முகம் தெரியாத ஒரு சகோதரிக்காக ...

**ayyasamy ram** · **ayyasamy ram** Wed Jun 08, 2016 6:20 pm

-
காதலர் தினம்தான் இளைய தலைமுறையின் கொண்டாட்ட
தினமாகக் கருதப்படுகிறது. இந்த சமூகத்தைப் பற்றி பெரிதாக
அவர்களுக்கு அக்கறை இல்லை என்கிற நினைப்பு பலருக்கும்
இருக்கிறது.
-
அதை மாற்றியிருக்கிறார்கள் இந்தப் பெண்கள்! ‘‘காதலர்
தினத்தை மறக்க முடியாத நாளா மாத்தணும்னா, முடிதானம்
பண்ணுங்க...’’ என்கிற கோரிக்கையோடு முடிதான
இயக்கத்தைத் தொடங்கியிருக்கிறார்கள் சென்னை பெண்கள்
கிறிஸ்தவக் கல்லூரி ரோட்ராக்ட் கிளப் மாணவிகள்.
-
முடிதானம் எதற்கு..?
-
‘‘பிப்ரவரி 14 பத்தி எல்லாருக்கும் தெரியும். பிப்ரவரி 4 பத்தி
எத்தனை பேருக்குத் தெரியும்? உலக புற்றுநோய் தினம்.
அவநம்பிக்கைன்னு நாட்களைக் கடத்துற புற்றுநோயாளிகளுக்கு
உடம்புலயும், மனசுலயும் ஏகப்பட்ட பிரச்னைகள். கீமோதெரபி
டிரீட்மென்ட்டால தலைமுடி எல்லாம் கொட்டிடும்.
நோயால ஏற்படுற வலியை விட, தலைமுடி இழப்பு பெண்களுக்கு
பெரிய வலியை ஏற்படுத்தும்.
-

**ayyasamy ram** · **ayyasamy ram** Wed Jun 08, 2016 6:24 pm

முகம் தெரியாத ஒரு சகோதரிக்காக ... AB5rHMpCTqWFqwfWdeNP+9a

-

தலைமுடி தான் பெண்களோட தன்னம்பிக்கை. தலைமுடி
கொட்டிடுச்சேங்கிற வருத்தத்துல பெண்கள் மேலும் முடங்கிப்
போறாங்க. அந்த மாதிரி பெண்களுக்கு ‘விக்’ செய்றதுக்காகத்தான்
முடிதான இயக்கம்...’’ - படபடவெனப் பேசுகிற ரேனி, ரோட்ராக்ட்
கிளப்பின் தலைவி.
-
ஃபைனல் இயர் லிட்ரேச்சர் ஸ்டூடன்ட். மற்றவர்களுக்கு
முன்னுதாரணமாக, மொட்டையடித்து மொத்த தலைமுடியையும்
தானமாக வழங்கியிருக்கிறார் ரேனி.
-
‘‘ஒவ்வொரு வருஷமும் ரோட்ராக்ட் கிளப்புக்கு பிரசிடென்ட்டா
வர்றவங்க ஏதாவது ஒரு புது திட்டத்தை எடுத்துச் செய்வாங்க.
இந்த வருஷம் நான் பிரசிடென்ட்டா வந்தபிறகு, என்ன செய்யலாம்னு
யோசிச்சேன். யு.எஸ்ல ஒரு என்.ஜி.ஓ., பெண்கள்கிட்ட தலைமுடியை
தானமா வாங்கி கேன்சர் நோயாளிகளுக்கு விக் செஞ்சு கொடுக்கிறதா
இன்டர்நெட்ல படிச்சேன்.
-
முன்னெல்லாம் ஊருல ஒருத்தருக்கு கேன்சர் இருந்தாலே பெரிய
விஷயம். இப்போ எங்கே பார்த்தாலும் புற்றுநோயாளிகளின் கண்ணீர்க்
கதைகளைக் கேட்க நேருது. அதனால தலைமுடி தானத்தையே
ப்ராஜெக்ட்டா பண்ணலாம்னு முடிவு செஞ்சோம்.
-
அடையாறு கேன்சர் இன்ஸ்டிடியூட்டைச் சேர்ந்த சைக்கோ ஆங்காலஜிஸ்ட்
சுரேந்திரன் சாரைப் போய் பார்த்தோம். ‘மாசத்துக்கு குறைஞ்சது
100 பேருக்கு விக் தேவைப்படுது. செயற்கையா தயாரிக்கப்படுற சிந்தெடிக்
முடியை வச்சு செய்யப்படுற விக்தான் மார்க்கெட்ல கிடைக்குது.
-
அது பலருக்கு பக்க விளைவுகளை உருவாக்க வாய்ப்பிருக்கு. இயற்கை
முடியால விக் செஞ்சு நோயாளிகளுக்குக் கொடுக்கணும்ங்கிறது எங்க
கனவுத் திட்டம். தாராளமாச் செய்ங்க’ன்னு எங்களை உற்சாகப்படுத்தினார்.
அடுத்து ‘கிரீன் டிரெண்ட்ஸ்’ நிறுவனத்தை அணுகினோம். அவங்க
இணைஞ்சு செயல்பட முன்வந்தாங்க...’’ என்கிறார் ரேனி.
-

**ayyasamy ram** · **ayyasamy ram** Wed Jun 08, 2016 6:24 pm

‘‘மனிதத் தலைமுடியால செய்யப்படுற விக், ஒரிஜினல் முடியைப் போலவே
இருக்கும். இதை வச்சிக்கறவங்களுக்கு இயல்பான தன்னம்பிக்கை எப்பவும்
குறையாது. ஆனா, இதை செயல்படுத்துறதில பல சிக்கல்கள் இருக்கு.

