புதுப்பிக்கப்பட்ட பாண்டுரங்கன் ஆலயம்!

தஞ்சாவூர் மாவட்டம், திருவிடைமருதூர் வட்டத்தில் உள்ளது கதிராமங்கலம் கிராமம். முற்காலத்தில் மிகவும் செழிப்புற்று விளங்கிய இப்பகுதியில் நெற்கதிரைக் கொண்டே வீட்டின் கூரையை அமைத்தார்களாம். இதனை கம்பர் தனது பாடல்களில் "கதிர்வேந்தமங்கலம்' என்று அழகு தமிழில் அழகுற குறிப்பிட்டுள்ளார்.

இங்குதான் அகஸ்திய முனிவரால் பிரதிஷ்டை செய்யப்பட்டு மிருகண்டு முனிவர் பூஜித்த வனதுர்க்கை அம்மன் தனிக்கோயில் உள்ளது. சுமார் 2500 ஆண்டுகளுக்கு முற்பட்டது இந்த ஆலயம். இந்த வனதுர்க்கை பல குடும்பங்களுக்கு குலதெய்வமாகவும் இருந்து காத்து வருகின்றாள்.

எவர் ஒருவருக்கு தனது குலதெய்வம் யார் என்பது தெரியவில்லையோ அவர்கள் இந்த ஆலயத்தில் வந்து தமது குலதெய்வமாகவே வனதுர்க்கையை வணங்கினால் அவர்களின் குல தெய்வத்திடம் அதை அவள் சமர்ப்பித்து விடுவதாக ஓர் ஐதீகம். இவ்வூரில் இரண்டாம் குலோத்துங்க சோழமன்னரால் கட்டப்பட்ட காளஹஸ்தீஸ்வரர் சிவன் கோயிலும் ஸ்ரீ வெங்கடேசப்பெருமாள் ஆலயங்களும் வழிபாட்டில் உள்ளன.

இவ்வூருக்குச் சிறப்பு சேர்க்கும் விதமாக இவ்வூரின் கண் வடக்கு அக்ரஹாரத்தில் உள்ள ஸ்ரீ சுந்தரவிநாயகர் ஆலயத்தின் அருகில் உள்ளது சுமார் 600 ஆண்டுகள் பழைமையான பாண்டுரங்கன் சந்நிதி.

இச்சந்நிதி புதுப்பிக்கப்பட்டு புதிய ஆலயமாக அமைக்கப்பட்டுள்ளது. இந்த விட்டோபா ஆலயம், தஞ்சையை ஆண்ட நாயக்கர் காலத்தில் பிரதிஷ்டை செய்யப்பட்டு, பின்னர் மராட்டிய மன்னர்கள் காலத்தில் பராமரிக்கப்பட்டுள்ளது.

இரண்டு திருக்கரங்களை இடுப்பில் வைத்துக் கொண்டு ருக்மிணியும் அதே நாட்டிய பாவத்தில் புன்னகை ததும்பும் வதனங்களுடன் விட்டலன் பக்தர்களுக்கு காட்சி தரும் அழகே அழகு! சுமார் 2 அடி உயரத்தில் வெள்ளை (பளிங்கு)க் கல்லில் வடிவமைக்கப்பட்டுள்ளன இத் தெய்வத்திருவுருவங்கள்.

புதுப்பிக்கப்பட்ட இந்த விட்டலனின் ஆலயத்திற்கு புனராவர்தன மகாகும்பாபிஷேகம் ஏப்ரல் - 29 ஆம் தேதி காலை 8 மணி அளவில் கோலாகலமாக நடைபெற உள்ளது. இதனையொட்டி ஏப்ரல் - 27 ஆம் தேதி முதல் ராதா கல்யாணம் மற்றும் பஜனைகள் நடத்தப்படுகிறது. மராட்டிய மாநிலத்தில் உள்ள பண்டரிபுரம் கோயிலைப் போலவே இக்கோயிலிலும் வழிபாட்டு முறைகள் அமையவிருக்கின்றது. மயிலாடுதுறையிலிருந்து 15 கி.மீ. தொலைவில் உள்ளது கதிராமங்கலம்.

எஸ். வெங்கட்ராமன்
தினமணி

ayyasamy ram wrote:
-
ஆடி மாதத்தில் வரும் ஆஷாட ஏகாதசி,
பாண்டுரங்கன் ஆலயத்தில் வெகு விமரிசையாகக்
கொண்டாடப்படுகிறது.

அச்சமயம் ‘ஜய ஜய விட்டல, பாண்டுரங்க விட்டல,
ஹரி நாராயண விட்டல’ என்ற கோஷங்கள் விண்ணை
எட்டும்.

பண்டரிபுரத்தில் மட்டுமல்ல! பக்தர்கள் எங்கெல்லாம்
அன்புடன் ‘ஜய ஜய விட்டல, பாண்டுரங்க விட்டல’ என
அழைத்தாலும் அங்கெல்லாம் பாண்டுரங்கன் ஓடி
வருவான் என்பது உறுதி
-

-
தென்னாங்கூர் - பாண்டுரங்கள்

மேற்கோள் செய்த பதிவு: 1208847

அருமையான கோவில் இது ராம் அண்ணா, என் பதிவை படித்து இருக்கீங்களா இந்த கோவில் பற்றியது