பகத்சிங் ஒரு தீவிரவாதி’ பாடப்புத்தகத்தில் கூறப்பட்டுள்ள கருத்துக்கு பா.ஜனதா கண்டனம்

புதுடெல்லி,

காங்கிரஸ் தலைமையிலான ஐக்கிய முற்போக்கு கூட்டணி ஆட்சியில் தேசிய புத்தக அறக்கட்டளை தலைவராக இருந்த பிபின் சந்திரா மற்றும் மிரிதுளா முகர்ஜி ஆகியோர் எழுதிய, ‘சுதந்திரத்துக்கான இந்தியாவின் போராட்டம்’ என்ற புத்தகம் டெல்லி பல்கலைக்கழக பாடத்திட்டத்தில் சேர்க்கப்பட்டு உள்ளது. இந்த புத்தகத்தில் பகத்சிங் ஒரு ‘புரட்சிகர தீவிரவாதி’ என கூறப்பட்டுள்ளதாக தெரிகிறது.

இதற்கு பாராளுமன்றத்தில் நேற்று பா.ஜனதா உறுப்பினர் அனுராக் தாகூர் கடும் கண்டனம் தெரிவித்தார்.

மேலும் அந்த புத்தகத்தில் ராகுல் காந்தி ஒரு கவர்ச்சிகரமான தலைவர் என்று கூறப்பட்டுள்ளதை எடுத்துரைத்த அவர், இது ஒரு சிறந்த நகைச்சுவை என்றும், ஏனெனில் ராகுலின் கட்சி பாராளுமன்ற தேர்தலில் வெறும் 44 இடங்களிலேயே வெற்றி பெற முடிந்தது எனவும் கூறினார்.

இதற்கு காங்கிரஸ் உறுப்பினர்கள் கடும் எதிர்ப்பு தெரிவித்து அமளியில் ஈடுபட்டனர். இதைத்தொடர்ந்து ராகுல் குறித்த கருத்துகளை சபாநாயகர் அவைக்குறிப்பில் இருந்து நீக்கிவிட்டார்.

இதற்கிடையே பகத்சிங் குறித்து பாடப்புத்தகத்தில் கூறப்பட்டுள்ள கருத்துகளுக்கு அவரது உறவினர்களும் அதிருப்தி வெளியிட்டு உள்ளனர். இது குறித்து பகத்சிங்கின் மருமகன் அபய் சிங் சாந்து கூறுகையில், ‘பகத்சிங்கை தூக்கிலிட்ட வெள்ளையர்கள் கூட அவர் ஒரு உண்மையான புரட்சியாளர் என்றே தங்கள் தீர்ப்பில் கூறியுள்ளனர். தீவிரவாதம் போன்ற வார்த்தைகளை கூட அவர்கள் பயன்படுத்தவில்லை. ஆனால் பகத்சிங் விவகாரத்தில் இந்த வார்த்தைகள் தற்போது பயன்படுத்தப்பட்டு இருப்பது துரதிர்ஷ்டவசமானது’ என்றார்.

இந்த விவகாரத்தில் தலையிட்டு தேவையான திருத்தங்களை மேற்கொள்ளுமாறு மத்திய மனிதவள மேம்பாட்டுத்துறை மந்திரி ஸ்மிரிதி இரானிக்கு பகத்சிங்கின் குடும்பத்தினர் கடிதமும் எழுதியுள்ளனர்.
-
தினத்தந்தி