ரோஹித், போலார்ட் அதிரடி; மும்பைக்கு 2-ஆவது வெற்றி

ஐபிஎல் கிரிக்கெட் போட்டியின் 14-ஆவது லீக் ஆட்டத்தில்
6 விக்கெட் வித்தியாசத்தில் பெங்களூர் ராயல் சேலஞ்சர்ஸ்
அணியைத் தோற்கடித்தது மும்பை இண்டியன்ஸ்.

இதுவரை 5 ஆட்டங்களில் விளையாடியுள்ள மும்பை அணி
2-ஆவது வெற்றியைப் பதிவு செய்துள்ளது.

மும்பையில் புதன்கிழமை நடைபெற்ற இந்த ஆட்டத்தில்
பெங்களூர் அணியில் 5 மாற்றங்கள் செய்யப்பட்டிருந்தன.
முன்னணி தொடக்க வீரரான கிறிஸ் கெயிலின் மனைவிக்கு
ஆண் குழந்தை பிறந்திருப்பதால் அவர் விடுப்பில் சென்று
விட்டார். அவருக்குப் பதிலாக டிராவிஸ் ஹெட் சேர்க்கப்பட்டார்.

டாஸ் வென்ற மும்பை கேப்டன் ரோஹித் சர்மா பீல்டிங்கை
தேர்வு செய்தார். இதையடுத்து பேட் செய்த பெங்களூர் அணியில்
கேப்டன் விராட் கோலியும், லோகேஷ் ராகுலும் தொடக்க
வீரர்களாக களமிறங்கினர். இந்த ஜோடி முதல் விக்கெட்டுக்கு
3.5 ஓவர்களில் 32 ரன்கள் சேர்த்தது.

மெக்ளெனகன் வீசிய 4-ஆவது ஓவரின் முதல் பந்தில் கோலி
ஒரு ரன் எடுக்க, அடுத்த 3 பந்துகளில் 2 சிக்ஸர்களையும்,
ஒரு பவுண்டரியையும் பறக்கவிட்ட லோகேஷ், அதற்கடுத்த
பந்தில் ஹர்பஜன் சிங்கிடம் கேட்ச் ஆனார்.
அவர் 14 பந்துகளில் 23 ரன்கள் எடுத்தார்.

இதையடுத்து டிவில்லியர்ஸ் களம்புகுந்தார்.
கோலி-டிவில்லியர்ஸ் ஜோடி வேகமாக ரன் சேர்க்க,
10 ஓவர்களில் 89 ரன்கள் குவித்தது பெங்களூர். 11-ஆவது ஓவரை
வீசிய கிருனால் பாண்டியா 2-ஆவது பந்தில் கோலியையும்,
கடைசிப் பந்தில் டிவில்லியர்ûஸயும் வீழ்த்தினார். கோலி
30 பந்துகளில் 3 பவுண்டரிகளுடன் 33 ரன்களும், டிவில்லியர்ஸ்
21 பந்துகளில் 1 சிக்ஸர், 3 பவுண்டரிகளுடன் 29 ரன்களும் எடுத்தனர்.

பின்னர் வந்த வாட்சன் 5 ரன்களில் ஆட்டமிழக்க, டிராவிஸ்
ஹெட்டுடன் இணைந்தார் சர்ஃப்ராஸ் கான். இந்த ஜோடி,
மெக்ளெனகன் வீசிய 18-ஆவது ஓவரை பதம்பார்த்தது. முதல்
பந்தில் சர்ஃப்ராஸ் கான் பவுண்டரி அடிக்க, 3-ஆவது பந்தில் டிராவிஸ்
ஹெட் விளாசிய சிக்ஸர் மைதானத்தின் மேற்கூரைக்கு பறந்தது.
5-ஆவது பந்தில் சர்ஃப்ராஸ் கான் சிக்ஸரை விளாச, அந்த ஓவரில்
18 ரன்கள் கிடைத்தன.

