சின்னகவுண்டர் படத்தில் பம்பரம் சுத்தி விளையாடுவது போல் அல்ல அரசியல்:

சின்னகவுண்டர் படத்தில் குழந்தைகளோடு பம்பரம் சுத்தி விளையாடுவது போல் அல்ல அரசியல் என்று விஜயகாந்துக்கு, நடிகர் ராமராஜன் எச்சரிக்கை விடுத்துள்ளார். மதுரை மாவட்டம் திருப்பரங்குன்றத்தில் அதிமுக சாதனை விளக்க கூட்டம் நடைபெற்றது.

இதில் நடிகர்கள் வையாபுரி மற்றும் ராமராஜன் கலந்து கொண்டு பேசினர். நடிகர் ராமராஜன் பேசும்போது சின்னகவுண்டர் படத்தில் குழந்தைகளோடு பம்பரம் சுத்தி விளையாடுவதை போல் விஜயகாந்த் அரசியலை பார்ப்பதாக கூறினார்.

மேலும் தேமுதிக தலைவர் விஜயகாந்த் பேசுவதே புரியாது அவரெல்லாம் முதல்வர் பதவிக்கு ஆசைப்படுகிறார். கடந்த மக்களவைத் தேர்தலில் வெற்றி பெற்றதைப்போல சட்டப் பேரவைத் தேர்தலிலும் அதிமுக 234 தொகுதிகளிலும் அமோக வெற்றி பெறும். தமிழக முதல்வர் தமிழகத்தை மின் மிகை மாநிலமாக கொண்டு வந்ததோடு மட்டுமல்லாமல், முல்லை பெரியாறு அணையில் 142 அடிக்கு தண்ணீர் தேக்க வைத்தவர். அதன்மூலம் 5 மாவட்ட விவசாயிகள் பயன்பெறுகின்றனர்.

காமராஜர், எம்ஜிஆர் போன்றவர்கள் தொடர்ந்து ஆட்சிக்கு வந்ததாலேயே பல திட்டங்களை அவர்களால் நிறைவேற்ற முடிந்தது. அதிமுகவுக்கு மீண்டும் ஒரு வாய்ப்பு தரும்பட்சத்தில் தொழில்வளர்ச்சியில் இந்தியாவில் முதல் மாநிலமாக தமிழகத்தை முதல்வர் கொண்டுவருவார்.

மதுக்கடைகளை மூடுவோம் என திமுக கூறுவதை மக்கள் நம்பவில்லை என்றார். இக்கூட்டத்தில் திரைப்பட நடிகர் வையாபுரி, சட்டப்பேரவை உறுப்பினர்கள் தமிழரசன், கருப்பையா, மாவட்ட ஊராட்சி தலைவர் தர்மராஜ் உள்ளிட்ட பலர் பங்கேற்றனர்.
-
தினமணி