‘எங்களால் 5 நிமிடத்தில் டெல்லியை தாக்க முடியும்’ பாகிஸ்தான் அணு விஞ்ஞானி ஆணவ பேச்சு

-
இஸ்லாமாபாத்,

5 நிமிடத்தில் டெல்லியை தாக்கும் வல்லமை, பாகிஸ்தானிடம் உள்ளது என அந்த நாட்டின் அணு விஞ்ஞானி அப்துல் காதிர் கான் ஆணவமாக கூறினார்.

பாக். அணு குண்டு சோதனை நாள்

பாகிஸ்தான் முதன்முதலாக 1998-ம் ஆண்டு, மே மாதம் 28-ந்தேதி அணுகுண்டு வெடித்து சோதித்தது. இந்த சோதனையை முன்னின்று நடத்தியவர், அந்த நாட்டின் அணுவிஞ்ஞானி டாக்டர் அப்துல் காதிர்கான் ஆவார்.அந்த அணுகுண்டு சோதனை நடத்தி 18-வது ஆண்டு நிறைவுற்றதை நினைவுகூரும் நாள் நிகழ்ச்சி இஸ்லாமாபாத்தில் நேற்று நடந்தது. இதில் அணு விஞ்ஞானி டாக்டர் அப்துல் காதிர் கான் கலந்து கொண்டு பேசினார். அப்போது அவர் கூறியதாவது:-

பாகிஸ்தான் 1984-ம் ஆண்டே அணு வல்லமையை பெற்றிருக்க முடியும். ஆனால் அப்போதைய அதிபர் ஜியா உல் ஹக் அணுகுண்டு வெடித்து சோதிக்க எதிர்ப்பு தெரிவித்தார். அணுகுண்டு வெடித்து சோதித்தால் பாகிஸ்தான் ராணுவத்துக்கு சர்வதேச அளவில் கிடைத்து வரும் நிதி உதவி நின்று விடும் என அவர் நம்பினார். அதனால்தான் அணுகுண்டு சோதனைக்கு எதிர்ப்பு தெரிவித்தார்.

5 நிமிடத்தில் தாக்க முடியும்

ராவல்பிண்டி அருகில் உள்ள காஹூதாவில் இருந்து டெல்லியை 5 நிமிடத்தில் தாக்கும் வல்லமை பாகிஸ்தானிடம் இருக்கிறது.

எனது பணிகள் இல்லாமல், பாகிஸ்தான் ஒருபோதும் உலகின் முதல் இஸ்லாமிய அணு ஆயுத நாடாக மாறி இருக்க முடியாது. மிக கடினமான ஒரு சூழ்நிலையில்தான் நாம் அணு ஆயுத நாடாக மாறினோம்.

பர்வேஸ் முஷரப் காலத்தில் அணு விஞ்ஞானிகளுக்கு உரிய மதிப்பு கொடுக்கப்படவில்லை. நாட்டின் அணு ஆயுத திட்டத்துக்காக நாங்கள் அரும்பாடு பட்டும் மோசமாக நடத்தப்படுகிறோம்.

இவ்வாறு அவர் கூறினார்.

வீட்டுக்காவலில் வைக்கப்பட்டவர்

இந்த அப்துல் காதிர் கான், 2004-ம் ஆண்டு, முஷரப் ஆட்சிக்காலத்தில் அணு ஆயுத தொழில் நுட்ப பரவலுக்கு காரணம் என குற்றம் சுமத்தப்பட்டார். வீட்டுக்காவலில் வைக்கும் நிலை உருவானது. 2009-ம் ஆண்டு இஸ்லாமாபாத் ஐகோர்ட்டு, அவர் ஒரு சுதந்திரமான மனிதர் என அறிவித்தது. அவர் நாட்டில் எங்கு வேண்டுமானாலும் செல்லலாம் என அனுமதித்தது நினைவுகூரத்தக்கது.

5 நிமிடத்தில் டெல்லியை தாக்கும் வல்லமையை பாகிஸ்தான் பெற்றிருக்கிறது என அப்துல் காதிர்கான் ஆணவமாக கூறி இருப்பது பெரும் பரபரப்பை ஏற்படுத்தி உள்ளது.
-
தினத்தந்தி

அணு விஞ்ஞானியின் பேச்சு கண்டிக்கத்தக்கது ; பதிலுக்கு இந்தியாவும் , " நாங்கள் நினைத்தால் பாகிஸ்தானையே அழித்துவிடுவோம் " என்ற பேச்சும் வன்மையாகக் கண்டிக்கத்தக்கது .

M.Jagadeesan wrote:அணு விஞ்ஞானியின் பேச்சு கண்டிக்கத்தக்கது ; பதிலுக்கு இந்தியாவும் , " நாங்கள் நினைத்தால் பாகிஸ்தானையே அழித்துவிடுவோம் " என்ற பேச்சும் வன்மையாகக் கண்டிக்கத்தக்கது .

மேற்கோள் செய்த பதிவு: 1209240

ஒ...இவங்க வேற பதில் சொல்லி இருக்காங்களா?..........ஆனால் வேற என்ன சொல்வது ஐயா?

வேலைக்காரன் நம்மைச் சீண்டினால் , பதிலுக்கு வேலைக்காரனை நாம் சீண்டக்கூடாது .

அவனுடைய முதலாளியிடம் ," உங்கள் வேலைக்காரனைக் கண்டித்து வையுங்கள் " என்று சொல்லவேண்டும் .

M.Jagadeesan wrote:வேலைக்காரன் நம்மைச் சீண்டினால் , பதிலுக்கு வேலைக்காரனை நாம் சீண்டக்கூடாது .

அவனுடைய முதலாளியிடம் ," உங்கள் வேலைக்காரனைக் கண்டித்து வையுங்கள் " என்று சொல்லவேண்டும் .

மேற்கோள் செய்த பதிவு: 1209266

நம்நாட்டிலிருந்து யார் பதில் சொல்லி இருக்கிறார்கள் என்கிற செய்தியை நான் பார்க்கலை ஐயா, நீங்கள் சொன்னதை வைத்து த்தான் சொன்னேன்..............ஆனால் அவர்கள் நாட்டில் " தடி எடுத்தவர்கள் எல்லாம் தண்டல் காரர்கள் ஆச்சே? " ..எல்லோருமே முதலாளிகள் தான் அங்கு

M.Jagadeesan wrote:அணு விஞ்ஞானியின் பேச்சு கண்டிக்கத்தக்கது ; பதிலுக்கு இந்தியாவும் , " நாங்கள் நினைத்தால் பாகிஸ்தானையே அழித்துவிடுவோம் " என்ற பேச்சும் வன்மையாகக் கண்டிக்கத்தக்கது .

அதானே , நாம் பதிலுக்கு பாகிஸ்தானை அழித்துவிடுவோம் என்று சொல்லுறது மகாதவறு தான். பனியிலும் / கடும்வெயிலிலும் எல்லை பகுதியை கண்போல காத்துநின்ற வீரனை தலையை வெட்டி தட்டில் வைத்து அனுப்பியபோதே நாம் எவ்வளவு அமைதியாக இருந்தோம்.இப்ப மட்டும் என்ன இவர்களுக்கு இவ்வளவு ரோஷம் பொத்துகிட்டு வருது

அப்துல் காதிர்கான் பேச்சு Non diplomacy வகையை சேர்ந்தது .

ரமணியன்

T.N.Balasubramanian wrote:அப்துல் காதிர்கான் பேச்சு Non diplomacy வகையை சேர்ந்தது .

ரமணியன்

நம்ம அப்துல்கலாம் ஐயா அவர்களின் அறிவு திறனோடு ஒப்பீடு செய்யப்பட்டவர் இவர் , ஆனால் நம்மவரின் மனிதநேயத்திற்கு முன் இவர் சும்மா தூசு

நம் அப்துல் கலாம் அய்யா , அறிவுத்திறன் அதிகம் இருந்தும் எளிமையில் எவரெஸ்ட் ,
பெயரை கூறும் போதே வணங்க தூண்டுகிறது .

ரமணியன்

ஆணவத்தை சுட்டு பொசுக்கனும்.