ரூ.5 ஊதிய உயர்வை பிரதமருக்கு திருப்பியளித்த தொழிலாளர்கள்

தேசிய ஊரக வேலை உறுதித் திட்டத்தின் கீழ்
தொழிலாளிகளுக்கு நாள் ஒன்றுக்கு ரூ.5 மட்டுமே
ஊதிய உயர்வு வழங்கப்பட்டதற்கு ஜார்க்கண்ட்
மாநில தொழிலாளர்கள் எதிர்ப்பு தெரிவித்துள்ளனர்.

இதுதொடர்பாக பிரதமர் நரேந்திர மோடிக்கு அவர்கள்
எழுதிய கடிதத்தோடு சேர்த்து ரூ.5 தொகையையும்
அனுப்பி வைத்துள்ளனர்.

ஊரக வேலை உறுதித் திட்டத்தின் கீழ் ஜார்க்கண்ட்
மாநிலத்தில் ரூ.162 நாள் ஊதியமாக வழங்கப்பட்டு
வந்தது. இந்நிலையில், அந்தத் தொகையை மத்திய
அரசு ரூ.167 ஆக உயர்த்தியுள்ளது.

ஜார்க்கண்ட் மாநிலம், மணிகா மண்டலத்தைச்
சேர்ந்த பெண்கள் உள்ளிட்ட தொழிலாளிகள் இதற்கு
எதிர்ப்பு தெரிவித்துள்ளனர். இதுகுறித்து பிரதமருக்கு
அவர்கள் எழுதியுள்ள கடிதத்தில் கூறப்பட்டுள்ளதாவது:

எங்களுக்கு ஊதிய உயர்வு மிகக் குறைவாக வழங்கப்
பட்டுள்ளது கவலை அளிக்கிறது. அதேவேளையில்,
மத்திய அரசு நிதிப் பற்றாக்குறையில் இருப்பதாகக்
கருதுகிறோம்.

இல்லையென்றால், ஜார்க்கண்ட் மாநிலத்தில் வழங்கப்
படும் குறைந்தபட்ச ஊதியமான ரூ.212 என்ற அளவுக்கு
ஊதிய உயர்வு வழங்கப்பட்டிருக்கும் என நம்புகிறோம்.

இதில் துரதிருஷ்டம் என்னவெனில், 17 மாநிலங்களில்
5 ரூபாய்க்கும் குறைவாக ஊதிய உயர்வு வழங்கப்
பட்டிருப்பதுதான். அதிலும், ஒடிஸா மாநிலத்
தொழிலாளர்கள் நல்ல வளம் பெற்று விட்டார்கள்
போலிருக்கிறது. அதனால்தான், அவர்களுக்கு ஊதிய
உயர்வே வழங்கப்படவில்லை.

மத்திய அரசுக்கு செலவினங்கள் அதிகம் இருப்பதால்
பணத் தேவையும் அதிகமாக இருக்கும் எனக்
கருதுகிறோம். எல்லாவற்றையும் கருத்தில் கொண்டு,
தொழிலாளர்களாகிய நாங்கள் எங்களுடைய ஊதிய
உயர்வான 5 ரூபாயை அரசுக்குத் திருப்பி
அனுப்புகிறோம்.

இந்தத் தொகையைக் கொண்டு நிறுவனங்கள்,
அரசின் நண்பர்கள், ஊழியர்கள் போன்றோரை நீங்கள்
மகிழ்ச்சி அடையச் செய்வீர்கள் என நம்புகிறோம் என்று
அந்தக் கடிதத்தில் கூறப்பட்டுள்ளது.
-
---------------------------
தினமணி