ஐபிஎல் இறுதிச்சுற்றில் விளையாடுவது மிகப்பெரிய கெளரவம்: டிவில்லியர்ஸ்

-
ஐபிஎல் கிரிக்கெட் போட்டியின் இறுதிச்சுற்றில் விளையாடுவது
மிகப்பெரிய கெளரவம் என்று பெங்களூர் ராயல் சேலஞ்சர்ஸ்
வீரர் டிவில்லியர்ஸ் தெரிவித்துள்ளார்.
-
பெங்களூரில் செவ்வாய்க்கிழமை நடைபெற்ற ஐபிஎல்
கிரிக்கெட் போட்டியின் முதல் தகுதிச்சுற்றில் 4 விக்கெட்
வித்தியாசத்தில் குஜராத் லயன்ஸை வீழ்த்தி இறுதிச்சுற்றுக்கு
முன்னேறியது பெங்களூர்.
-
இந்த ஆட்டத்தில் பெங்களூர் அணியில் முன்னணி
பேட்ஸ்மேன்கள் ஒற்றை இலக்க ரன்களில் நடையைக் கட்டினர்.
அந்த அணி தோல்வியின் பிடியில் சிக்கித் தவித்தபோது
டிவில்லியர்ஸ் 47 பந்துகளில் ஆட்டமிழக்காமல்
79 ரன்கள் குவித்து வெற்றி தேடித்தந்தார்.
-
இதன்பிறகு அவர் கூறியதாவது:
-
ஐபிஎல் போட்டியில் இறுதிச்சுற்றுக்கு முன்னேறியிருப்பது எனக்கு
மிகப்பெரிய விஷயம் ஆகும். ஏனெனில் எனது கிரிக்கெட்
வாழ்க்கையில் நான் அதிக அளவில் இறுதிச்சுற்றுகளில்
விளையாடியதில்லை.
-
கடந்த 6 ஆண்டுகளாக பெங்களூர் அணிக்காக விளையாடினேன்.
அதில் பெங்களூர் அணி இறுதிச்சுற்றுக்கு முன்னேறியதில்லை.
ஆனால் இந்த முறை பெங்களூர் அணிக்காக இறுதிச்சுற்றில்
விளையாடவிருப்பது மிகப்பெரிய கெளரவம் ஆகும்.
-
பெரும்பாலானோர் எங்கள் அணியை குறைத்து மதிப்பிட்டனர்.
ஆனால் இந்த முறை நாங்கள் சிறந்த அணி என்பதை
நிரூபித்திருக்கிறோம். கடந்த சில ஆண்டுகளாகவே நாங்கள் ஓர்
அணியாக இணைந்து சிறப்பாக ஆடி வருகிறோம்.
-
எனினும் இறுதிச்சுற்றில் ஆடும் வாய்ப்பு முந்தைய ஆண்டுகளில்
கிடைக்கவில்லை. இந்த முறை நாங்கள் கோப்பையை வெல்வோம்
என நம்புகிறேன். எனினும் என்ன நடக்கப் போகிறது என்பது
எனக்குத் தெரியாது என்றார்.

மற்றொரு கேள்விக்குப் பதிலளித்த டிவில்லியர்ஸ், "குஜராத் பெளலர்
குல்கர்னி சிறப்பாக பந்துவீசினார். அவர் பாராட்டுக்குரியவர்.
ஆரம்பத்தில் சிறப்பாக பந்துவீசிய குல்கர்னி, ஆட்டத்தின் போக்கை
தங்கள் அணியின் வசம் திருப்பினார்' என்றார்.
-
-----------------------------------
தினமணி