பெண்களுக்கு தலைமுடி மேல அதீத பிரியம் உண்டு. அதை கட் பண்ணித் தர
அவ்வளவு எளிதா ஒத்துக்க மாட்டாங்க... ஆனா இதைப் பத்தி டிஸ்கஸ்
பண்ணிக்கிட்டிருக்கும்போதே, எங்க நிறுவனத்துல இருக்கிற பெண்கள் சிலரே,
‘நாங்களும் முடிதானம் தர்றோம்’னு முன்வந்தாங்க. எங்களுக்கே
பிரமிப்பாகிடுச்சு.
-
முடி தானம்னா, மொத்தமா மொட்டையடிக்கிறது இல்லை
கைக்குள்ள அடங்குற சின்ன கற்றை. வெறும் 8 இஞ்ச் நீளம் போதும்.
சுமார் 6000 இழைகள். இதுக்காக தமிழ்நாடு முழுதும் எங்க கிளைகள்ல
வேலை செய்யிற 600 கலைஞர்களை அழைச்சு பயிற்சி கொடுத்திருக்கோம்.
ஹேர்ஸ்டைலோ, முகவெட்டோ பாதிக்காத மாதிரி, தலைமுடியின் உள்
பாகத்துல இருந்து ஒரு ‘பஞ்ச்’ எடுப்பாங்க.
தானம் கொடுக்கிற பெண்களுக்கு இலவசமாவே முடி திருத்தமும் செய்து
விடுவாங்க.
-
வேண்டுதல் வச்சு கோயிலுக்கு முடி இறக்குறது நம் மரபு.
அதைப்போல இதுவும் ஒரு இறைப்பணிதான். நோயால தவிக்கிற ஒரு
பெண்ணுக்குச் செய்யிற பெரிய உதவி. தோற்றத்துக்கு எந்தப் பாதிப்பும் வராது’’
என்கிறார் ‘கிரீன் டிரெண்ட்ஸ்’ நிறுவனத்தின் தலைமை நிர்வாகி
கோபாலகிருஷ்ணன்.
-
‘‘மத்தவங்ககிட்ட தலைமுடியைக் கேட்கிறதுக்கு முன்னாடி நாமளே இந்த
திட்டத்துக்கு ரோல் மாடலா இருக்கணும்னு நினைச்சோம். அம்மாகிட்ட
போய், ‘நான் மொட்டை அடிச்சுக்கிறேம்மா’ன்னு சொன்னேன். சந்தோஷமா
ஒத்துக்கிட்டாங்க. என் தங்கை, ‘நானும் முடிதானம் கொடுக்கிறேன்’னு
சொல்லியிருக்கா... நிறைய பேர் முன்வர்றாங்க. மற்ற கல்லூரிகள்லயும் கலெக்ட்
பண்றோம்.
-
இதுல பப்ளிக்கோட பங்கும் இருக்கணும்ங்கிறதுக்காக அவேர்னெஸ்
ப்ரோகிராமும் நடத்தறோம்.
-
முதற்கட்டமா 1000 பேர்கிட்ட முடிதானம் வாங்கப்போறோம்.
அதன் மூலம் 200 விக் தயாரிக்க முடியும். விக் தயாரிக்கிற செலவுக்காக ஒரு
கல்ச்சுரல் புரோகிராம் நடத்தி நிதி கலெக்ட் பண்ணியிருக்கோம்...’’
என்கிற ரம்யா, ரோட்ராக்ட் கிளப் செயலாளர். முகம் தெரியாத ஒரு
சகோதரிக்காக ஒற்றைக் கொத்து முடியைத் தானமாகக் கொடுங்கள்.
உங்கள் தானத்தை அர்த்தமுள்ளதாக மாற்றுங்கள்.
-
--------------------------------------------

வெ.நீலகண்டன்
படங்கள்: ஆர்.சந்திரசேகர்
குங்குமம்

**krishnaamma** · **krishnaamma** Wed Jun 08, 2016 11:47 pm

முகம் தெரியாத ஒரு சகோதரிக்காக ஒற்றைக் கொத்து முடியைத் தானமாகக் கொடுங்கள்.
உங்கள் தானத்தை அர்த்தமுள்ளதாக மாற்றுங்கள்.

நல்ல உயர்வான சிந்தனை!.............. மகிழ்ச்சி