இலவசமே...கேவலமே !

**M.Jagadeesan** · **M.Jagadeesan** Wed May 04, 2016 10:59 am

கடவுள் கொடுத்த நன்கொடையாய்
...கையும் காலும் இருக்கையிலே
புடவை வேட்டி இலவசமாய்
... பூணும் வாழ்க்கை எதற்கடா ?

வந்த வறுமை போகவே
...சொந்தக் காலில் நில்லடா !
வெந்த சோறு போதுமே
...வேறு எதற்கு உனக்கடா !

இலவசம் வாங்கி வாழ்கின்ற
...இன்ப வாழ்வு எதற்கடா ?
மலத்தைத் தின்னும் பன்றியும்
...மனிதா உன்னில் மேலடா !

அப்பன் வீட்டு சொத்தையா
...அள்ளி அள்ளித் தருகிறார் ?
குப்பன் சுப்பன் கட்டிய
...வரிகள் அன்றோ இலவசம் !

ஊனப் பிறவி என்றாலும்
...உழைத்து உண்ண வேண்டுமே !
ஈனப் பிறவி மட்டுமே
...இரந்து உண்டு வாழுவார் !

அம்மா உணவகம் நடத்துவதா
...அரசின் பணியெனக் கேட்கின்றேன் !
இம்மா நிலத்தில் மக்களுக்கு
...இருக்க வீடுகள் இல்லையடா !

தந்த மிக்சி கிரைண்டர்கள்
...தரத்தில் குறைந்த பொருளாகும்
அந்த பொருட்களை எல்லாமே
...அடகு வைத்தார் கடையினிலே !

நீரை விலைக்கு விற்கின்ற
...நீசரைத் தள்ளி வைத்திடுவோம் !
கூரை வீட்டில் வாழ்ந்தாலும்
...கும்பிட்டு மட்டும் வாழாதே !

தமிழன் என்றொரு இனமுண்டு
...தனியே அவர்க்கொரு குணமுண்டு
அமிழ்தம் அவனது மொழியாகும்
...அன்பே அவனது வழியாகும் .

மானம் பெரிதென உயிர்விடுவார்
...மற்றவர்க் காகத் துயர்ப்படுவார் !
தானம் வாங்கிட கூசிடுவார்
...தருவது மேலெனப் பேசிடுவார் !

நாமக் கல்லார் அன்றுரைத்த
...நல்ல வரிகளைக் கேட்டிடுவீர் !
ஏமம் தருகின்ற வாழ்வுக்கு
...என்றும் இலவசம் கேவலமே !