‘ராணி லக்ஷூமி பாய்:’ விருது பெற்ற நாஜியா!

**ayyasamy ram** · **ayyasamy ram** Wed 16 Mar 2016 - 13:20

உத்தர பிரதேசத்தில் உள்ள ஷாகிர் ஃபாத்திமா கல்லூரியில் நாஜியா என்ற முஸ்லிம் பெண் படித்து வருகிறார். இவருக்கு வயது பதினைந்து. வழக்கம் போல் கல்லூரியிலிருந்து வீட்டுக்கு திரும்பிக் கொண்டிருந்தார். அப்போது ஒரு இளம் பெண்ணின் கதறல் கேட்கிறது. கல்லூரியிலிருந்து 100 மீட்டர் தொலைவில் இந்த சம்பவம் நடக்கிறது. இரு சக்கர வாகனத்தில் வந்த இரு இளைஞர்கள் ஒரு இளம் பெண்ணை பலாத்காரம் செய்து கொண்டுள்ளனர். நிலைமையின் விபரீதத்தை உணர்ந்த நாஜியா தனது உயிரையும் பொருட்படுத்தால் அந்த சிறுமியை காப்பாற்ற ஓடி வந்தார். அந்த இளைஞர்களிடம் கிட்டத்தட்ட இரு நிமிட போராட்டத்துக்குப் பிறகு அந்த சிறுமியை மீட்கிறார் நாஜியா. பிறகுதான் தெரிகிறது அந்த சிறுமி அதே கல்லூரியில் படித்து வரும் டிம்பி என்பது. அவர் ஒரு இந்து பெண். அழுது கொண்டிருந்த அந்த பெண்ணை மீட்டு அவர்களின் பெற்றோரிடத்தில் ஒப்படைத்தார் நாஜியா. பள்ளி நிர்வாகம் இந்த சம்பவத்தை பற்றி காவல் துறையில் புகார் செய்தது.

இந்து முஸ்லிம் பிரச்னை அதிகம் உள்ள இந்த ஊரில் இப்படி நெகிழ்ச்சியான சம்பவம் நடந்துள்ளது. டிம்பியின் இந்து பெற்றோர் நாஜியாவை தங்கள் வீட்டுக்கு அழைத்து உபசரித்து அனுப்பினர். தங்களின் மற்றொரு மகளாகவும் தத்தெடுத்துக் கொண்டனர்.

இது பற்றி டைம்ஸ் ஆஃப் இந்தியாவுக்கு பேட்டியளித்த நாஜியா கூறும் போது…

‘மதியம் 12:30 மணி இருக்கும். ஒரு இளம் பெண்ணின் கதறல் எனக்கு கேட்டது. அங்கு இரு சக்கர வாகனத்தில் வந்த இரு இளைஞர்கள் ஒரு பெண்ணை பலவந்தமாக இழுத்துக் கொண்டிருந்தார்கள். நிலைமையின் விபரீதத்தை உணர்ந்த நான் ஓடிச் சென்று அந்த இளைஞர்களிடம் போராடினேன். கிட்டத்தட்ட இரண்டு நிமிட நேரம் இந்த போராட்டம் நடந்தது. நான் பின் வாங்காமல் தைரியமாக போராடுவதைக் கண்ட அந்த இருவரும் பயத்தில் அந்த பெண்ணை விட்டு விட்டு ஓட்டமெடுத்தனர். பிறகு தான் தெரிந்தது அவள் எங்கள் கல்லூரியில் படிக்கும் டிம்பி என்பது. அவள் எனது ஜூனியர். பயத்தில் அழுது கொண்டிருந்த அவளை அவளது பெற்றோரிடம் ஒப்படைத்தேன்.’ என்கிறார்.

இந்த இஸ்லாமிய பெண்ணின் வீர தீர செயலை கௌரவிக்கும் முகமாக முதல்வர் அகிலேஷ் யாதவ் ‘ராணி லக்ஷூமி பாய்’ விருது அளித்து கவுரவித்தார். ஒரு லட்ச ரூபாய் பணமுடிப்பும் கொடுக்கப்பட்டது.

இந்த கல்லூரியின் தாளாளர் கூறும்போது ‘இந்துக்களும் முஸ்லிம்களும் சகோதரர்களாக பழகி வருகின்றனர். பல இஸ்லாமியர்கள் சமஸ்கிரதம் படிக்கின்றனர். சில இந்துக்கள் உருது மொழியையும் விருப்ப பாடமாக எடுத்துள்ளனர். ஒரு சில அரசியல்வாதிகளே மக்களை பிரிக்கின்றனர்’ என்கிறார்.

தகவல் உதவி
டைம்ஸ் ஆஃப் இந்தியா
08-03-2016
-
பி.கு
-
புகைப்படம் தரவேற்றுவதில் சிக்கல் நீடிக்கிறது
சரி செய்யப்பட்டவுடன், அப்பெண்ணின் புகைப்படம்
பதிகிறேன்.
-

**krishnaamma** · **krishnaamma** Wed 16 Mar 2016 - 13:30

இந்த கல்லூரியின் தாளாளர் கூறும்போது ‘இந்துக்களும் முஸ்லிம்களும் சகோதரர்களாக பழகி வருகின்றனர். ஒரு சில அரசியல்வாதிகளே மக்களை பிரிக்கின்றனர்’ என்கிறார்.

இது அந்த கல்லூரி இல் மட்டும் இல்லை, இந்தியா முழுவதும் இப்படித்தான் நடக்கிறது சோகம்