பிச்சை எடுப்பதற்கு பதில் நடனமாடுவது மேல்: சுப்ரீம் கோர்ட் கருத்து

புதுடில்லி
டான்ஸ் பார்கள் நடத்துவதற்கு அனுமதி அளித்து சுப்ரீம் கோர்ட் ஏற்கனவே பிறப்பித்துள்ள உத்தரவு கடும் சர்ச்சையை கிளப்பிய நிலையில், இன்று மீண்டும் டான்ஸ் பார்களுக்கு ஆதரவான கருத்தை சுப்ரீம் கோர்ட் வெளியிட்டுள்ளது. இவ்வழக்கில் கருத்து தெரிவித்துள்ள நீதிபதிகள் பெஞ்ச், தெருக்களில் பிச்சை எடுப்பதை விட நடனமாடி சம்பாதிப்பது மேல் என தெரிவித்துள்ளது.

மகாராஷ்டிராவில் டான்ஸ் பார்கள் நடத்துவதற்கு புதிய கட்டுப்பாடுகளை விதித்தும், புதிய பார்களுக்கு அனுமதி அளிக்க மறுப்பு தெரிவித்தும் அம்மாநில அரசு சட்டசபையில் ஒருமனதாக தீர்மானம் ஒன்றை நிறைவேற்றியது. அரசின் இந்த தீர்மானத்தை எதிர்த்து மகாராஷ்டிர டான்ஸ் பார் உரிமையாளர்கள் சுப்ரீம் கோர்ட்டில் வழக்கு தொடர்ந்தனர். இவ்வழக்கை விசாரித்த நீதிபதிகள் தீபக் மிஸ்ரா, ஷிவ் கிர்தி சிங் ஆகியோர் அடங்கிய பெஞ்ச், டான்ஸ் பார்களுக்கு தடை விதிக்க முடியாது என சமீபத்தில் கூறி இருந்தது.


இந்நிலையில் இன்று நடந்த வழக்கு விசாரணையின் போது, டான்ஸ் பார்களுக்கு எதிராக மகாராஷ்டிர அரசு தாக்கல் செய்த மனுவை சுப்ரீம் கோர்ட் நிராகரித்தது. அப்போது கருத்து தெரிவித்த நீதிபதிகள்,

டான்ஸ் பார்களில் நடனமாடி பெண்கள் சம்பாதிப்பது அரசியலமைப்பு உரிமை. தெருக்களில் இறங்கி பிச்சை எடுப்பதையும், தவறான தொழிலில் ஈடுபடுவதையும் விட நடனமாடி சம்பாதிப்பது மேல். கல்வி நிறுவனங்கள் மற்றும் வழிபாட்டு தலங்களுக்கு ஒரு கி.மீ., சுற்றளவில் டான்ஸ் பார்கள் அமைக்க விதிக்கப்பட்டுள்ள தடை மற்றும் கட்டுப்பாட்டை பட்நாவிஸ் அரசு அகற்ற வேண்டும்.

திருத்தப்பட்ட கட்டுப்பாடுகளை தளர்த்தி, 10 நாட்களுக்குள் டான்ஸ் பார்களுக்கு மும்பை போலீஸ் உரிமம் வழங்க வேண்டும் என தெரிவித்துள்ளது.