திருவண்ணாமலையில் பயங்கரம் வீட்டில் தனியாக இருந்த பேராசிரியை வெட்டிக்கொலை

திருவண்ணாமலையில் வீட்டில் தனியாக இருந்த கல்லூரி பேராசிரியையை வெட்டிக்கொலை செய்து விட்டு, அவர் அணிந்திருந்த 12 பவுன் நகைகளை கொள்ளையடித்து சென்ற மர்மநபர்களை போலீசார் தேடி வருகிறார்கள். வேலூர் சரக டி.ஐ.ஜி. தமிழ்சந்திரன் சம்பவ இடத்தை பார்வையிட்டு விசாரணை நடத்தினார்.

கல்லூரி பேராசிரியை

திருவண்ணாமலையில் சென்னை சாலை அருகே உள்ள நாவக்கரை பகுதியை சேர்ந்தவர் விமல்ராஜ். ஓட்டுனர் பயிற்சி பள்ளி நடத்தி வருகிறார். அவருடைய மனைவி கிருஷ்ணவேணி (வயது 50). இவர் திருவண்ணாமலை அரசு கலைக்கல்லூரியில் தாவரவியல் உதவி பேராசிரியையாக பணிபுரிந்து வந்தார்.

இவர்களுக்கு ஈஸ்வரராஜ் (23), அட்சயராஜ் (20) என 2 மகன்கள் உள்ளனர். ஈஸ்வரராஜ் சென்னையில் தனியார் நிறுவனத்தில் வேலை செய்து வருகிறார். அட்சயராஜ் சேலத்தில் உள்ள பொறியியல் கல்லூரியில் படித்து வருகிறார்.

கணவன், மனைவி இடையே ஏற்பட்ட கருத்து வேறுபாடு காரணமாக கடந்த 6 மாதங்களாக விமல்ராஜ், கிருஷ்ணவேணி இருவரும் தனித்தனியே வாழ்ந்து வந்தனர்.

இந்த நிலையில் வழக்கம்போல் நேற்று முன்தினம் காலை கிருஷ்ணவேணி கல்லூரிக்கு சென்று விட்டு மாலை வீடு திரும்பினார். இரவு 8 மணியளவில் கிருஷ்ணவேணியை, அவரது சகோதரர் வடிவேல் செல்போனில் தொடர்பு கொண்டார். வெகு நேரமாக முயற்சி செய்தும் கிருஷ்ணவேணி செல்போனை எடுக்கவில்லை. இதனால் சந்தேகம் அடைந்த வடிவேல் 10 மணியளவில் கிருஷ்ணவேணி வீட்டிற்கு சென்றார்.

ரத்த வெள்ளத்தில் இறந்து கிடந்தார்

வீட்டின் முன்பக்க மின்விளக்குகள் உள்பட எந்த விளக்கும் போடாமல் இருந்தது. மேலும் வீட்டின் முன்பக்க கதவு திறந்து கிடந்தது. இதனால் சந்தேகம் அடைந்த வடிவேல் வீட்டின் உள்ளே சென்றார். அங்கு முன்அறையில் கிருஷ்ணவேணி ரத்தவெள்ளத்தில் இறந்து கிடந்தார். அவரது கழுத்து, தலையில் வெட்டுக்காயங்கள் இருந்தன. இதைக்கண்டு அதிர்ச்சி அடைந்த வடிவேல் கதறி அழுதார்.

இதுகுறித்து திருவண்ணாமலை கிழக்கு போலீசாருக்கு தகவல் தெரிவிக்கப்பட்டது. அதன்பேரில் சம்பவ இடத்துக்கு மாவட்ட போலீஸ் சூப்பிரண்டு பொன்னி, துணை போலீஸ் சூப்பிரண்டு சரவணக்குமார், இன்ஸ்பெக்டர் பார்த்தசாரதி ஆகியோர் தலைமையிலான போலீசார் விரைந்து சென்று பார்வையிட்டு கிருஷ்ணவேணியின் சகோதரர் வடிவேல் மற்றும் அக்கம் பக்கத்தில் வசிப்பவர்களிடம் விசாரணை நடத்தினர்.

வெட்டிக்கொலை–நகை திருட்டு

முதற்கட்ட விசாரணையில், நாவக்கரை பகுதியில் அடுத்தடுத்து வீடுகள் இல்லாததை நன்கு அறிந்த மர்ம நபர்கள், வீட்டில் தனியாக இருந்த கிருஷ்ணவேணியை கத்தியால் வெட்டிக் கொலை செய்து விட்டு, அவர் அணிந்திருந்த 4 பவுன் தாலி சங்கிலி, வளையல் உள்பட 12 பவுன் நகைகளை திருடி சென்றது தெரிய வந்தது. சம்பவ இடத்துக்கு மோப்பநாய் வரவழைக்கப்பட்டது. மோப்பநாய் சிறிது தூரம் ஓடி சென்று குடிநீர் தொட்டியின் அருகே நின்று விட்டது.

அதைதொடர்ந்து கிருஷ்ணவேணியின் உடலை போலீசார் கைப்பற்றி பிரேத பரிசோதனைக்காக திருவண்ணாமலை அரசு மருத்துவமனைக்கு அனுப்பி வைத்தனர்.

டி.ஐ.ஜி. நேரில் விசாரணை

இந்த சம்பவம் குறித்து தகவல் அறிந்த வேலூர் சரக டி.ஐ.ஜி. தமிழ்சந்திரன் நேற்று காலை கொலை நடந்த இடத்தை பார்வையிட்டார். பின்னர் கிருஷ்ணவேணியின் உறவினர்கள், அந்த பகுதிகளில் வசிக்கும் மக்களிடம் திருவண்ணாமலை கிழக்கு போலீஸ் நிலையத்தில் வைத்து விசாரணை நடத்தினார். மேலும் கொலையாளிகளை விரைந்து பிடிக்க போலீசாருக்கு உத்தரவிட்டார்.

இதுதொடர்பாக திருவண்ணாமலை கிழக்கு போலீஸ் இன்ஸ்பெக்டர் பார்த்தசாரதி வழக்குப்பதிவு செய்து மர்மநபர்களை தேடி வருகின்றனர். மேலும் திருவண்ணாமலை நகர துணை போலீஸ் சூப்பிரண்டு சரவணக்குமார், திருவண்ணாமலை புறநகர் துணை போலீஸ் சூப்பிரண்டு தேவநாதன் ஆகியோர் தலைமையில் தனிப்படை அமைக்கப்பட்டுள்ளது.

திருவண்ணாமலையில் கல்லூரி பேராசிரியை வெட்டிக்கொலை செய்யப்பட்ட சம்பவம் பரபரப்பை ஏற்படுத்தி உள்ளது.

தினதந்தி