இது அப்பா, இது அம்மா...!

**ayyasamy ram** · **ayyasamy ram** Tue May 03, 2016 6:57 pm

-
* விளையாட்டுப் பொருட்களைப் போலவே
மனதிற்குள்
அடுக்கி வைத்துக்கொள்கிறார்கள்
குழந்தைகள் நம்மை
இது அப்பா,
இது அம்மாவென்று!

* தந்தையும் மகனுமானாலென்ன
தந்தையும் மகளுமானாலென்ன
வயிறும் வாயும்
வேறு வேறுதானே என்கிறார்கள்
ஆம், அதெல்லாம் வேறு வேறுதான்.
ஆனால் எங்களுக்கு
உயிர் மட்டும் ஒன்றேயொன்று,
அது அவர்களுக்கான ஒன்று!

* தூங்கும்போது
எனது குழந்தைகளின்
முகத்தையே பார்க்கிறேன்
எனைப் போலவேதானே வாழ்க்கை
இவர்களுக்கும் வலிக்குமென்று துடிக்கிறேன்.
–

**ayyasamy ram** · **ayyasamy ram** Tue May 03, 2016 6:58 pm

கொஞ்சம் சிரிப்பாகவும்
கொஞ்சம் பயமாகவும்
தெரியுமவர்களின் முகத்தோடு
கத்தி நீட்டாமல் மிரட்டுமந்த
எதிர்காலத்தை சற்று சபிக்கிறேன்.
–
கசக்கிப் பிசைந்து உருட்டி
நல்லதாக மாற்றிய கனவுகளாக
மனக்கண்ணுள் வீசி
அவர்கள்மீது எறிகிறேன்.
‘போ, போய்
வெற்றியின் கனவுகளாக அங்கே விரி!’
கட்டளையின் நிம்மதியில்
உறங்கச் சம்மதிக்கிறது என் மனசும்…
–
* வீடு பெருக்குகையில்
விளையாட்டுப் பொருட்களை எல்லாம்
புலம்பிக்கொண்டே எடுத்து
அடுக்கினாள் அம்மா
மீண்டும் புலம்பிக்கொண்டே
கலைத்துப் போட்டது குழந்தை.
–
————–
வித்யாசாகர்
குங்குமம்