* மாரத்தான் ஓட்டத்தில் பயங்கரம் * சென்னை தீவுத் திடலில் அதிர்ச்சி சம்பவம்

**ayyasamy ram** · **ayyasamy ram** Mon Jun 06, 2016 2:22 am

சென்னை :
மாரத்தான் போட்டியில் பங்கேற்க வந்த பெண்கள் தீவுத்
திடலில் உள்ள தற்காலிக மரப்பாலத்தின் மீது அதிகளவில்
நின்றபடி இருந்தனர்.

மிகவும் மோசமான நிலையில் இருந்த அந்த பாலம் பெண்களின்
எடை தாளாமல் நொறுங்கி கீழே ஓடிக் கொண்டிருந்த கூவத்தில்
விழுந்தது.

அப்போது பாலத்தின் மேல் நின்ற பெண்கள் அலறியபடி ஒருவரை
தொடர்ந்து ஒருவர் கூவம் ஆற்றில் விழுந்தனர். இச்சம்பவம்
சென்னையில் நேற்று பரபரப்பை ஏற்படுத்தியது.

பெண்களுக்கு ஏற்படும் மார்பக புற்றுநோய் குறித்த விழிப்புணர்வு
மாரத்தான் ஓட்டம் சென்னையில் நேற்று காலை நடத்த முடிவு
செய்யப்பட்டது. அதன்படி, தனியார் அமைப்பினர், மெரினாவில்
பந்தயத்திற்கு ஏற்பாடு செய்தனர்.

போட்டியில் கலந்து கொள்வதற்காக நேற்று அதிகாலை
3 ஆயிரத்துக்கும் மேற்பட்ட பெண்கள் தீவுத்திடல் பகுதிக்கு வந்தனர்.
அவர்கள் தீவுத் திடலில் தங்கள் கார்களை நிறுத்திவிட்டு போர்
நினைவுச் சின்னத்துக்கு செல்வதற்காக கூவம் ஆற்றின் மேல் உள்ள
தற்காலிக மரத்தினால் ஆன பாலத்தை கடந்து சென்றனர்.

குறிப்பிட்ட அந்த தற்காலிக மரப்பாலம் மோசமான நிலையில்
இருந்ததால், அதை பயன்படுத்த பொதுமக்களுக்கு தடைவிதிக்கப்பட்டு
இருந்தது.

இந்நிலையில் நூற்றுக்கணக்கானவர்கள் ஒரே நேரத்தில் பாலத்தை
கடந்தனர். மேலும் சிலர் பாலத்தின் மீது நின்றபடி இருந்தனர்.
அப்போது பாலத்தின் மீது நின்றவர்களின் எடை தாங்காமல் பாலம்
இரண்டாக பிளந்து கூவம் ஆற்றில் விழுந்தது.

கண்ணிமைக்கும் நேரத்துக்குள் இந்த சம்பவம் நடந்ததால் இதை
எதிர்பார்க்காத நூற்றுக்கணக்கான பெண்கள் கூவம் ஆற்றில் விழுந்து
மூழ்கினர். அவர்களில் சிலர் விழுந்த பாலத்தின் மரப்பிடிகளை
பிடித்தபடி நின்றனர். கூவம் ஆற்றில் தண்ணீர் குறைவாகவும் சேறு
அதிகமாகவும் இருந்ததால் பெரிய அளவில் விபத்து எதுவும் ஏற்படவில்லை.

இந்த சம்பவத்தில் 15க்கும் மேற்பட்ட பெண்களுக்கு சிராய்ப்பு காயம்
ஏற்பட்டது. பலரது செல்போன்கள், மணி பர்ஸ் மற்றும் அவர்கள்
கொண்டு வந்த உடமைகளும் கூவத்தில் விழுந்தது.

மேலும், சேற்றில் சிக்கியதால் பலர் எழுந்திருக்க முடியாமல் மூழ்கும்
சூழல் ஏற்பட்டது. இதையடுத்து கூவத்தில் விழுந்தவர்கள் தங்களை
காப்பாற்றுங்கள்... காப்பாற்றுங்கள்... என்று கூச்சலிட்டனர். அங்கிருந்த
ஆண்களும் பெண்களும் சிலரை மீட்டனர்.

இந்த தகவல் குறித்து கேள்விப்பட்டு சம்பவ இடத்துக்கு உடனே வந்த
கோட்டை போலீசார், தீயணைப்பு வீரர்கள் வந்து கூவத்தில் விழுந்தவர்களை
மீட்டனர். இது குறித்து கோட்டை போலீசார் விசாரிக்கின்றனர்.

இந்த சம்பவம் சென்னையில் நேற்று காலை பெரும் பரபரப்பை ஏற்படுத்தியது.
இதுகுறித்து போலீசார் கூறுகையில், ‘’மரப்பாலம் மிகவும் பழமையானது.
இதில், செல்ல தடை விதிக்கப்பட்டு இருந்தது. மாரத்தான் போட்டியில் கூட்டம்
அதிகமாக இருந்ததால் தடை செய்யப்பட்ட பாலத்தை வீரர்கள் பயன்படுத்தி
இருப்பார்கள் என்று நினைக்கிறோம். இதுகுறித்து விசாரணை முடுக்கி
விடப்பட்டுள்ளது’’ என்றனர்.
-
-----------------------------------
தினத்தந்தி