தா? எது சரி ?

நாள் + கள் = நாள்கள்
கால் + கள் = கால்கள்
கோள் + கள் = கோள்கள்
வேல் + கள் = வேல்கள்
தாள் + கள் = தாள்கள்

இவ்விதியின் படி கால் + பந்து = கால்பந்து என்றே எழுதப் பெறல் வேண்டும். இவ்வாறு எழுதுவதும் பேசுவதும் ஏற்புடையதுதானா என்பதே நம் ஆய்வு.

இதற்கு நடைமுறையிலுள்ள பல எடுத்துக்காட்டுகளைக் காண்பது நன்று.

மேல் + கணக்கு
கால் + கடுக்க
பால் + பசு
நாள் + கோள்
பால் + பழம்
கால் + சட்டை
மேல் + படிப்பு
கால் + புள்ளி
நூல் + பா
மேல் + கொண்டு
பால் + குடம்

இவற்றுள் திரிவனவும் திரியாதனவும் உள. எல்லா இடங்களிலும் லகர ளகர வீறு வரும் மொழி க ச ப முன் திரியா என்பது தவறு. எங்குத் திரியும் எங்குத் திரியாது என்பதை இக்கால் பார்ப்போம். .

இவ்வகையில் இரண்டாம் வேற்றுமை உருபு தொகையிலும் வினைத் தொகையிலும் லகர ளகர வீறு திரியாது. ஏனையவற்றுள் திரியும்.

எடுத்துக் காட்டு:

கொல் + களிறு = கொல்களிறு (கொல்லும், கொல்கின்ற, கொன்ற என்பவற்றின் தொகையே கொல்) இது வினைத் தொகையாகும்.

நாள் + கோள் = நாள்கோள் நாளும்கோளும் என்பதே உம்மைத் தொகையாக நாள்கோள் என ஆகியிருக்கின்றது.

பால் + பழம் என்பதும் பால்பழம் என்றே புணரும். இதுவும் உம்மைத் தொகையாகும். இதன் விரி பாலும் பழமும். பாற்பழம் என்று எழுதினால் பால் போன்ற பழம் எனப் பொருள்பட்டு உவமைத்தொகையாகி விடும் .

பால் + குடித்தான் என்பது பால் குடித்தான் என்றே புணர வேண்டும். இது இரண்டாம் வேற்றுமை உருபுத் தொகையாகும். பாலைக் குடித்தான் என்பது இதன் விரி.

கால் + சட்டை = காலில் அணியப் படும் சட்டை எனும் உருபும் பயனும் உடன் தொக்கத் தொகையாகும். இல் எனும் வேற்றுமை உருபும் அணியப்படும் எனும் பயனும் தொக்கி வருவதால் லகர வீறு திரிந்து காற்சட்டை என்றாகும்.

பால் + பசு - பாலைத்தரும் பசு பாற்பசு என்றாகும்.

மேல் + படிப்பு - மேற்படிப்பு

மேல் + கொண்டு - மேற்கொண்டு

மேல் + சென்று - மேற்சென்று

கால் + புள்ளி = காற்புள்ளி என்றாகும்.

நூல் + பா = நூற்பா என்றாகும். இது உருபும் பயனும் உடன்தொக்கத் தொகையாகும்.

பாலைக் கொண்டிருக்கும் குடம் பாற்குடமாகும். இதுவும் உருபும் பயனும் உடன் தொக்கத் தொகையே. பால் குடம் என்று எழுதினால் பாலும் குடமும் எனப் பொருளாகிவிடும்.

இந்நிலையில் , கால் + பந்து எனும் மொழிப் புணர்ச்சியில் லகர வீறு திரியுமா? திரியாதா? இங்கு வரும் கால் உறுப்பைக் குறித்ததா? பகுதியைக் குறித்ததா? இந்தப் பந்திற்கு ஏன் இப்பெயர் இடப்பெற்றது. கையால் தட்டப்படும் பந்து கைப்பந்தாகும். வலையில் போடப்படும் பந்து வலைப் பந்தாகும். மேசையில் ஆடப்படும் பந்து மேசைப் பந்தாகும். பூப் போன்றிருக்கும் பந்து பூப்பந்தாகும். அது போல காலால் உதைக்கப் படும் பந்தே கால் + பந்து . இது உருபும் பயனும் உடன்தொக்கத் தொகையாதலால் நிலை மொழியில் லகரவீறு திரிதலே சரி.

காற்பந்தை கால் பந்து என்று எழுதினால் வேல் கம்பு , நாள் கோள், பால் பழம் போல் உம்மைத் தொகையாகி காலும் பந்தும் என்று பொருள்பட்டு விடும்.

எனவே காற்பந்து என்பதே இலக்கண விதிப் படி சரியானதாகும்.

உதவி : இணையம் . நம் தமிழை முறையாக அறிவோமே

by **M.Jagadeesan** Sat Jun 18, 2016 7:54 am

தேநீரகம் , தேனீரகம் - இவற்றில் எது சரி ?

டீக் கடையைக் குறிக்கும் விளம்பரப் பலகையில் சிலர் " தேநீரகம் " என்றும் சிலர் " தேனீரகம் " என்றும் எழுதுகிறார்கள் . இவற்றில் எது சரி ?

