நம் தமிழை முறையாக அறிவோமே !

by **M.Jagadeesan** Fri Jun 17, 2016 8:53 am

First topic message reminder :

காற்பந்தா? கால் பந்தா? எது சரி ?

நாள் + கள் = நாள்கள்
கால் + கள் = கால்கள்
கோள் + கள் = கோள்கள்
வேல் + கள் = வேல்கள்
தாள் + கள் = தாள்கள்

இவ்விதியின் படி கால் + பந்து = கால்பந்து என்றே எழுதப் பெறல் வேண்டும். இவ்வாறு எழுதுவதும் பேசுவதும் ஏற்புடையதுதானா என்பதே நம் ஆய்வு.

இதற்கு நடைமுறையிலுள்ள பல எடுத்துக்காட்டுகளைக் காண்பது நன்று.

மேல் + கணக்கு
கால் + கடுக்க
பால் + பசு
நாள் + கோள்
பால் + பழம்
கால் + சட்டை
மேல் + படிப்பு
கால் + புள்ளி
நூல் + பா
மேல் + கொண்டு
பால் + குடம்

இவற்றுள் திரிவனவும் திரியாதனவும் உள. எல்லா இடங்களிலும் லகர ளகர வீறு வரும் மொழி க ச ப முன் திரியா என்பது தவறு. எங்குத் திரியும் எங்குத் திரியாது என்பதை இக்கால் பார்ப்போம். .

இவ்வகையில் இரண்டாம் வேற்றுமை உருபு தொகையிலும் வினைத் தொகையிலும் லகர ளகர வீறு திரியாது. ஏனையவற்றுள் திரியும்.

எடுத்துக் காட்டு:

கொல் + களிறு = கொல்களிறு (கொல்லும், கொல்கின்ற, கொன்ற என்பவற்றின் தொகையே கொல்) இது வினைத் தொகையாகும்.

நாள் + கோள் = நாள்கோள் நாளும்கோளும் என்பதே உம்மைத் தொகையாக நாள்கோள் என ஆகியிருக்கின்றது.

பால் + பழம் என்பதும் பால்பழம் என்றே புணரும். இதுவும் உம்மைத் தொகையாகும். இதன் விரி பாலும் பழமும். பாற்பழம் என்று எழுதினால் பால் போன்ற பழம் எனப் பொருள்பட்டு உவமைத்தொகையாகி விடும் .

பால் + குடித்தான் என்பது பால் குடித்தான் என்றே புணர வேண்டும். இது இரண்டாம் வேற்றுமை உருபுத் தொகையாகும். பாலைக் குடித்தான் என்பது இதன் விரி.

கால் + சட்டை = காலில் அணியப் படும் சட்டை எனும் உருபும் பயனும் உடன் தொக்கத் தொகையாகும். இல் எனும் வேற்றுமை உருபும் அணியப்படும் எனும் பயனும் தொக்கி வருவதால் லகர வீறு திரிந்து காற்சட்டை என்றாகும்.

பால் + பசு - பாலைத்தரும் பசு பாற்பசு என்றாகும்.

மேல் + படிப்பு - மேற்படிப்பு

மேல் + கொண்டு - மேற்கொண்டு

மேல் + சென்று - மேற்சென்று

கால் + புள்ளி = காற்புள்ளி என்றாகும்.

நூல் + பா = நூற்பா என்றாகும். இது உருபும் பயனும் உடன்தொக்கத் தொகையாகும்.

பாலைக் கொண்டிருக்கும் குடம் பாற்குடமாகும். இதுவும் உருபும் பயனும் உடன் தொக்கத் தொகையே. பால் குடம் என்று எழுதினால் பாலும் குடமும் எனப் பொருளாகிவிடும்.

இந்நிலையில் , கால் + பந்து எனும் மொழிப் புணர்ச்சியில் லகர வீறு திரியுமா? திரியாதா? இங்கு வரும் கால் உறுப்பைக் குறித்ததா? பகுதியைக் குறித்ததா? இந்தப் பந்திற்கு ஏன் இப்பெயர் இடப்பெற்றது. கையால் தட்டப்படும் பந்து கைப்பந்தாகும். வலையில் போடப்படும் பந்து வலைப் பந்தாகும். மேசையில் ஆடப்படும் பந்து மேசைப் பந்தாகும். பூப் போன்றிருக்கும் பந்து பூப்பந்தாகும். அது போல காலால் உதைக்கப் படும் பந்தே கால் + பந்து . இது உருபும் பயனும் உடன்தொக்கத் தொகையாதலால் நிலை மொழியில் லகரவீறு திரிதலே சரி.

காற்பந்தை கால் பந்து என்று எழுதினால் வேல் கம்பு , நாள் கோள், பால் பழம் போல் உம்மைத் தொகையாகி காலும் பந்தும் என்று பொருள்பட்டு விடும்.

எனவே காற்பந்து என்பதே இலக்கண விதிப் படி சரியானதாகும்.

உதவி : இணையம் . நம் தமிழை முறையாக அறிவோமே

by **M.Jagadeesan** Wed Jun 22, 2016 6:32 am

ஒவ்வொரு ஞாயிறு தோறும் விடுமுறை , ஞாயிறு தோறும் விடுமுறை - எது சரி ?

ஒவ்வொரு என்ற சொல் வந்தபின்பு "தோறும் " என்ற சொல் வரத் தேவையில்லை .

