பயம்- ஒரு பக்க கதை

**ayyasamy ram** · **ayyasamy ram** Thu May 12, 2016 7:51 am

-
இரவு பதினொரு மணி… இருண்ட, ஆளரவமற்ற அந்த
மயானப் பாதை வழியாக நடந்து வந்து கொண்டிருந்த
பிரபாகர், தன் பின்னால் ஏதோ உருவம் நெருங்கி
வருவதை உணர்ந்தான்.
–
அவன் இதயம் இன்னும் வேகமாகத் துடிக்கத் தொடங்கியது.
‘திருடனோ, சைக்கோ கொலைகாரனோ, ஒருவேளை…
பேயாகக் கூட இருக்குமோ!’ விருட்டென்று அந்த உருவம்
பிரபாகர் தோளைப் பற்றியது.
‘‘அய்யோ!’’ – அரண்டே போய்விட்டான் அவன்.
–
‘‘என்ன தம்பி! ஏதோ அவசரச் செலவுக்கு எங்கிட்ட
பத்தாயிரம் ரூபாய் கடன் வாங்கினே. மூணு மாசமாச்சு.
இப்பல்லாம் வேலை முடிஞ்சு ராத்திரி நம்ம கடைப் பக்கமா
வராம இந்த வழியாத்தான் வர்றே போலருக்கு!’’
–
பலசரக்கு கடைக்காரர் குருசாமிதான் நின்றிருந்தார்.

‘‘இல்லீங்க அய்யா… நானும் திருப்பித் தரணும்னு
நினைக்கிறேன். ஆனா, அம்மாவுக்கு மருந்துச் செலவு அது
இதுனு…’’ – தந்தியடித்தான் பிரபாகர்.

‘‘புரியுதுப்பா. பணத்தை எப்போ முடியுமோ அப்ப கொடு.
ஒண்ணும் அவசரமில்லை. அதுக்காக பயந்துக்கிட்டு இப்படிப்
பட்ட சுடுகாட்டுப் பாதையில ராத்திரி நேரத்துல வராதே.
ரவுடிப் பசங்க உலவுற இடம். அதைச் சொல்லத்தான் வந்தேன்!’’
என்றபடி கிளம்பினார் குருசாமி.
–
பிரபாகருக்கு பயம் விலகி, குற்ற உணர்வு மனம் முழுக்கப்
பரவியிருந்தது.
–
——————————————
கீர்த்தி
குங்குமம்