ஐந்து கிராமத்தினர் கொண்டாடும் ஒரு திருவிழா

ஐந்தூர் முத்தாலம்மன் என்று சொன்னால் நிலக்கோட்டை வட்டாரத்திலுள்ள அனைவருக்கும் தெரியுமளவிற்கு பிரபலமானது. கொடைரோட்டில் உள்ள ஐந்து கிராமங்களை சேர்ந்த மக்கள் ஒற்றுமையுடன் கொண்டாடும் விழா ஆகும்.
வரலாறு :
முற்காலத்தில் ஒரு தாய் தன் நான்கு பெண்பிள்ளைகளுடன் கொடைரோடு அருகில் உள்ள நரியூத்து எனும் கிராமத்திற்கு பஞ்சம் பிழைக்க வந்தார்.அவர்கள் நரியூத்திலேயே தங்கி கிடைத்த வேலைகளை செய்து வாழ்ந்தனர்.நரியூத்தை சேர்ந்த வாலிபர்கள் சிலர் அந்த பெண்களிடம் தவறாக நடக்க முயன்றனர்.அதற்கு அவர்கள் இணங்க மறுத்ததன் காரணமாக அந்த தாயும் நான்கு பிள்ளைகளும் வீட்டோடு வைத்து கொளுத்தப்பட்டனர்.கோபம் குறையாத ஐந்து பேரும் நரியூத்தை சேர்ந்த ஒருவர் கனவிலே வந்து தங்களை முத்தாலம்மனாக திருவிழா எடுக்கும்படி கூறினர்.அதை நிறைவேற்றும் பொருட்டு நரியூத்து மற்றும் பக்கத்து கிராமங்களான புதுப்பட்டி, மாவுத்தன்பட்டி, பாலம்பட்டி மற்றும் உச்சணம்பட்டி ஆகிய ஐந்து கிராமத்தினரும் ஒரு கிராமத்திற்கு ஒரு முத்தாலம்மன் என பிரித்துகொண்டு காலம்காலமாக கொண்டாடி வருகின்றனர்.
கொண்டாடும் விதம் :

இரண்டு வருடங்களுக்கு ஒருமுறை பங்குனி மாதத்தில் கொண்டாடப்படுகிறது.முதல் நாள் இரவில் அனைத்து கிராமத்தினரும் நரியூத்து சென்று அவரவர் கிராமத்து சிலைகளை தத்தம் கிராமக் கோவிலுக்கு கொண்டு வருவர்.இரண்டாம் நாள் அதிகாலையில் மாவிளக்கு எடுப்பர்.மாலையில் பொங்கலிட்டு தீச்சட்டி எடுப்பர்.மூன்றாம் நாள் மாலையில் ஐந்து முத்தாலம்மன்களும் சந்திக்கும் நிகழ்வு நடைபெறும்.இந்த நிகழ்வை காணவே பக்தர்கள் காத்துகிடப்பர்.ஒரு பொட்டல் காட்டில் முதலில் நரியூத்து,புதுப்பட்டி கிராமங்களை சேர்ந்த அம்மன்கள் வருவர்.அவர்கள் இருவரும் ஒருவரையொருவர் நலம் விசாரித்து ஆன்ந்தமாய் நடனமாடுவர்.பின் மற்ற மூன்று கிராமத்தை சேர்ந்த அம்மன்களும் ஒவ்வொருவராய் சந்தித்து நலம் விசாரித்து அன்பை பரிமாறிக் கொள்வர்.இந்த உணர்ச்சிகரமான நிகழ்வை காணும் பக்தர்கள் தங்களை அறியாமல் ஆனந்த கண்ணீர் வடிப்பார்கள்.ஐந்து அம்மன்களும் சந்திக்கும் வேளையில் பக்தர்கள் வாழைபழம்,சேவல்,உப்பு,ஆமணக்கு,பணம் ஆகியவற்றை சூறை விடுவர். இந்த விழா இன்னும் ஒற்றுமையுடன் கொண்டாடப்பட்டு வருகிறது.