ஞாயிறு தோறும் விடுமுறை அல்லது ஒவ்வொரு ஞாயிறும் விடுமுறை என்று சொல்லலாம் .

by **T.N.Balasubramanian** Wed Jun 22, 2016 6:42 am

தினந்தோறும் முக்கியமான, பயனுள்ள விளக்கங்கள் தருகின்றீர் .நன்றி

ரமணியன்

by **T.N.Balasubramanian** Wed Jun 22, 2016 7:11 am

வல்லுநர் ---- ஆண்பால் எனக் கருதி ,
வல்லுனி என பெண்பாலாக கருத முடியுமா ,ஜெகதீசன் ?

ரமணியன்

by **M.Jagadeesan** Wed Jun 22, 2016 7:21 am

Doctor , Teacher , Lawyer , Engineer போன்ற சொற்கள் இருபாலருக்கும் பொதுவானவை . எனவே
வல்லுநர் என்ற சொல்லும் இருபாலருக்கும் பொதுவானதுதான் .

by **T.N.Balasubramanian** Wed Jun 22, 2016 7:36 am

M.Jagadeesan wrote:Doctor , Teacher , Lawyer , Engineer போன்ற சொற்கள் இருபாலருக்கும் பொதுவானவை . எனவே
வல்லுநர் என்ற சொல்லும் இருபாலருக்கும் பொதுவானதுதான் .

மேற்கோள் செய்த பதிவு: 1212110

நன்றி அய்யா .

ரமணியன்

by **M.Jagadeesan** Wed Jun 22, 2016 7:58 am

நாகரீகம் , நாகரிகம் - எது சரி ?

நாகரிகம் என்பதே சரி .

பெயக்கண்டும் நஞ்சுண்டு அமைவர் நயத்தக்க
நாகரிகம் வேண்டு பவர் .

என்ற குறளை நோக்குக .

by **M.Jagadeesan** Wed Jun 22, 2016 8:01 am

தொளாயிரம் , தொள்ளாயிரம் - எது சரி ?

தொள்ளாயிரம் என்பதே சரி .

தமிழ் இலக்கியத்தில் . " முத்தொள்ளாயிரம் " என்று ஒரு நூல் உள்ளது .

by **M.Jagadeesan** Wed Jun 22, 2016 8:11 am

ஒருக்கால் , ஒருகால் - எது சரி ?

ஒருகால் என்பதே சரி . பலரும் ஒருக்கால் என்று " க் " சேர்த்தே எழுதுகின்றனர். அது தவறு.

அஞ்சும் முகம் தோன்றின், ஆறுமுகம் தோன்றும்;
வெஞ் சமரில்,'அஞ்சல்' என வேல் தோன்றும்; - நெஞ்சில்
ஒரு கால் நினைக்கின், இரு காலும் தோன்றும்
'முருகா!' என்று ஓதுவார் முன்.

- திருமுருகாற்றுப்படை

by **M.Jagadeesan** Wed Jun 22, 2016 7:13 pm

ஊர்வலம் , ஊர்கோலம் - எது சரி ?

வலம் என்றால் வலப்பக்கமாகச் செல்வது . கிரிவலம் என்றால் மலையை வலப் பக்கமாகச் சுற்றுவது .
ஊர்வலம் என்றால் ஊரை வலப் பக்கமாகச் சுற்றுவது . ஆனால் ஊரை எப்படிச் சுற்றினாலும் " ஊர்வலம் " என்றுதான் சொல்கிறோம் . அப்படிச் சொல்லாமல்

ஊர் உலா , அல்லது ஊர்கோலம் என்று சொல்வதுதான் சரி .

நகர்வலம் என்று சொல்லாமல் " நகர் உலா " என்று சொல்வதுதான் சரி .

by Guest Wed Jun 22, 2016 10:49 pm

Blog-வலைப்பூ என்பது சரியா?
வலைப்பூ வாடி பல வருடங்கள் ஆகி விட்ட நிலையிலும் சிலர் இன்னமும் வலைப்பூ எனவே பயன்படுத்தி வருவதைக் காணமுடிகிறது. வலைப்பூவா வலைப்பதிவா?

முதல் தமிழ் வலைப்பதிவு (வலைபூ) கார்த்திகேயன் இராமசுவாமி என்பவரால் தை 1 2003 இல் ஆரம்பிக்கப்பட்டது. அவர் பல இடங்களில் வலைப்பதிவு என பயன்படுத்தி வந்தாலும், வலைப்பூவே அவராலும் பலராலும் பயன்படுத்தப்பட்டு வந்தது.

பின்னர் மொழிச்சிக்கல் வரவே வலைப்பதிவு என்பதை ஏற்றுக் கொள்ள ஆரம்பித்தார்கள்.
weblog – வலைப்பதிவு ; blogger – வலைப்பதிவர் ; blogging – வலைப்பதிதல் ஆனால் …..
weblog – வலைப்பூ ;blogger – வலைப்பூக்காரர் ;blogging – வலைப்பூத்தல்

இந்த மொழிச்சிக்கலை தொடர்ந்து உலக தமிழ் இணைய மாநாட்டிலும் வலைப்பதிவு ஏற்றுக் கொள்ளப்பட்டது. எனவே வலைப்பதிவு என்பதே சரியான வார்த்தையாகும்.