உதவிச் 'செவி' நீட்டும் சினேகா!

-

தற்கொலைத் தடுப்புக்கு உதவிச் 'செவி' நீட்டுவது
சிநேகா
ஆம். தொலைபேசியில் விவரங்களைக் கேட்டு,
தற்கொலை எண்ணத்தையே மாற்றும் சக்தி
பெற்றவர்கள் 'சிநேகா' தொண்டர்கள்.

தன்னார்வத் தொண்டர்கள் ஐம்பது பேர்
பணியாற்றுகிறார்கள். இவர்கள் தான் இந்த அமைப்பின்
முதுகெலும்பு.முப்பது ஆண்டுகளாகச் செயல்படும்
'சிநேகா' பற்றி பணியாற்றும் இளங்கோவிடம் பேசியபோது,
-
இந்தப் பணியில் எத்தனை பேர் ஈடுபட்டு இருக்கிறீர்கள்?
-
50 பேர் ஈடுபட்டு இருக்கிறோம். இது சமூக சேவை தான்.
நாங்களும் மற்றவர்கள் போல் ஏதாவது பணி செய்து தான்
சம்பாதிக்கிறோம். இந்தச் சமூகப் பணி பற்றி வெளியே
சொல்லிக் கொள்வதில்லை.

எங்களது புகைப்படஙகளையும் நாங்க வெளியிடுவதில்லை.
21 வயதுக்கு மேல் இருந்து, நீங்கள் சென்னையில்
வசிப்பவராக இருந்து, தமிழ், ஆங்கிலம் பேச தெரிந்தவராக
இருந்தால், நீங்களும் தன்னார்வலர்களாகப் பணியாற்றலாம்.

பிரபல மன நல மருத்துவர்கள், முதியோர் நல மருத்துவர்கள்,
பல துறைகளைச் சார்ந்த வல்லுநர்கள் எங்களுக்கு வகுப்பு
எடுப்பார்கள். பல கருத்தரங்குகள் மூலமாக தற்கொலையைத்
தடுப்பது எப்படி என்பதைத் தெரிந்து கொண்ட பின்பு தான்
மற்றவரகளைக் காப்பாற்றுகிறோம்.

இதுவரை உங்களால் காப்பாற்றப்பட்டவர்கள் எத்தனை பேர்?

24 மணி நேரம் இயங்கும் தொலைபேசி மூலமாகத் தொடர்பு
கொண்டு பேசுபவர்களும் இருக்கிறார்கள். எங்களது
அலுவலகத்துக்கு நேரடியாக வருபவர்களும் உண்டு. பிரச்னை
என்று தொடர்பு கொண்டு பேசுபவர்ரகளைப் பற்றிய
விவரங்களை நாங்கள் கேட்க மாட்டோம்.

அவர்களின் பிரச்னை என்ன என்பதை புரிந்து கொண்ட பிறகு
அதற்குத் தீர்வை எட்ட முயற்சிப்போம். குறிப்பாக,
பேசுபவர்களின் ரகசியங்கள் அப்படியே பாதுகாக்கப்படும்.

திரைத்துறையைச் சேர்ந்த பிரபலங்கள், உயர் அந்தஸ்தில்
இருப்பவர்கள் என பலரும் தொடர்பு கொண்டு பேசுவார்கள்.
தேர்வு நேரங்களில் பல மாணவர்கள் பேசுவார்கள்.
ஆனால் அவர்கள் யார் என்பதை நாங்கள் கேட்பதில்லை.
அவர்களும் சொல்வதில்லை. இப்படியாக இதுவரை மூன்று
லட்சம் பேரை நாங்கள் தற்கொலையிலிருந்து காப்பாற்றி
இருக்கிறோம்.

உங்கள் பணி என்பது தமிழகத்தில் மட்டும் தான்?

தமிழ்நாட்டின் பல பகுதிகளிலிருந்து 70 சதவிகிதம் பேர்
தொடர்பு கொள்ளுகிறார்கள். பாக்கி 30 சதவிகிதம் மற்ற
மாநிலங்களிலிருந்து பேசுகிறார்கள். நாங்கள் எங்களது
பணியை விரிவுபடுத்தியதன் காரணமாக 3 ஆண்டுகளில்
7 பேர் மட்டுமே தற்கொலைக்கு ஆளாகி இருக்கிறார்கள்.
இந்த எண்ணிக்கையும் வரும் ஆண்டுகளில் குறையும்.

சாதனையாகக் கருதுவது என்ன?

அரசுடன் சேர்ந்து பல்வேறு சமூகப் பணிகளைச் செய்து
வருகிறோம். குறிப்பாக கோட்டூர்புரம் மேம்பாலத்திலிருந்த
தற்கொலை செய்பவர்கள் அதிகம். இதனைத் தடுக்க
மாநகராட்சியுடன் இணைந்து அந்தப் பாலத்தில் 2 அடி
உயரமுள்ள சுவரை உருவாக்கினோம். மற்றவர்களிடம்
பெறும் நிதியில் தான் சிநேகா இயங்குகிறது.

இந்த நிதியிலிருந்து சிறு கிராமங்களைச் சேர்ந்த
விவசாயிகளுக்கு என்ன உதவி வேண்டுமோ அதனைச்
செய்து கொடுக்கிறோம்.
-
----------------------------------
- விஷ்ணுப்ரியா
கல்கி

இப்படியாக இதுவரை மூன்று
லட்சம் பேரை நாங்கள் தற்கொலையிலிருந்து காப்பாற்றி
இருக்கிறோம்.

அற்புதமான தொண்டு !..............வாழ்த்துகள்!!