108 ஆண்டுகளுக்குப் பின்னர் வேலூரில் 111 டிகிரி வெயில்

--
வேலூரில் ஞாயிற்றுக்கிழமை அதிகபட்சமாக
111 டிகிரி ஃபாரன்ஹீட் வெயில் பதிவானதாக சென்னை
வானிலை ஆய்வு மையம் தெரிவித்துள்ளது. மேலும்,
தமிழகத்தின் வட மாவட்டங்களில், வெப்ப அலையின்
தாக்கம் கடுமையாக இருக்கும் என்றும் தெரிவித்துள்ளது.

வரலாறு காணாத வெயில்: வேலூர் மாவட்டத்தில்
ஞாயிற்றுக்கிழமை அதிகபட்சமாக 111 டிகிரி ஃபாரன்ஹீட்
அளவுக்கு வெப்பம் பதிவாகியது. இதுவரை இல்லாத
அளவுக்கு, ஏப்ரல் மாதத்தில் ஞாயிற்றுக்கிழமை அதிக
பட்சமாக வெப்பம் பதிவானது.

அதாவது, சுமார் 108 ஆண்டுகளுக்குப் பின்னர் 111 டிகிரி
ஃபாரன்ஹீட் வரை வெயில் பதிவாயுள்ளது என்று வானிலை
ஆய்வு மையம் தெரிவித்துள்ளது.

வெப்ப அலை எச்சரிக்கை: ஞாயிற்றுக்கிழமை மாலை
நிலவரப்படி, வேலூர் கரூர் பரமத்தி, திருச்சி, சேலம்,
தருமபுரி உள்பட 11 நகரங்களில் அதிகபட்சமாக
100 டிகிரி ஃபாரன்ஹீட்டுக்கு மேல் வெப்பம் நிலவியது.
இதில் வேலூரில் அதிகபட்சமாக 111 டிகிரி ஃபாரன்ஹீட்
அளவுக்கு வெப்பம் பதிவாகியது.

அடுத்து வரும் நாள்களுக்கு பெரும்பாலான நகரங்களில்
வறண்ட வானிலையும், வெப்ப அலையின் தாக்கமும்
மூன்று நாள்களுக்கு கடுமையாக இருக்கும் என வானிலை
ஆய்வு மையம் தெரிவித்துள்ளது.

காலை 11 மணி முதல் பிற்பகல் 3 மணி வரை...:
தமிழகம், புதுச்சேரியிலும் அதிகாலை முதலே அனல்
காற்றுடன் வெயில் சுட்டெரிக்கிறது. பகல் 11 முதல்
பிற்பகல் 3 மணி வரையிலான நேரங்களில், வெளியில்
நடமாட முடியாத அளவுக்கு அனல் காற்று வீசுகிறது.

கடும் வெப்பத்தால், பொது மக்களும், வாகன ஓட்டிகளும்
பெரிதும் பாதிக்கப்பட்டு வருகின்றனர்.

ஞாயிற்றுக்கிழமை பதிவான வெயில் நிலவரம்

(டிகிரி ஃபாரன்ஹீட்டில்)

வேலூர் 111

கரூர் பரமத்தி 109

தருமபுரி, திருச்சி, மதுரை 108

சேலம் 107

பாளையங்கோட்டை 105

பரங்கிப் பேட்டை,

நாகை, கோவை 102

சென்னை மீனம்பாக்கம் 101

தொண்டி 100

கத்திரி வெயிலுக்கு இணையாக...:

ஆண்டுதோறும் ஏப்ரல், மே, ஜூன் ஆகிய 3 மாதங்கள்
கோடை காலமாகும். இந்த காலகட்டத்தில் சராசரி வெப்பம்
100 டிகிரி ஃபாரன்ஹீட் வரை பதிவாகும்.

கோடை வெயிலின் உச்சமான கத்திரி வெயில் காலத்தில்
(மே முதல் வாரம் முதல்), 105 டிகிரி ஃபாரன்ஹீட் வரை
வெப்பம் நிலவும். ஆனால், நிகழாண்டு மார்ச் மாதம் முதலே
சென்னை, மதுரை, பாளையங்கோட்டை, கரூர் பரமத்தி,
கோவை, சேலம், தருமபுரி உள்ளிட்ட
முக்கிய நகரங்களில் வெப்பத்தின் தாக்கம் கடுமையாக
உள்ளது.

கத்திரி வெயிலுக்கு இணையாக, பல நகரங்களில்
100 டிகிரி ஃபாரன்ஹீட்டுக்கும் அதிகமாக வெயில் பதிவாகி
உள்ளது.

தமிழகம், ஒடிஸா, ஆந்திரம், ராயலசீமா, தெலங்கானா
உள்ளிட்ட பல்வேறு மாநிலங்களில், வெப்பத்துடன் கூடிய
அனல் காற்று வீசி வருகிறது.

இவற்றில் ஓரிரு மாநிலங்களில் வெப்ப அலையின் தாக்கம்
காணப்படுகிறது. இதன் காரணமாக, அதிகபட்சமாக
113 டிகிரி ஃபாரன்ஹீட் வரை வெயில் பதிவாகிறது.
-
-----------------------------
தினமணி