கவிதைகள் - ஸர்மிளா ஸெய்யித்

**ayyasamy ram** · **ayyasamy ram** Mon Mar 28, 2016 10:12 am

பெறுமதியான ஒன்றுக்காகவன்றி…
-

பெறுமதியான ஒன்றுக்காகவன்றி
அழுதிருக்கமாட்டான்
கண்ணீர் சிந்திப் பரிச்சயமற்ற அவனது கண்களே
வியப்புறும் நிகழ்வு அது

ஆம், அவன் அழுதான்
அழுகிறவனைப் பொருட்படுத்தாதவர்
குறித்துப் பொருட்படுத்தாது
அவன் அழுதான்.

அவன் அழுகைக்குப் பொருளிருக்கும்
பெறுமதியான ஒன்றுக்காகவன்றி அழுதிருக்கமாட்டான்.
அவன் அழுகிறவனோ விழுகிறவனோ இல்லை

அவன் அழுதான்.
விலா எலும்புகள் தெறிக்கும்படியாக விம்மினான்
இவன் நெஞ்சு இன்னும் வெடிக்கலையா என
வியப்புறும்படி ஓலமிட்டான்
ஊரையே மூழ்கடிக்கும் அலைகளைக்கொண்டு வருபவனாகக்
கண்ணீரைச் சொரிந்தான்.
முகத்தை ஓங்கி அறைந்ததில் ஒதிய மரத்தின் அடி தகர்ந்தது
அணில்கள் சத்தமின்றிக் கிளைதாவி எங்கோ ஓடி ஒளிந்தன

ஆம், அழுதான்
அவன் அழுகைக்குப் பொருளிருக்கும்
பெறுமதியான ஒன்றுக்காகவன்றி அழுதிருக்கமாட்டான்.
–
——————————-

ஸர்மிளா ஸெய்யித்
நன்றி-காலச்சுவடு

**ayyasamy ram** · **ayyasamy ram** Mon Mar 28, 2016 10:12 am

அவள் செல்லட்டும் விடுங்கள்
–
அவள் செல்லட்டும்
விடுங்கள்
நீருக்குள் வசிப்பவளாகச் செல்லட்டும்
காற்றோடு கரைந்துபோகட்டும்
இரவின் தடித்த இருளில் கலந்தோ
நிலவின் புலப்படாத புன்னகையாகவோ,
அவள் செல்லட்டும்,
விடுங்கள்.

ஆலைச்சக்கரங்களில் அகப்பட்ட கரும்பாக
பிழியப்படுகின்ற ஆன்மா
அழிந்துபோகும் முன்
அவள் செல்லட்டும்
அவளது வாதை,
இந்தப் பூமியைச் சுருட்டி வீசக்கூடியது
அவளது தோல்வி,
அண்டத்தின்அட்சரங்களைக் கலைத்துப்போடும்
அவளது பணி முடிந்தது
அவளது கனவுகள்
பொய்யாகவோ மெய்யாகவோ ஈடேறின
எஞ்சிய அவள் உலகு கையறுந்துபோயிற்று
அவளுக்குப் பணிஇல்லை இனிஇங்கு
அவள் செல்லட்டும்
விடுங்கள்!
–
——————————–

ஸர்மிளா ஸெய்யித்
நன்றி-காலச்சுவடு

**ayyasamy ram** · **ayyasamy ram** Mon Mar 28, 2016 10:13 am

கவிதைகள் - ஸர்மிளா ஸெய்யித் NIcX7GGFQ2CgEncP2XZR+E_1458290835

-
எட்ட முடியாத நட்சத்திரமாகி
உயர்ந்திருக்கிறது
நேசத்தின் பற்றுக்கோடு
திரும்பப் பெறா வாசனை
ஊற்றெடுத்துப் பெருக
அருந்தப் பெறா சுவை
ஆன்மாவின் பச்சை நரம்புகளில்
கூர் ஊசியென நுழைய
விலாசமற்ற தெருக்களில்
முக்கலும் முனகலுமாக
ஒலியெழுப்பி ஓடுகிறது
உறவின் பிரசவ வலி.
–
இதொன்றும் சுகப்பிரசவமாக இராது
இத்துயரத்தை இரு கரம் ஏந்தித்
தாங்குவார் யாருமில்லை
இதன்போது
தாயென்றும் தந்தையென்றும்
நிலைமாற்றம் நிகழவும் வழியில்லை.
–
பற்றுக்கோடு –
வலியுண்டு, நிவாரணமில்லை
நொடியுண்டு முடிவில்லை
இன்பமுண்டு அளவில்லை
திக்கற்றுத் திசையற்று
அளவற்று நிகரற்று
ஊறிப் பெருகும் பேர் ஆணம்!
–
————————–
–
ஸர்மிளா ஸெய்யித்
நன்றி-காலச்சுவடு

Sponsored content · Sponsored content

கவிதைகள் - ஸர்மிளா ஸெய்யித்

கவிதைகள் - ஸர்மிளா ஸெய்யித்

Re: கவிதைகள் - ஸர்மிளா ஸெய்யித்

Re: கவிதைகள் - ஸர்மிளா ஸெய்யித்

Re: கவிதைகள் - ஸர்மிளா ஸெய்யித்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக