சினிமா நியூஸ்...

‘அரண்மனை 2’, ‘நாயகி’ எனப் பேய் படங்களையும் ஒரு கை பார்க்கத் தொடங்கிவிட்ட த்ரிஷா, தற்போது இன்னும் ஒரு பேய் படத்தில் மிரட்ட இருக்கிறாராம். ‘மதுர’, ‘மிரட்டல்’ படங்களை இயக்கிய மாதேஷ் இயக்கத்தில் உருவாகும் படத்தில் த்ரிஷாதான் பேய். அதுவும் இரண்டு கேரக்டர்களில் நடிக்கிறாராம். ‘சிங்கம் 2’ படத்தைத் தயாரித்த பிரின்ஸ் பிக்சர்ஸ் பிரமாண்டமாகத் தயாரிக்கிறது. முழுக்க வெளிநாடுகளில் உருவாகிறது படம். ஒரு பேய்க்கே முடியல, இதுல ரெண்டு பேயா?

‘சபாஷ் நாயுடு’ என்று பெயரிலேயே கலவரத்தை ஆரம்பித்து வைத்த கமல்ஹாசன், ஜூலை மாதத்துக்குள் மொத்தப் படத்தையும் முடிக்க இருக்கிறார். அந்த காமெடிப் படத்தை முடித்த கையோடு தன் திரைக்கதை, வசனத்தில் ராஜேஷ் எம்.செல்வா இயக்கும் ஒரு ஆக்‌ஷன் படத்தில் நடிக்கிறாராம். இதற்காக தற்போதே முன் தயாரிப்புப் பணிகளை முடுக்கிவிட்டிருக்கிறாராம். விமானக் கடத்தலை மையமாகக்கொண்ட விறு விறு ஆக்‌ஷன் படம் என்கிறார்கள். ஒரு பிடி காமெடி, ஒரு பிடி அடிதடி!

‘புலி’, ‘போக்கிரி ராஜா’ படங்களில் படுதோல்வியைச் சந்தித்தாலும் மனம் தளராமல் தனது அடுத்த தயாரிப்பில் கவனத்தை செலுத்த ஆரம்பித்திருக்கிறார் தயாரிப்பாளர் பி.டி.செல்வகுமார். இயக்குநர் சாமி இயக்க இருக்கும் ‘மிருகம் 2’ படத்தைத் தயாரிக்கிறார். நாயகி முடிவாகாத இந்தப் படத்தில் ஆதி நாயகனாகவும், சோனா முக்கிய வேடத்திலும் நடிப்பார்கள் என சொல்கிறார்கள். ஆதி பாதி, மிருகம் மீதி!



பாலிவுட், ஹாலிவுட் என பறந்து பறந்து பிஸியாக நடித்துக்கொண்டிருக்கும் பிரியங்கா சோப்ரா அமெரிக்காவில் சொந்தமாக ஒரு வீடு வாங்கத் திட்டமிட்டிருக்கிறார். படப்பிடிப்புக்குப் போகும் இடங்களில் ஹோட்டலில் தங்குவதில் உடன்பாடு இல்லையாம் பிரியங்காவுக்கு. மேலும் வருடத்தில் பாதி நாட்கள் அமெரிக்காவிலேயே தங்குவதால்தான் அங்கேயே ஒரு வீடு வாங்க முடிவெடுத்தாராம். ரகசிய கேமராக்கள் பொருத்தி குளியலறை, படுக்கை அறை வீடியோக்களை எடுத்து இணையத்தில் கசியவிட்டு விடுவதாலும் இந்த எச்சரிக்கை முடிவாம். யாருகிட்ட!

ரஜினியை வைத்து எப்படியாவது ‘சந்திரமுகி 2’ எடுக்க முயற்சித்த வாசு, ரஜினி கால்ஷீட் கிடைக்காததால். லாரன்ஸை வைத்து இயக்கும் வேலைகளில் இறங்கிவிட்டார். ரஜினி ‘சந்திரமுகி’ படத்துக்கு முன்பு சொன்னபடி, முதல் வேலையாக வடிவேலுவின் கால்ஷீட்டை வாங்கி விட்டாராம் வாசு. கன்னட ‘சிவலிங்கா’ படத்தின் ரீமேக்கான இதில் வாசுவின் மகன் சக்திவேல் மட்டும் கன்னடத்தில் தான் நடித்த அதே கேரக்டரில் நடிக்கிறாராம். ராரா!

‘காக்கா முட்டை’ மணிகண்டன் விஜய் சேதுபதியை இயக்குகிறார், ‘ஆண்டவன் கட்டளை’ தலைப்பு என்ற செய்தி வந்தவுடனே என்ன மாதிரி படமாக இருக்கும் என மண்டையைப் பிய்த்துக்கொண்டிருக்கிறார்கள் ரசிகர்கள். ஆனால், மணிகண்டனோ இதுவும் ஒரு யதார்த்தமான படம்தான் என்கிறார். விசா வழங்கும் பிரச்னைகள், குளறுபடிகளை காமெடியாக அலசும் படம்தானாம் இது. ‘இறுதிச்சுற்று’ படத்தில் குத்துச்சண்டை போட்ட ரித்திகா சிங், இதில் தைரியமான பத்திரிகையாளராக நடித்திருக்கிறாராம். ரித்திகான்னா தைரியம்தானே!

