'வருமானத்திற்கு மீறி சொத்து சேர்ப்பது குற்றமல்ல..!' - ஜெ. வழக்கில் உச்ச நீதிமன்றம் பரபரப்பு கருத்து!

ஜெயலலிதா மீதான சொத்துக்குவிப்பு வழக்கில், கர்நாடக அரசின் சிறப்பு வழக்கறிஞர் பி.வி.ஆச்சார்யாவின் வாதத்திற்குப் பின்னர் கருத்து தெரிவித்த நீதிபதிகள், வருமானத்திற்கு மீறிய வகையில் சொத்து சேர்ப்பது குற்றமல்ல என்றும், பணம் வரும் வழி தவறாக இருந்தால் மட்டுமே அது குற்றம் என்றும் கூறியிருப்பது பரபரப்பை ஏற்படுத்தியுள்ளது.

சொத்துக்குவிப்பு வழக்கில், முதல்வர் ஜெயலலிதா உள்ளிட்ட 4 பேர் விடுதலைக்கு எதிரான மேல்முறையீட்டு மனுக்கள் மீது, உச்ச நீதிமன்ற நீதிபதிகள் பினாகி சந்திரகோஷ், அமிதவராய் ஆகியோர் அடங்கிய அமர்வில் இன்று இறுதி வாதம் தொடங்கியது.

முதலில் கர்நாடக அரசு சிறப்பு வழக்கறிஞர் பி.வி.ஆச்சார்யா தனது வாதத்தை முன்வைத்தார். அப்போது, வழக்கின் முக்கிய அம்சங்களை சுருக்கமாக விவரித்து ஆச்சார்யா வாதிட்டார். அவரது வாதத்திற்குப் பின்னர் கருத்து தெரிவித்த நீதிபதிகள், "வருமானத்திற்கு மீறிய வகையில் சொத்து சேர்ப்பது எப்படி குற்றமாகும். அது குற்றமல்ல. வருகிற வருமானம் சட்டத்திற்குப் புறம்பான வகையில் இருந்தால்தான் அது குற்றம். மேலும் இந்த சொத்துக்களை வாங்க பயன்படுத்தப்பட்ட பணம் ஜெயலலிதாவுடையது என்று நிரூபிக்க முடியுமா... அதற்கு என்ன ஆதாரம் உள்ளது?" என்று கேட்டனர்.

ஆச்சார்யா வாதிடுகையில், வருமான வரியைக் கட்டி விட்டதாக கூறி ஜெயலலிதா தப்ப முயற்சிப்பதாகவும், வருமான வரியைக் கட்டுவதால் வருமானத்திற்கு மீறி சொத்து சேர்த்ததை நியாயப்படுத்த முடியாது என்றும், இதுகுறித்து வருமான வரித்துறை தனது தரப்பு வாதத்தை எடுத்து வைக்கும் என்றும் கூறினார்.

இதன்பிறகு வாதத்தில் சில சந்தேகங்களை நீதிபதிகள் எழுப்பினர். குறிப்பாக, "ஜெயலலிதாவுக்கு லாபம் சம்பாதிக்கும் நோக்கத்தில் சசிகலா பினாமி நிறுவனங்களை நடத்தியதாக கூறியுள்ளீர்கள். ஆனால் அந்த பணம் ஜெயலலிதாவுக்கு உரியது என்பதற்கு ஆதாரம் என்ன? ஜெயலலிதா வருவாய்க்கு அதிகமாக சொத்து சேர்த்ததாகவும், உயர் நீதிமன்றம் தனது தீர்ப்பில் கணித தவறு காரணமாக அதை தவறவிட்டுவிட்டதாகவும் வாதிட்டீர்கள். வருவாய்க்கு அதிகமாக சொத்து சேர்த்துள்ளதாக கூறும் நீங்கள், அது சட்ட விரோதமான வகைகளில் சேர்க்கப்பட்ட பணமா என்பதற்கு ஆதாரத்தை சமர்ப்பிக்க முடியுமா? " என்று நீதிபதிகள் கேள்வி எழுப்பினர்.

கடைசியாக வாதிட்ட ஆச்சார்யா, " எனது வழக்கறிஞர் தொழிலில் இது மறக்க முடியாத தருணம். நான் இந்த வழக்கின் அனைத்து அம்சங்களையும் விளக்கிக் கூறி விட்டேன். இந்த வழக்கைப் பொறுத்தவரை விசாரணை நீதிமன்றம் அளித்த தீர்ப்பு (ஜெயலலிதா உள்ளிட்டோருக்கு தலா 4 ஆண்டு சிறை, ரூ.100 கோடி அபராதம்) செல்லும் என்று உச்ச நீதிமன்றம் அறிவிக்க வேண்டும் என்பதே எனது கடைசி கோரிக்கை. இந்த வாதத்திற்கு அனுமதி அளித்த பெஞ்சுக்கு நன்றி" என்று கூறி தனது வாதத்தை நிறைவு செய்தார்.

அதைத் தொடர்ந்து ஜெயலலிதா, சசிகலா, இளவரசி, சுதாகரன் தரப்பு வழக்கறிஞர்கள் என அனைத்து தரப்பு வாதங்களும் நிறைவடைந்தன. இந்த வழக்கில் சுப்பிரமணியன் சுவாமி தனது தரப்பு வாதத்தை எழுத்துப்பூர்வமாக தாக்கல் செய்தார்.

