ரூ.670 கோடி மதிப்பிலான பழங்காலச் சிலைகளை இந்தியாவிடம் திரும்ப ஒப்படைத்தது அமெரிக்கா

-
சுமார் 100 மில்லியன் அமெரிக்க டாலர்கள் (இந்திய மதிப்பில்
ரூ.670 கோடி) மதிப்புள்ள இச்சிலைகளில் விநாயகர் சிலை,
மாணிக்கவாசகர் சிலை உள்ளிட்டவை அடங்கும்.
-
இதையொட்டி, அமெரிக்கத் தலைநகர் வாஷிங்டனில் உள்ள
அந்நாட்டு அதிபரின் விருந்தினர் மாளிகையில் (பிளேர் ஹவுஸ்)
செவ்வாய்க்கிழமை நிகழ்ச்சி ஒன்றுக்கு ஏற்பாடு செய்யப்
பட்டிருந்தது. அதில் பிரதமர் நரேந்திர மோடி ஹிந்தி மொழியில்
பேசியதாவது:
-
உலக நாடுகளுக்கு இடையேயான நட்புறவில் நிகழ்கால அம்சங்கள்
முக்கிய பங்குவகிக்கும் என்பதுதான் பொதுவான நடைமுறையாகும்.
ஆனால் சில சமயம் இரு நாடுகளுக்கு இடையேயான நல்லுறவில்
அவற்றின் கலாசாரம் மற்றும் பாரம்பரியம் முக்கியப் பங்காற்றும்.
-
இந்தியாவின் தொன்மைவாய்ந்த பாரம்பரியம் மற்றும் கலாசாரத்தை
இன்றளவும் பறைசாற்றுவதில் பழங்காலச் சிலைகளுக்கு முக்கிய
இடம் உண்டு. அமெரிக்காவுக்கு கடத்தப்பட்ட சிலைகளை இந்தியாவிடம்
திருப்பி அளிக்க உரிய நடவடிக்கை எடுத்ததற்காக அமெரிக்க அதிபர்
ஒபாமாவுக்கு எனது மனமார்ந்த நன்றியை தெரிவித்துக் கொள்கிறேன்.
-
இந்தச் சிலைகள் பல கோடி ரூபாய் மதிப்புடையவையாக இருக்கலாம்.
ஆனால், இந்திய மக்கள் இவற்றைத் தங்களது பெருமைமிக்க கலாசாரம்
மற்றும் பாரம்பரியத்தின் ஒரு பகுதியாகவும், தங்களின் வரலாற்றை
பிரதிபலிக்கும் பொக்கிஷங்களாகவும்தான் பார்க்கின்றனர் என்று
மோடி பெருமிதம் தெரிவித்தார்.
-
அமெரிக்காவுக்கான இந்தியத் தூதர் அருண் கே.சிங் கூறியபோது,
"அமெரிக்கா திரும்ப ஒப்படைத்துள்ள சிலைகளில், சென்னையில் உள்ள
ஒரு சிவன் கோயிலிருந்து திருடப்பட்ட 1.5 மில்லியன் அமெரிக்க டாலர்கள்
(இந்திய மதிப்பில் ரூ.10 கோடி) மதிப்புள்ள மாணிக்கவாசகர் சிலை,
1,000 ஆண்டுகளுக்கு முந்தைய விநாயகர் சிலை உள்ளிட்ட 12 சிலைகள்
இந்தியாவுக்கு அனுப்பப்பட்டுவிட்டன.
மீதியுள்ள சிலைகளும் விரைவில் இந்தியா அனுப்பப்படும்' என்றார்.
-
------------------------------------------
தினமணி