‘சூது கவ்வும்’, ‘காதலும் கடந்து போகும்’ படங்களைத் தொடர்ந்து படம் இயக்குவதைத் தற்காலிகமாக நிறுத்தி வைத்துவிட்டு படத்தில் நடிக்கப் போய்விட்டார் இயக்குநர் நலன் குமாரசாமி. மணி என்பவர் இயக்க, சிபிராஜ், ஐஸ்வர்யா ராஜேஷ் நடித்து வரும் படத்தில் ஒரு முக்கியமான காமெடி வேடத்தில் நடித்து வருகிறார் நலன். நடிகர் அவதாரம் எடுத்துள்ள நலன் படத்தில் மருத்துவராக நடிக்கும் காட்சிகள் விழுந்து விழுந்து சிரிக்க வைக்கும் அளவுக்கு இருக்கும் என சொல்லிக்கொள்கிறார்கள் படக்குழுவினர். சிரிப்பு கவ்வுமா?

இந்தியில் சரித்திரப் படங்களுக்கு பெயர் போன சஞ்சய் லீலா பன்சாலி, ‘பாஜிராவ் மஸ்தானி’ படத்தைத் தொடர்ந்து இயக்கும் அடுத்த படமும் ஒரு சரித்திரப் படம்தானாம். முந்தையப் படத்தில் நடித்த அதே ரன்வீர் சிங், தீபிகா படுகோன் ஜோடிதான் இந்தப் படத்திலும் நடிக்கிறார்களாம். சரித்திரப் படம்தான் என்றாலும் வழக்கம்போல இதுவும் வரலாற்றுக் காதல் கதைதானாம். அலாவுதீன் கில்ஜி, ராணி பத்மாவதியின் காதல்தான் படத்தின் மையக்கதையாம். இந்தப் பிரமாண்ட படத்துக்கும் அவரேதான் இசையமைக்க இருக்கிறாராம்.

தமிழின் முதல் ஸோம்பி படமான ‘மிருதன்’ சரியாகப் போகவில்லை என்றாலும், அதன் ஹீரோவான ‘ஜெயம்’ ரவியும், இயக்குநர் சக்தி சௌந்தர்ராஜனும் மீண்டும் ஒரு விண்வெளி அறிவியல் சார்ந்த படத்தில் இணைகிறார்கள். அதில் முதல் பாதியில் வடசென்னையைச் சேர்ந்த திருடனாக இருக்கும் ரவி, இரண்டாம் பாதியில் விண்வெளிக்குப் போவதுதான் கதையாம். தமிழில் உருவாகும் முதல் விண்வெளிப் படம் என்ற பெயரைப் பெறுமாம் இந்தப் படம். முதல் முயற்சிகளின் இயக்குநர்!

எத்தனையோ பேர் விஜய்க்கு அம்மா வாகப் படங்களில் நடித்திருந்தாலும், விஜய்யின் ஃபேவரைட் அவரது அம்மா ஷோபா சந்திரசேகர்தானாம். இயக்குநராக, பாடகியாக, இசைக்கலைஞராக பல அவதாரங்கள் எடுத்திருக்கும் ஷோபா சந்திரசேகருக்கு விஜய்யின் அம்மாவாக ஒரே ஒரு படத்திலாவது நடித்துவிட வேண்டும் என்ற ஆசை இருக்கிறதாம். வாய்ப்பு இருந்தால் சொல்கிறேன் எனச் சொல்லியிருக்கிறாராம் விஜய். அம்மாங்ணா!

எந்த ஈகோவும் இல்லாமல் யார் கூப்பிட்டாலும் பாடிக் கொடுப்பவர் நடிகர் சிம்பு. சிம்பு மீது எவ்வளவு சர்ச்சைகள் இருந்தாலும், சிம்புவைத் தங்கள் படங்களில் பாட வைக்கவும், கெஸ்ட் ரோலில் நடிக்க வைக்கவும் எல்லாப் பிரபலங்களும் விரும்புகிறார்கள். சமீபத்தில்கூட ‘வீர சிவாஜி’ படத்தில் விக்ரம் பிரபுவுக்காக இமான் இசையில் தாறுமாறு என்ற குத்துப்பாடலை பாடிக்கொடுத்திருக்கிறார். பாடியதற்காக ஒரு பெரும் தொகையை சம்பளமாகக் கொடுக்க, விக்ரம் பிரபுவின் நட்புக்காகத்தான் பாடினேன் என்று சொல்லி செக்கை திருப்பிக் கொடுத்து விட்டாராம். நல்லவன்!

‘கபாலி’ தான் தற்போதைய ட்ரெண்டிங் டாப்பிக். டீஸர் வெளியாகிப் பல சாதனைகளை முறியடித்துக்கொண்டிருக்கும் நிலையில் சமீபத்தில் அதைப் பார்த்த இந்தி நடிகர் அக்‌ஷய் குமார், ‘கபாலி’ படத்தை முதல் நாள் முதல் காட்சியில் ரசிகர்களோடு அமர்ந்து பார்க்க ஆசைப்படுவதாகத் தெரிவித்திருக்கிறார். கபாலிடா!

‘அ.ஆ’ படத்தில் அறிமுகமான நடிகை நிலாவுக்கு அதன் பிறகு தமிழில் படவாய்ப்புகள் பெரிதாக அமையாததால், லண்டனில் செட்டிலாகி தன் தந்தையின் பிஸினஸைக் கவனித்து வந்தார். தற்போது மீண்டும் நடிக்க வந்து பிஸி நடிகையும் ஆகிவிட்டார்; தமிழில் அல்ல. இந்தியில் சின்ன பட்ஜெட் படங்களில்தான். தன் சொந்த பெயரான மீரா சோப்ரா என்ற பெயரிலேயே நடித்தும் வரும் அவர், தமிழ்ப் படங்களில் நடிக்கும் வாய்ப்புகள் கிடைத்தால் என் அதிர்ஷ்டம்தான், அது கிடைக்கும் வரை இப்படித்தான் என்கிறார். ஒ.ஓ!

நன்றி-டைம் பாஸ்