கிரிக்கெட் முக்கியமா; மக்கள் முக்கியமா? மும்பை ஐகோர்ட் விளாசல்

மும்பை: ''மஹாராஷ்டிர மாநிலத்தில், தண்ணீர் பற்றாக்குறை நிலவிவரும் நிலையில், ஐ.பி.எல்., கிரிக்கெட் போட்டிகளுக்காக, மைதானங்களை தயார் செய்ய தண்ணீரை வீணடிக்கலாமா,'' என, மும்பை ஐகோர்ட் கண்டனம் தெரிவித்துள்ளது.

பா.ஜ.,வைச் சேர்ந்த, முதல்வர் தேவேந்திர பட்நாவிஸ் தலைமையிலான, பா.ஜ., - சிவசேனா கூட்டணி ஆட்சி, மஹாராஷ்டிராவில் நடக்கிறது. மாநிலத்தின் பல்வேறு பகுதிகளில், தண்ணீர் பற்றாக்குறை நிலவி வருகிறது. பல்வேறு அணைகள் வறண்டுள்ளதால், குறிப்பாக, மராத்தா பிராந்தியத்தில், கடும் தண்ணீர் பற்றாக்குறை நிலவி வருகிறது.

இந்நிலையில், 9வது ஐ.பி.எல்., கிரிக்கெட் போட்டிகள், ஏப்., 9ம் தேதி முதல், மே 29ம் தேதி வரை நடைபெற உள்ளன. இதில் மஹாராஷ்டிர மாநிலத்தில், மும்பை, புனே,நாக்பூரில் உள்ள மைதானங்களில் மட்டும், 19 போட்டிகள் நடக்கின்றன. ''இந்த போட்டிகளுக்கு, மைதானத்தை தயார் செய்ய, 60 லட்சம் லிட்டர் தண்ணீர் தேவை. மாநிலத்தில் தண்ணீர் பற்றாக்குறை உள்ள நிலையில், தண்ணீரை வீணடிப்பதை நிறுத்த உத்தரவிட வேண்டும்,'' என, பொதுநல வழக்கு, மும்பை ஐகோர்ட்டில் தாக்கல் செய்யப்பட்டு உள்ளது.

இதை விசாரணைக்கு ஏற்ற மும்பை ஐகோர்ட், இதுகுறித்து நேற்று கூறியதாவது:ஐ.பி.எல்., கிரிக்கெட்போட்டிகளைவிட, மக்களுக்கு தண்ணீர் வினியோகிப்பதே முக்கியம். மக்களுக்கு தண்ணீர் பற்றாக்குறை உள்ள நிலையில், இந்த போட்டிகளை, தண்ணீர் பற்றாக்குறை இல்லாத மாநிலங்களுக்கு, ஏன் மாற்றக் கூடாது? மைதான பராமரிப்புக்காக தண்ணீரை பயன்படுத்துவதை, 'கிரிமினல் வேஸ்ட்' என, அழைக்கலாம்.

இந்திய கிரிக்கெட் கட்டுப்பாடு வாரியம் மற்றும் மும்பை கிரிக்கெட் சங்கத்துக்கு, தண்ணீரை நிறுத்தினால்தான், உண்மை நிலவரம் அவர்களுக்கு தெரியவரும்; அவர்கள் ஏன் இவ்வளவு அலட்சியமாக உள்ளனர்.தண்ணீர் தட்டுப்பாட்டை சமாளிக்க எடுக்கப்பட்டுள்ள நடவடிக்கைகள் குறித்து, மஹாராஷ்டிர அரசு, அறிக்கையை தாக்கல் செய்ய வேண்டும். இவ்வாறு ஐகோர்ட் கூறியது. விசாரணை, இன்றும் தொடர்ந்து நடக்கிறது.

நன்றி தினமலர்

நல்ல பதிவு
ஆமாம் ,மக்கள் தேவைக்கு மிஞ்சிதான் , விளையாட்டிற்கு .
IPL விளையாடாவிட்டால் குடியா முழுகிவிடும் ?
திருந்துங்கள் BCCI
வியாபாரம் எல்லா இடத்திலும் பணம் பணம் .

ரமணியன்