பூம்ரா வீசிய கடைசி ஓவரில் டிராவிஸ் ஹெட் ரன் அவுட்டானார்.
அவர் 24 பந்துகளில் 2 சிக்ஸர், 4 பவுண்டரிகளுடன் 37 ரன்கள்
எடுத்தார். அந்த ஓவரின் 3-ஆவது பந்தில் சிக்ஸரை விளாசிய
சர்ஃப்ராஸ் கான், அடுத்த பந்தில் ஆட்டமிழந்தார். அவர் 18 பந்துகளில்
2 சிக்ஸர், 2 பவுண்டரிகளுடன் 28 ரன்கள் எடுத்தார். இறுதியில்
20 ஓவர்களில் 7 விக்கெட் இழப்புக்கு 170 ரன்கள் குவித்தது பெங்களூர்.

ரோஹித் 62: பின்னர் ஆடிய மும்பை அணியில் பார்த்தீவ் படேல்
5 ரன்களில் வெளியேற, ரோஹித் சர்மாவுடன் இணைந்தார் அம்பட்டி
ராயுடு. இதன்பிறகு அதிரடியில் இறங்கிய ரோஹித் சர்மா, வருண்
ஆரோன் பந்துவீச்சில் ஒரு சிக்ஸரையும், ஒரு பவுண்டரியையும்
விரட்ட, 5 ஓவர்களில் 43 ரன்களை எட்டியது மும்பை.

ரோஹித்-ராயுடு ஜோடி தொடர்ந்து வேகம் காட்ட 10 ஓவர்களில்
81 ரன்களை எட்டியது மும்பை. இக்பால் அப்துல்லா வீசிய 11-ஆவது
ஓவரில் ராயுடு ஆட்டமிழந்தார். அவர் 23 பந்துகளில் 5 பவுண்டரிகளுடன்
31 ரன்கள் எடுத்தார். இந்த ஜோடி 2-ஆவது விக்கெட்டுக்கு 76 ரன்கள்
சேர்த்தது.

இதையடுத்து ஜோஸ் பட்லர் களமிறங்க, 38 பந்துகளில் அரை சதம்
கண்டார் ரோஹித். இது அவருடைய 27-ஆவது அரை சதமாகும்.
இக்பால் வீசிய 13-ஆவது ஓவரில் ஒரு சிக்ஸர், ஒரு பவுண்டரியை
விளாசிய ரோஹித், மற்றொரு சிக்ஸரை விளாச முயன்றபோது
டிவில்லியர்ஸிடம் கேட்ச் ஆனார். அவர் 44 பந்துகளில் 3 சிக்ஸர்,
4 பவுண்டரிகளுடன் 62 ரன்கள் குவித்தார்.

போலார்ட் 40*: இதையடுத்து போலார்ட் களமிறங்க, ஜோஸ் பட்லர்
14 பந்துகளில் 2 சிக்ஸர், 2 பவுண்டரிகளுடன் 28 ரன்கள் எடுத்து
ஆட்டமிழந்தார். அவரைத் தொடர்ந்து ஹார்திக் பாண்டியா களமிறங்க,
மறுமுனையில் போலார்ட் ருத்ரதாண்டவம் ஆடினார். ரிச்சர்ட்ஸன்
வீசிய 17-ஆவது ஓவரில் இரு சிக்ஸர்களை விரட்டிய போலார்ட்,
வாட்சன் வீசிய அடுத்த ஓவரில் ஒரு சிக்ஸர், இரு பவுண்டரிகளை
விரட்டி ஆட்டத்தை முடிவுக்கு கொண்டு வந்தார்.

இதனால் 18 ஓவர்களில் 4 விக்கெட் இழப்புக்கு 171 ரன்கள் எடுத்து
வெற்றி கண்டது மும்பை.

போலார்ட் 19 பந்துகளில் 3 சிக்ஸர், 4 பவுண்டரிகளுடன் 40,
பாண்டியா 2 ரன்களுடன் ஆட்டமிழக்காமல் இருந்தனர்.
-

----------
சுருக்கமான ஸ்கோர்
பெங்களூர்-170/7
டிராவிஸ் ஹெட் 37 (24)
கோலி 33 (30)
டிவில்லியர்ஸ் 29 (21)
சர்ஃப்ராஸ் கான் 28 (18)
பூம்ரா 3வி/31
கிருனால் பாண்டியா 2வி/27
மும்பை - 171/4
ரோஹித் சர்மா 62 (44)
போலார்ட் 40* (19)
அம்பட்டி ராயுடு 31 (23)
அப்துல்லா 3வி/40