ரசிகர்கள் பாலாபிஷேகம்: விளக்கம் கேட்டு ரஜினிக்கு பெங்களூரு நீதிமன்றம் நோட்டீஸ்

-

நடிகர் ரஜினிகாந்த் நடித்த திரைப்படங்கள்
வெளியாகும்போது, பெங்களூரில் அவரது உருவப்
படத்துக்கு ரசிகர்கள் பாலாபிஷேகம் செய்வதன்
மூலம் லட்சக்கணக்கான லிட்டர் பால் வீணடிக்கப்
படுகிறது.

இதைத் தடுக்கக் கோரி, சமூக ஆர்வலர் தொடுத்த
வழக்கில், விளக்கம் கேட்டு நடிகர் ரஜினிகாந்துக்கு
பெங்களூரு சிட்டி சிவில் நீதிமன்றம் நோட்டீஸ்
அனுப்பியுள்ளது.

பெங்களூரு சிட்டி சிவில் நீதிமன்றத்தில் கடந்த
26-ஆம் தேதி பெங்களூரைச் சேர்ந்த சமூக ஆர்வலர்
ஐ.எம்.எஸ்.மணிவண்ணன் தாக்கல் செய்த மனுவில்,
இந்தியாவின் முன்னணி திரை நட்சத்திரமாக
விளங்கும் நடிகர் ரஜினிகாந்த் பத்மவிபூஷண் விருது
பெற்றவர்.

இந்த நிலையில், அவர் நடித்துள்ள திரைப்படம்
வெளியாகும்போது, அவரது உருவப் படத்துக்கு
ரசிகர்கள் பாலாபிஷேகம் செய்வதை வழக்கமாகக்
கொண்டுள்ளனர். இதனால், லட்சக்கணக்கான லிட்டர்
பால் வீணடிக்கப்படுகிறது.

120 கோடி பேர் வசிக்கும் இந்தியாவில் 30 சதத்துக்கு
மேற்பட்டோர் இன்னும் ஏழ்மையில் வாழ்ந்து
வருகின்றனர். ஊட்டச்சத்து குறைபாடு காரணமாக
கர்நாடகத்தில் 5 ஆயிரம் சிசுக்கள், 500 தாய்மார்கள்
இறந்துள்ளதாக அண்மையில் மாநில அரசு வெளியிட்ட
அறிக்கையில் தெரிவிக்கப்பட்டுள்ளது.

இதனால், தனது உருவப் படத்துக்கு ரசிகர்கள்
பாலாபிஷேகம் செய்வதை நிறுத்த வேண்டும் என்று
ரஜினிகாந்துக்கு வேண்டுகோள் விடுக்க நீதிமன்றம்
உத்தரவிட வேண்டும்.

மேலும், நடிகர்களின் உருவப் படங்களுக்கு பாலாபிஷேகம்
செய்வதற்கு நிரந்தரமாக தடை விதிக்க வேண்டும்.

மேலும், வீணடிக்கப்படும் பாலை ஏழைகள், ஆதரவற்றோர்,
முதியோருக்கு விநியோகிக்கவும் நீதிமன்றம் வழிகாட்டுதல்
வழங்க வேண்டும். பாலாபிஷேகம் செய்வதைத் தடுக்க
நடிகர் ரஜினிகாந்த் முன்வந்தால், அது நாடெங்கும் உள்ள
நடிகர்களுக்கு முன்னுதாரணமாக அமையும்.

இதற்கு தகுந்த உத்தரவை நீதிமன்றம் பிறப்பிக்குமாறு
மனுவில் அவர் கோரியுள்ளார்.

இதை விசாரணைக்கு எடுத்துக் கொண்ட சிட்டி சிவில்
நீதிமன்ற நீதிபதி பி.எஸ்.ரேகா, இதுகுறித்து விளக்கம்
அளிக்குமாறு நடிகர் ரஜினிகாந்த்துக்கு அவசர நோட்டீஸ்
அனுப்புமாறு உத்தரவிட்டார்.

மேலும், இந்த மனு மீதான விசாரணையை ஏப்ரல்
11-ஆம் தேதிக்கு ஒத்திவைத்து உத்தரவிட்டார்.
-
-----------------------
தினமணி

பாம்பு புற்றுக்கு பால் ஊற்றுகிறார்கள் . பாம்புகள் பால் குடிப்பதில்லை . ஆனாலும் பால் ஊற்றுகிறார்கள் ; இதனால் லட்சக் கணக்கான லிட்டர் பால் வீணடிக்கப்படுகிறது . இதை எதிர்த்து நீதிமன்றங்களுக்கு நாம் செல்லமுடியாது .

"மத நம்பிக்கைகளில் நீதிமன்றம் தலையிட முடியாது " என்று ஒரு வரியில் சொல்லி வழக்கைத் தள்ளுபடி செய்துவிடுவார்கள் .

பிரேமலதா , அதிமுக ஆட்சியில் ஆயிரக்கணக்கான லிட்டர் பால்களை வீணடித்தார்  என்று குறை கண்டார் . விஜயகாந்த் /ரஜினி/கமல் போன்ற  ரசிகர்கள் வீணடிக்கும் பாலைப் பற்றி கவலை பட்டதாக தெரியவில்லையே !    

ரமணியன்