அனல் காற்றுக்கு எதிர்ச் சூறாவளியே காரணம்

**ayyasamy ram** · **ayyasamy ram** Tue Apr 19, 2016 7:53 am

வங்காள விரிகுடாவில் வீசும் எதிர்ச் சூறாவளியோடு,
மத்திய இந்தியாவின் அதிக வெப்பநிலையும்
இணைந்துள்ளதன் காரணமாகவே, நாட்டின் கிழக்குப்
பகுதிகளில் அனல் காற்று வீசி வருவதாக, வானிலை
ஆய்வு மையம் தெரிவித்துள்ளது.

இதுகுறித்து இந்திய வானிலை ஆய்வு மையத்தின்
பொது இயக்குநர் லட்சுமண் சிங் ராத்தோர், திங்கள்
கிழமை தெரிவித்ததாவது:

வழக்கமாக, ஏப்ரல், மே மாதங்களில் மத்திய
இந்தியாவில் வெயிலடிக்கத் தொடங்கும். அதே
போல், மேற்கு இந்தியாவிலும் வெயிலடிக்கும்.
இதையடுத்து, கிழக்கு இந்தியாவிலும் வெயில் பரவும்.

தற்போது, வளிமண்டலத்தில் உயர்நிலை காற்றழுத்தம்
காரணமாக, வங்காள விரிகுடாவில் எதிர்ச் சூறாவளி
வீசுகிறது. கடலில் இருந்து வீசும் குளிர்காற்றை இந்த
எதிர்ச் சூறாவளி தடுத்து விடுவதாலேயே, அனல்
காற்று வீசுகிறது.

தெலங்கானா, ஆந்திரப் பிரதேசம், தமிழ்நாடு, ஒடிஸா
உள்பட நாட்டின் கிழக்குப் பகுதிகளில் உள்ள
பெரும்பாலான இடங்களில், அனல் காற்று வீசி வருகிறது.

நாட்டிலேயே அதிகபட்சமாக, ஒடிஸாவின் திதல்கர்
பகுதியில் 46.3 டிகிரி செல்சியஸ் வெப்பநிலை ஞாயிற்றுக்
கிழமை பதிவானது.

ஹிமாசலப் பிரதேசம், பஞ்சாப், ஜார்க்கண்ட் ஆகிய
மாநிலங்களில் உள்ள ஓரிரு பகுதிகளிலும், மேற்கு
வங்கம், ஹரியாணா, தில்லி, சத்தீஸ்கர் ஆகிய
மாநிலங்களில் ஆங்காங்கே சில இடங்களிலும் அனல்
காற்று வீசி வருகிறது.

எனினும், அருணாசலப் பிரதேசம், அஸ்ஸாம், மேகாலயம்
உள்ளிட்ட வடகிழக்கு மாநிலங்களில் உள்ள சில
பகுதிகளில் செவ்வாய்க்கிழமை பலத்த மழை பெய்யும்
வாய்ப்புள்ளது என்று லட்சுமண் சிங் ராத்தோர் தெரிவித்தார்.

ஒடிஸாவின் சோனேபூரில் 46 டிகிரி செல்சியஸ் வெப்ப
நிலையும், உத்தரப் பிரதேசத்தின் சுர்க் நகரில் 4.6 டிகிரி
செல்சியஸ் வெப்பநிலையும், மகாராஷ்டிரத்தின் வார்தாவில்
44 டிகிரி செல்சியஸ் வெப்பநிலையும் பதிவானதாகத்
தகவல்கள் தெரிவிக்கின்றன.

இதனிடையே, ஒடிஸாவில் வெப்பத்தாக்கத்தால்
பாதிக்கப்பட்டு 45 பேர் உயிரிழந்ததாகத் தகவல்கள்
வெளியாகியுள்ளன. எனினும், அதில் 12 பேரின்
சடலங்களை மருத்துவர்கள் பரிசோதித்ததில் அவர்கள்
வெயில் காரணமாக இறக்கவில்லை
என்று தெரியவந்ததாக சிறப்பு நிவாரண ஆணையர்
பி.கே.மொஹபத்ரா தெரிவித்தார்.
-
------------------------------------
தினமணி

**krishnaamma** · **krishnaamma** Tue Apr 19, 2016 9:47 am

தற்போது, வளிமண்டலத்தில் உயர்நிலை காற்றழுத்தம்
காரணமாக, வங்காள விரிகுடாவில் எதிர்ச் சூறாவளி
வீசுகிறது. கடலில் இருந்து வீசும் குளிர்காற்றை இந்த
எதிர்ச் சூறாவளி தடுத்து விடுவதாலேயே, அனல்
காற்று வீசுகிறது.

ஆம்மாம் பேபரில் பார்த்தாலே வியர்க்கிறது சோகம்