இதையடுத்து, நிறுவனங்களின் வழக்கு விசாரணையை ஜூன் 7 ம் தேதிக்கு ஒத்திவைத்தது உச்ச நீதிமன்றம். அன்றைய தினம் நிறுவனங்கள் விடுவிக்கப்பட்டதை எதிர்த்த வழக்கில், கர்நாடக அரசு தரப்பு தனது வாதத்தை முன்வைக்க உள்ளது.

வி.கே.ரமேஷ்
விகடன்

உண்மை இருக்கிறது. குறுக்கு வழியில் கொள்ளை அடித்து சம்பாதிக்க கூடாது நேர்மையான வழியில் உழைப்பின் மூல்ம் சம்பாதிக்கலாம் வரி கட்டினால் சரி. ஊழல் இன்றி சம்பாதிக்கலாம் . வரி செலுத்திடலாம் தட்ஸ் ஆல் ரைட்..

எதற்கு இந்த சப்பைக்கட்டு ?

பேசாமல் " ஜெயலலிதா விடுதலை செய்யப்பட்டார் ! " என்று கூறிவிடுங்கள் . அதற்குத்தானே இவ்வளவு பீடிகை ?

புதிதாக எதுவும் இல்லை. எதிர் பார்த்ததுனே.. 11.00 மணிக்குள் வாழ்த்துக்கள் சொன்னவங்களாச்சே..தீர்ப்பும் அப்படியே தான் இருக்கும்.. நல்லா இருக்கு நீதி துறை.. முடிந்தது அனைத்தும்..

நம்மளும் எப்டி இதுமாதிரி சம்பாரிக்கலாம் ன்னு கணம் கோர்ட்டார் அவர்கள் விளக்கினா நல்லது - இந்த பிச்சகாசு இனாம் தரத வாங்கிட்டு ஒட்டு போடாம இருக்கலாம்

krishnaamma wrote:

ஜெயலலிதா மீதான சொத்துக்குவிப்பு வழக்கில், கர்நாடக அரசின் சிறப்பு வழக்கறிஞர் பி.வி.ஆச்சார்யாவின் வாதத்திற்குப் பின்னர் கருத்து தெரிவித்த நீதிபதிகள், வருமானத்திற்கு மீறிய வகையில் சொத்து சேர்ப்பது குற்றமல்ல என்றும், பணம் வரும் வழி தவறாக இருந்தால் மட்டுமே அது குற்றம் என்றும் கூறியிருப்பது பரபரப்பை ஏற்படுத்தியுள்ளது.

மேற்கோள் செய்த பதிவு: 1209570

ஒரு பைத்தியக்காரனின் உளறலைவிட இது மோசமானது .

இனி....

கொலை செய்வது குற்றமல்ல ; ஆனால் ரத்தம் வராமல் செய்யவேண்டும் .

கற்பழிப்பது குற்றமல்ல; ஆனால் கர்ப்பம் ஆகாமல் இருக்கவேண்டும் .

தேர்விலே காப்பி அடிப்பது குற்றமல்ல ; ஆனால் காப்பி அடிப்பதற்கு உதவிய பிட் பேப்பரை , விடைத்தாளுடன் இணைக்கக்கூடாது .

என்பது போன்ற தீர்ப்புகளையும் உச்சநீதிமன்ற மேதாவிகள் சொல்லும் காலம் விரைவில் வரும் .

இதற்கெல்லாம் வள்ளுவர் முன்னோடியாகப் போய்விட்டார் .

" பொய் சொல்லலாம் தவறில்லை ; ஆனால்  அந்தப் பொய்யினால் நன்மை விளையவேண்டும் . " என்பது வள்ளுவர் வாக்கு .

பொய்மையும் வாய்மை இடத்த புரைதீர்ந்த
நன்மை பயக்கும் எனின் .

வள்ளுவரின் தீர்ப்பிலே அறத்தின் சாயலையும் , உச்சநீதிமன்ற தீர்ப்பிலே பாவத்தின் சாயலையும் பாருங்கள் !

P.S.T.Rajan wrote:உண்மை  இருக்கிறது. குறுக்கு வழியில்  கொள்ளை அடித்து சம்பாதிக்க கூடாது நேர்மையான வழியில் உழைப்பின் மூல்ம்  சம்பாதிக்கலாம் வரி கட்டினால்  சரி. ஊழல் இன்றி  சம்பாதிக்கலாம் . வரி செலுத்திடலாம்  தட்ஸ் ஆல் ரைட்..

aanaal idhu romba aabaththachche rajan annaa

M.Jagadeesan wrote:எதற்கு இந்த சப்பைக்கட்டு ?

பேசாமல் " ஜெயலலிதா விடுதலை செய்யப்பட்டார் ! " என்று கூறிவிடுங்கள் . அதற்குத்தானே இவ்வளவு பீடிகை ?

சசி wrote:புதிதாக எதுவும் இல்லை. எதிர் பார்த்ததுனே.. 11.00 மணிக்குள் வாழ்த்துக்கள் சொன்னவங்களாச்சே..தீர்ப்பும் அப்படியே தான் இருக்கும்.. நல்லா இருக்கு நீதி துறை.. முடிந்தது அனைத்தும்..

ம்ம்... நிஜம் சசி, மக்களுக்கு நீதித்துறை மீது இருந்தது தான் கடைசி நம்பிக்கை, இப்போ அதுவும் போய்விட்டது