ஒரு'எய்ட்ஸ் கிராமம்'

வத்திராயிருப்பு: விருதுநகர் மாவட்டம் வத்திராயிருப்பு அருகே ஒரே கிராமத்தை சேர்ந்தவர்கள் அதிக எண்ணிக்கையில் எய்ட்ஸ் நோயால் பாதிக்கப்பட்டுள்ளதாக அரசு மருத்துவமனை ஆய்வறிக்கையில், அதிர்ச்சி தகவல் வெளியாகி உள்ளது.வத்திராயிருப்பு அரசு மருத்துவமனையில் அரசு மருத்துவ மேம்பாட்டு திட்டத்தின் கீழ் 'மருத்துவ திருவிழா' நடந்தது.


ஸ்ரீவி. தொகுதி எம்.எல்.ஏ., ராமசாமி தலைமையில் நடந்த விழாவில் சித்தமருத்துவம், எய்ட்ஸ் என ஒவ்வொரு பிரிவிலிருந்தும் வருடாந்திர ஆய்வறிக்கை வெளியிடப்பட்டது. இதில் எய்ட்ஸ் ஒருங்கிணைந்த ஆற்றுப்படுத்துதல் பரிசோதனை மையத்திலிருந்து தரப்பட்ட அறிக்கையில்," கடந்த ஒரு ஆண்டில் 3,000 பேருக்கு எய்ட்ஸ் பரிசோதனை செய்யப்பட்டதில் எட்டு பெண்கள் ஒரு குழந்தை, ஐந்து ஆண்கள் ஒரு அரவாணி உட்பட 14 பேருக்கு எய்ட்ஸ் இருப்பது கண்டுபிடிக்கப்பட்டது. அவர்களுக்கு தொடர்ந்து சிகிச்சையளிக்கப்படுகிறது.


மேலும் வத்திராயிருப்பு அருகே மகாராஜபுரத்தில் அதிகம் பேருக்கு எச்.ஐ.வி., இருப்பதாகவும், வெளியில் தெரிந்தால் அவமானம் எனக்கருதி பலரும் சிகிச்சைக்கு மறுத்து வருவதாகவும் தெரிவிக்கப்பட்டுள்ளது.இந்த கிராமத்தை பொறுத்தவரை பெரும்பாலானோர் ஜவுளி வியாபாரத்தில் ஈடுபட்டுள்ளனர். அங்குள்ள ஆண்கள் வேன்களில் ஜவுளிகளை நிரப்பிக்கொண்டு பல்வேறு மாநிலங்களில் தங்கி வியாபாரம் செய்கின்றனர்.அப்போது பல பெண்களுடன் இவர்கள் "உறவு' வைத்திருந்ததால் அவர்கள் மூலமாக ஏற்பட்ட எச்.ஐ.வி., கிருமிகள் இவர்கள் மனைவிகளுக்கும் தொற்றியுள்ளது.

மருத்துவ அதிகாரிகள் கூறுகையில்," மகாராஜபுரத்தில் எய்ட்ஸ் அறிகுறி இருப்பதாக கண்டறியப்பட்டவர்களில் பலர் இங்குள்ள மையத்தில் சிகிச்சை எடுத்தால் வெளியில் தெரிந்துவிடும் எனக்கருதி வெளியூர் சென்று சிகிச்சை பெறுகின்றனர். ஒருசிலர் சிகிச்சை எடுப்பதையே அவமானமாக கருதி எங்கும் சிகிச்சைக்கு செல்லாமல் வீட்டிலேயே அடைபட்டு கிடக்கின்றனர்.

போதிய படிப்பறிவும், எய்ட்ஸ் பற்றிய விழிப்புணர்வு இல்லாமல் இருப்பதே இதற்கு முக்கிய காரணம் 'என்றனர்.நோய் காரணமாக, கிராமத்தில் ஏற்கனவே சிலர் மரணமடைந்திருந்தாலும் தற்போது வெளியிடப்பட்டுள்ள மருத்துவ அறிக்கை கிராமத்தினர் மட்டுமல்லாது வத்திராயிருப்பு பகுதியை சேர்ந்தவர்களை பெரும் அதிர்ச்சிக்குள்ளாக்கியுள்ளது.