தேநீர் + அகம் = தேநீரகம்

எனவே தேநீரகம் என்று எழுதுவதே சரி .

தேனீரகம் என்றால் , " தேனீக்களின் வகை " என்று பொருள்படும் .

by **T.N.Balasubramanian** Sat Jun 18, 2016 8:02 am

தமிழ் இலக்கண நற்குறிப்புகளின் பங்களிப்பு , தொடருங்கள் M Jagadeesan . நன்றி

ரமணியன்

by **M.Jagadeesan** Sat Jun 18, 2016 8:54 am

கால்வாய் , வாய்க்கால் - எது சரி ?

இரண்டுமே சரி .

இலக்கணம் இல்லாததாயினும் இலக்கணம் உடையதைப் போல சான்றோர்களால் தொன்று தொட்டு வழங்கப்படுவது இலக்கணப் போலி எனப்படும். சான்று:

இல்முன் → முன்றில்

கால்வாய் → வாய்க்கால்

கோவில் → கோயில்

நகர்ப்புறம் → புறநகர்

தசை → சதை

கொம்பு நுனி → நுனிக் கொம்பு

நிலைமொழிகள் முன் பின்னாக மாறிவருதல் போலி. இவ்வாறு பயின்று வருதல் பிழை இல்லை என்று கருதப்படுகிறது.

இலக்கணப் போலி ,முதற்போலி , இடைப் போலி , கடைப்போலி என மூவகைப்படும் .

1.முதற்போலி - மஞ்சு -மைஞ்சு

2. இடைப் போலி - அரசன் - அரைசன்

3.கடைப்போலி - அறம் -அறன்

by **M.Jagadeesan** Sat Jun 18, 2016 10:31 am

ராமன் , இராமன் - எது சரி ?

றகரமும் ரகரமும் சொல்லின் முதல் எழுத்தாக வாரா.

என்பது விதி .

எனவே இராமன் என்பதே சரி

ரங்கன் என்று எழுதாமல் அரங்கன் என்றே எழுதவேண்டும் .

ரவி என்று எழுதாமல் இரவி என்றே எழுதவேண்டும் .

ரோமம் என்று எழுதாமல் உரோமம் என்றே எழுதவேண்டும் .

by **T.N.Balasubramanian** Sat Jun 18, 2016 11:54 am

M.Jagadeesan wrote:ராமன் , இராமன் - எது சரி ?

றகரமும் ரகரமும் சொல்லின் முதல் எழுத்தாக வாரா.

என்பது விதி .

எனவே இராமன் என்பதே சரி

ரங்கன் என்று எழுதாமல் அரங்கன் என்றே எழுதவேண்டும் .

ரவி என்று எழுதாமல் இரவி என்றே எழுதவேண்டும் .

ரோமம் என்று எழுதாமல் உரோமம் என்றே எழுதவேண்டும் .

மேற்கோள் செய்த பதிவு: 1211528
ஆர்வத்தை தூண்டுகின்றன , M Jagadeesan ,நன்றி

ரகசியம் வேண்டாம் --
இரகசியமாகவே இருக்கட்டும் . சரிதானே !

ரமணியன்

by **M.Jagadeesan** Sat Jun 18, 2016 12:37 pm

சொல்லக்கூடாதது எது ?

பெண்ணிடம் இரகசியம் !

by யினியவன் Sat Jun 18, 2016 12:49 pm

இரகசியம் சொல்லலாம்
இரகசியம் என்று சொல்லி
சொல்லுதல் கூடாது புன்னகை

by **M.Jagadeesan** Sat Jun 18, 2016 1:35 pm

அடையார் , அடையாறு - எது சரி ?

அடையாறு என்பது ஓர் ஆற்றின் பெயர் .

" அடையார் " என்றால் " சேரமாட்டார்கள் " என்று பொருள் .

சென்னையில் அந்த ஆறு ஓடுவதால் அடையாறு என்பதே சரி .

by **M.Jagadeesan** Sat Jun 18, 2016 3:43 pm

செல்வர் , செல்வந்தர் - எது சரி ?

செல்வரைக் குறிக்கும் வடசொல் தன்வந்த என்பது.

அதை தனவந்தர் என்று கூறுவதில் இருந்து மருவி வந்தது செல்வந்தர்.

எனவே செல்வர் என்பதே சரி .

by **M.Jagadeesan** Sun Jun 19, 2016 8:18 am

தக்க வைத்துக் கொண்டார் , தங்க வைத்துக் கொண்டார் - எது சரி ?

ஜெயலலிதா ஆட்சியைத் தங்க ( Retain ) வைத்துக் கொண்டார் என்பதே சரி .

தக்க என்ற சொல்லுக்கு " சரியான " என்பதே பொருளாகும்.

விருந்தினரைத் தக்க முறையில் உபசரித்தார் .

ஆசிரியர் கேட்ட கேள்விக்கு மாணவன் தக்க முறையில் பதிலளித்தான் .

எனவே " தக்க " என்ற சொல்லுக்கு " Retain " என்ற பொருள் இல்லை என்பதைக் கவனிக்கவேண்டும் .