நாளை கரையைக் கடக்கிறது காற்றழுத்த தாழ்வு மண்டலம் - கனமழைக்கு வாய்ப்பு!

சென்னை : காற்றழுத்த தாழ்வு மண்டலம் நாளை (17-ம் தேதி) கரையை கடக்க இருப்பதாகவும், தமிழகத்தில் கனமழைக்கு வாய்ப்பிருப்பதாகவும் சென்னை வானிலை ஆய்வு மையம் தெரிவித்துள்ளது. சென்னையில் நேற்று செய்தியாளர்களைச் சந்தித்தார் வானிலை ஆய்வு மைய இயக்குநர் பாலச்சந்திரன். அப்போது அவர் கூறியதாவது:-

வங்கக் கடலில் உருவான குறைந்த காற்றழுத்த தாழ்வு நிலை தாழ்வு மண்டலமாக மாறி பாம்பன் - நாகப்பட்டினம் இடையே 17-ம் தேதி கரையை கடக்கும். அப்போது 60 கி.மீ வேகத்தில் காற்று வீசக் கூடும் என்பதால் மீனவர்கள் கடலுக்குள் செல்ல வேண்டாம். தென் தமிழகத்தில் பல இடங்களில் பலத்த மழையும், வடதமிழகத்தின் சில இடங்களில் கனமழையும் பெய்ய வாய்ப்பிருப்பதாக தெரிவித்தார். சென்னையில் மேகமூட்டம் காணப்படுவதுடன், ஓரிரு இடங்களில் மழை பெய்யக் கூடும்' என்றார்.

இதனிடையே கடந்த இரண்டு நாட்களாக தமிழத்தில் பரவலாக மழை பெய்து வருகிறது. மதுரையில் நேற்று முன்தினம் திடீரென ஆலங்கட்டி மழை பெய்தது. சுமார் 1 மணி நேரம் நீடித்த இந்த மழையால் சாலைகளில் வெள்ளம் பெருக்கெடுத்து ஓடியது. அக்னி நட்சத்திரத்தின் கொடுமையால் வாடிக்கொண்டிருந்த தமிழக மக்கள் தற்போது நிம்மதி பெருமூச்சு விட்டுக்கொண்டிருக்கிறார்கள். அக்னி நட்சத்திரம் இல்லாத காலத்தில் வெயில் கொளுத்தியது. 105 டிகிரி வரை வெயில் கொளுத்தியதால் மக்கள் மிகவும் தவித்து போனார்கள். ஆனால் இப்போது கத்திரி வெயில் என்று சொல்லப்படும் அக்னி நட்சத்திர காலம் நடந்து வருகிறது. ஆனால் வெயிலை காணவில்லை. இது மக்களுக்கு மிகுந்த மகிழ்ச்சியை ஏற்படுத்தியுள்ளது.

தினபூமி

எங்க பக்கம் மழை போதலிங்க இன்னும் பெய்யனும்.

சென்னை இல் கூட மழை இல்லையாமே அண்ணா