குடிபோதையில் ரகளை செய்த காதல் ஜோடி போலீசார் எச்சரித்து அனுப்பினர்

கிருஷ்ணகிரி பஸ் நிலையத்தில் குடிபோதையில் ரகளை செய்த காதல் ஜோடியை போலீசார் எச்சரித்து அனுப்பி வைத்தனர்.

குடிபோதையில் காதல் ஜோடி

கிருஷ்ணகிரி புதிய பஸ் நிலையத்திற்கு நேற்று காலை சுடிதார் அணிந்த நிலையில் இளம்பெண் ஒருவரும், பேண்ட், சட்டை அணிந்தவாறு வாலிபர் ஒருவரும் வந்தனர். காதல் ஜோடியை போல காணப்பட்ட அவர்கள், தள்ளாடியபடி பஸ் நிலையத்திற்குள் நடந்து சென்றனர். மேலும் அந்த வழியாக சென்ற பயணிகளிடம் அவர்கள் தகராறில் ஈடுபட்டனர்.

இதை பார்த்த கடைக்காரர்கள் அந்த ஜோடியை அங்கிருந்து செல்லுமாறு எச்சரித்தனர். ஆனால் அந்த காதல் ஜோடியோ, அங்கிருந்து செல்லாமல் கடைக்காரர்களையும், பயணிகளையும் ஆபாச வார்த்தையால் திட்டி ரகளை செய்ய தொடங்கினார்கள். இதனால் அதிர்ச்சி அடைந்த பயணிகள் சிலர் இது குறித்து போலீசாருக்கு தகவல் தெரிவித்தனர்.

போலீசார் எச்சரித்தனர்

அதன் பேரில் ஏட்டு வெங்கடாசலம் மற்றும் போலீசார் அங்கு வந்தனர். அவர்கள் அந்த காதல் ஜோடியை பிடித்து விசாரணை நடத்தினார்கள். அதில் அந்த வாலிபர் கிருஷ்ணகிரி அருகே உள்ள மகராஜகடையைச் சேர்ந்தவர் என்றும், அந்த பெண் தர்மபுரி மாவட்டம் காரிமங்கலத்தைச் சேர்ந்தவர் என்றும், நர்சிங் படித்து வரும் மாணவி என்றும் தெரிய வந்தது. காதல் ஜோடிகளான இவர்கள், நேற்று காலை அளவுக்கு அதிகமாக மது குடித்து விட்டு பஸ் நிலையம் வந்ததும், அங்கு போதையில் தள்ளாடியபடி நடந்து சென்று பயணிகளிடம் ரகளையில் ஈடுபட்டதும் தெரிய வந்தது.

இதைத் தொடர்ந்து போலீசார் அவர்களை எச்சரித்து அனுப்பினார்கள். பின்னர் அந்த காதல் ஜோடியினர் அங்கிருந்து ஆட்டோவில் ஏறி சென்று விட்டனர். அளவுக்கு அதிகமாக அந்த மாணவி போதையில் இருந்ததால் உடுத்தி இருந்த உடை கூட அலங்கோலமானதை கவனிக்காமல் சாலையில் நடந்து சென்றார். இது அந்த வழியாக சென்ற பலரையும் முகம் சுளிக்க வைத்தது. இந்த சம்பவம் காரணமாக கிருஷ்ணகிரி பஸ் நிலையம் நேற்று காலை சிறிது நேரம் பரபரப்பாக காணப்பட்டது.

தினதந்தி