கொல்கத்தாவை வீழ்த்தி புள்ளி பட்டியலில் முதலிடத்தை பிடித்தது குஜராத்

கொல்கத்தா,
-
ஐ.பி.எல். 20 ஓவர் கிரிக்கெட் போட்டியில் நேற்று இரவு நடந்த
கொல்கத்தா அணிக்கு எதிரான 38-வது லீக் ஆட்டத்தில் குஜராத் அணி
5 விக்கெட் வித்தியாசத்தில் வெற்றி பெற்று புள்ளி பட்டியலில்
முதலிடத்தை பிடித்தது.
-
அதிர்ச்சி தொடக்கம்
-
‘டாஸ்’ ஜெயித்த குஜராத் அணியின் கேப்டன் சுரேஷ்ரெய்னா
பீல்டிங்கை தேர்வு செய்தார். இதன்படி முதலில் பேட்டிங் செய்த
கொல்கத்தா அணியின் தொடக்க ஆட்டக்காரர்களாக ராபின் உத்தப்பா,
கேப்டன் கம்பீர் ஆகியோர் களம் இறங்கினார்கள்.
கொல்கத்தா அணிக்கு ஆரம்பமே அதிர்ச்சி காத்து இருந்தது.
-
கம்பீர் 5 ரன்னில் ஆட்டம் இழந்தார். அடுத்து வந்த மனிஷ்பாண்டே
ரன் எதுவும் எடுக்காமல் வெளியேறினார். ராபின் உத்தப்பா 14 ரன்னிலும்,
சூர்யகுமார் யாதவ் 4 ரன்னிலும் அடுத்தடுத்து ஆட்டம் இழந்து ஏமாற்றம்
அளித்தனர். இதனால் கொல்கத்தா அணி 6 ஓவர்களில் 24 ரன்களுக்கு
4 விக்கெட்டுகளை இழந்து தடுமாறியது.
-
5-வது விக்கெட்டுக்கு சாதனை
-
5-வது விக்கெட்டுக்கு யூசுப் பதான், ஷகிப் அல்-ஹசனுடன் இணைந்தார்.
இந்த ஜோடி அபாரமாக ஆடி அணியை சரிவில் இருந்து மீட்டதுடன்
5-வது விக்கெட்டுக்கு ஆட்டம் இழக்காமல் 134 ரன்கள் குவித்து சாதனை
படைத்தது. இதற்கு முன்பு 2010-ம் ஆண்டு ஐ.பி.எல். போட்டியில் மும்பைக்கு
எதிரான ஆட்டத்தில் கொல்கத்தா அணியின் ஒவைஸ்ஷா-மேத்யூஸ் ஜோடி
5-வது விக்கெட்டுக்கு ஆட்டம் இழக்காமல் 130 ரன்கள் எடுத்ததே
சாதனையாக இருந்தது.
-
நிர்ணயிக்கப்பட்ட 20 ஓவர்களில் கொல்கத்தா அணி 4 விக்கெட் இழப்புக்கு
158 ரன்கள் சேர்த்தது. ஷகிப் அல்-ஹசன் 49 பந்துகளில் 4 பவுண்டரி,
4 சிக்சருடன் 66 ரன்னும், யூசுப் பதான் 41 பந்துகளில் 7 பவுண்டரி, ஒரு
சிக்சருடன் 63 ரன்னும் எடுத்து ஆட்டம் இழக்காமல் இருந்தனர்.
குஜராத் அணியில் பிரவீன்குமார் 2 விக்கெட்டும், தவால் குல்கர்னி,
வெய்ன் சுமித் தலா ஒரு விக்கெட்டும் கைப்பற்றினார்கள்.
-
குஜராத் அணி வெற்றி
-
159 ரன் எடுத்தால் வெற்றி என்ற இலக்குடன் ஆடிய குஜராத் அணி
18 ஓவர்களில் 5 விக்கெட் இழப்புக்கு 164 ரன்கள் எடுத்து 5 விக்கெட்
வித்தியாசத்தில் கொல்கத்தாவை வீழ்த்தியது. குஜராத் அணியில்
வெய்ன் சுமித் 27 ரன்னிலும், பிரன்டன் மெக்கல்லம் 29 ரன்னிலும்,
கேப்டன் சுரேஷ் ரெய்னா 14 ரன்னிலும், தினேஷ் கார்த்திக் 51 ரன்னிலும்,
ஆரோன் பிஞ்ச் 29 ரன்னிலும் அடுத்தடுத்து ஆட்டம் இழந்தனர்.
-
ரவீந்திர ஜடேஜா 9 ரன்னுடனும், வெய்ன் பிராவோ ரன் எதுவும்
எடுக்காமலும் களத்தில் இருந்தனர்.
-
கொல்கத்தா அணி தரப்பில் ரஸ்செல், ஷகிப் அல்-ஹசன், பியுஷ் சாவ்லா,
பிராட் ஹாக் தலா ஒரு விக்கெட்டுகள் வீழ்த்தினார்கள்.
11-வது ஆட்டத்தில் ஆடிய குஜராத் அணி 7-வது வெற்றியுடன் புள்ளி
பட்டியலில் முதலிடத்தை பிடித்தது. 10-வது ஆட்டத்தில் ஆடிய கொல்கத்தா
அணி சந்தித்த 4-வது தோல்வி இதுவாகும்.
-
-------------------------------------
Daily Thanthi