செம்மரக் கன்றுகள் எங்கு கிடைக்கும்?

‘செம்மரக் கன்றுகள் எங்கு கிடைக்கும். அதை வெட்டி, விற்பனை செய்வதற்கு உள்ள நடைமுறைகள் பற்றிச் சொல்லுங்கள்?”

-

-
-பி. சரவணன், புதுக்கோட்டை. தமிழக வனத்துறையின் முன்னாள் வனச்சரகர் சி. சுப்பையா பதில் சொல்கிறார்.

”செம்மரம் 25 ஆண்டுகள் கழித்து, வருமானம் கொடுக்கக்கூடிய மரப்பயிர். தனியார் நர்சரிகளில் ஒரு கன்று 6 ரூபாய் விலையில் விற்பனைக்குக் கிடைக்கின்றன. செம்புறைக்கல் (Laterate Soil) தன்மைகொண்ட நிலத்தில் செம்மரங்கள் நன்றாக வளரும்.

தஞ்சாவூர் மாவட்டத்தில், செங்கிப்பட்டி, (இங்குள்ள மண், செம்மை நிறத்தில் இருப்பதால்தான், இந்த பெயர் வைத்துள்ளார்கள்) மருங்குளம் பகுதிகளிலும்… குறைந்த மழையளவுள்ள புதுக்கோட்டை, சிவகங்கை, ராமநாதபுரம், விருதுநகர், திருநெல்வேலி… மாவட்டங்களிலும் நன்றாக வளர்கின்றன. ஆந்திரா மாநிலத்தில் திருப்பதி வனப்பகுதியான சேஷாசலம் மலைப்பகுதியில்தான் இந்திய அளவில் அதிகமான அளவுக்கு செம்மரங்கள் உள்ளன.

திருப்பதி பகுதியை ஒட்டியுள்ள திருவள்ளூர் மாவட்டத்தில் பள்ளிப்பட்டுப் பகுதியிலும் செம்மரத்தின் வளர்ச்சி சிறப்பாக உள்ளது.



தமிழ்நாட்டில், அரசாங்கத்தின் வெட்டுமர பட்டியலில் (Scheduled Timbers) செம்மரம் இடம்பெற்றுள்ளது. சர்வதேச நாடுகளில் ஒரு டன் செம்மரம், ரூ. 50 லட்சம் முதல் 5 கோடி வரை விலை போகிறது. இந்தியாவில் ரூ. 15 முதல் 20 லட்சம் வரை விற்பனையாகின்றது. இதனால்தான், ‘பல கோடி ரூபாய் பெறுமானமுள்ள செம்மரங்கள் கடத்தல்; கடத்தல்காரர்கள் கைது!’ என்றெல்லாம் அடிக்கடி செய்திகள் வருகின்றன.

பட்டியல் மரங்களான செம்மரம், சந்தனம், தேக்கு, தோதகத்தி இனங்களை ஒரு நபர் 5 கிலோவுக்கு மேல், வனத்துறையின் அனுமதியின்றி கையிருப்பு வைத்திருக்கக் கூடாது என 1988-ம் ஆண்டு சட்ட விதி கூறுகின்றது. வனத்துறையின் முத்திரையின்றி (Distinguishable Mark) இந்த 4 வகை மரங்களையும் கையிருப்பும் வைத்திருக்கக் கூடாது.

விவசாய நிலத்தில் செம்மரங்களை வளர்க்கும்போது, கிராம நிர்வாக அலு வலரிடம், சிட்டா அடங்கலில் செம்மரம் சாகுபடி செய்யப்பட்டுள்ளது என்று பதிவு செய்யவேண்டும். இப்படி செய்தால்தான், அறுவடை செய்யும்போது, வனத்துறையில் எளிதாக அனுமதி பெற்று விற்பனை செய்ய முடியும்.”

நன்றி- பசுமை விகடன்