மோடி அரசின் 2-ம் ஆண்டு நிறைவு விழா நடிகர் அமிதாப் பச்சன் தொகுத்து வழங்குகிறார்

புதுடெல்லி,

டெல்லி இந்தியா கேட்டில் மோடி அரசின் 2-ம்
ஆண்டு நிறைவு விழா 28-ந்தேதி நடக்கிறது.
அதை நடிகர் அமிதாப் பச்சன் தொகுத்து
வழங்குகிறார்.

2 ஆண்டு நிறைவு

பிரதமர் நரேந்திர மோடி அரசு பதவி ஏற்று
2 ஆண்டுகள் நிறைவடைந்துள்ளன. இதையொட்டி,
அவரது அரசின் சாதனைகளை விளக்கி,
நாடு முழுவதும் பல்வேறு நகரங்களில் நிகழ்ச்சிகள்
நடத்த திட்டமிடப்பட்டுள்ளது.

இந்த நிகழ்ச்சிகளில், சாதனைகளை விளம்பரப்
படுத்துவதற்காக, ஒவ்வொரு அமைச்சகத்திடமும்
அதன் சாதனைகள் பட்டியலை மத்திய தகவல்
ஒலிபரப்பு அமைச்சகம் கேட்டுள்ளது.

அமிதாப் பச்சன்

இந்த கொண்டாட்டத்தின் ஒரு பகுதியாக, டெல்லி
இந்தியா கேட்டில் 28-ந்தேதி மத்திய அரசு சார்பில்
பிரமாண்ட விழா நடக்கிறது.

இதற்கு ‘ஸ்மைல் பிளீஸ்’ என்று பெயரிடப்பட்டுள்ளது.
இந்த நிகழ்ச்சியை பிரபல இந்தி நடிகர் அமிதாப் பச்சன்
தொகுத்து வழங்குகிறார்.

பிரதமர் நரேந்திர மோடி, மத்திய மந்திரிகள் மற்றும்
பா.ஜனதா தலைவர்கள் இதில் கலந்து கொள்கிறார்கள்.

நேரடி ஒளிபரப்பு

இவ்விழாவில், மோடி அரசின் சாதனைகளை விளக்கும்
நிகழ்ச்சிகளும், பல்வேறு கலை நிகழ்ச்சிகளும்
நடக்கின்றன.

குறிப்பாக, தூய்மை பாரதம், டிஜிட்டல் இந்தியா,
கிராமப்புற மின்மயமாக்கம் ஆகிய திட்டங்கள்
விளம்பரப்படுத்தப்படும் என்று தெரிகிறது.

விழா நிகழ்ச்சிகளை தூர்தர்ஷன் நாடு முழுவதும்
நேரடியாக ஒளிபரப்புகிறது.

மந்திரிகள் குழு

இந்த விழா ஏற்பாடுகளை மேற்பார்வையிட மத்திய
நகர்ப்புற வளர்ச்சித்துறை மந்திரி வெங்கையா நாயுடு
தலைமையில் குழு அமைக்கப்பட்டுள்ளது.

இக்குழுவில், மத்திய மந்திரிகள் நிதின் கட்கரி,
பியுஷ் கோயல், ராஜ்யவர்த்தன் சிங் ரத்தோர்
ஆகியோர் இடம்பெற்றுள்ளனர்.

விழாவில், எந்தெந்த திட்டங்களை முன்னிலைப்
படுத்த வேண்டும் என்பது பற்றி இவர்கள் ஏற்கனவே
பலதடவை ஆலோசனை நடத்தி உள்ளனர்.

பா.ஜனதா ஏற்பாடு

இதுதவிர, மோடி அரசின் சாதனைகளை விளக்க,
பா.ஜனதா சார்பில் நாடு முழுவதும் 200-க்கும்
மேற்பட்ட நிகழ்ச்சிகள் நடக்கின்றன.
பிரதமர் மோடியும் சில ஊர்களில் பொதுக்
கூட்டங்களில் பங்கேற்று பேசுகிறார்.
-
தினத்தந்தி

ம்ம்... நல்ல விவரங்கள் அண்ணா