நடிகையை தொடர்ந்து ஜெயலலிதாவுக்கு கோயில் கட்டுகிறார்கள்!

நடிகர், நடிகையை தொடர்ந்து முதல்வர் ஜெயலலிதாவுக்கும், அதிமுக நிர்வாகி ஒருவர் கோயில் கட்டுகிறார். அரக்கோணம்- சோளிங்கர் நெடுஞ்சாலையில் கோயில் கட்டுவதற்கான அடிக்கல் நாட்டு விழா நாளை நடக்கிறது.

தமிழகத்தில் நடிகர், நடிகைகளுக்கு கும்பாபிஷேசம், பாலாபிஷேகம் செய்து வருகின்றனர் அவர்களது ரசிகர்கள். இதற்கு ஒருபடி மேலேபோய், நடிகை குஷ்பு, நடிகர் விஜய் ஆகியோருக்கு ரசிகர்கள் கோயில் கட்டி அசத்தி விட்டனர்.

இந்தநிலையில், விருதுநகர் மாவட்டம், ராஜபாளையம் அருகே செட்டியார்பட்டி, முகவூர் பகுதிகளில் உள்ள அ.தி.மு.க. தொண்டர்கள், மற்றவர்களை மிஞ்சும் வகையில் ஜெயலலிதாவை அம்மன், சரஸ்வதி, கிருஷ்ணர் போன்ற இந்துக்கடவுள்களின் வேடங்களில் சித்தரித்து பேனர் வைத்தனர். இது அப்பகுதி மக்களை மட்டுமல்லாமல் ஆன்மீகவாதிகளையும் முகம் சுளிக்க வைத்தது.

தற்போது, அதிமுக பொதுச் செயலாளரும், முதல்வருமான ஜெயலலிதாவுக்கு கோயில் கட்டுகிறார் விருகை எம்ஜிஆர் இளைஞரணி பகுதி இணை செயலாளர் வழக்கறிஞர் ஏ.பி.சீனிவாசன்.

சென்னை நகரில் ஒட்டப்பட்டுள்ள போஸ்டரில், அஇஅதிமுக தொண்டர்களின் இதயதெய்வத்திற்கு திருக்கோயில் 'அம்மா ஆலயம்' அடிக்கல் நாட்டு விழா, அனைவரும் வாரீர் அம்மா ஆசி பெறுவீர். நாள்: 28-02-2016, இடம்: அரக்கோணம்- சோளிங்கர் நெடுஞ்சாலை.

இது குறித்து சீனிவாசன் கூறுகையில், ‘கோயில் கட்டுற விஷயத்தைக் கேள்விப்பட்டதும், என்னோட சொந்தக்காரங்க பல பேர் பாராட்டினாங்க. ‘வித்தியாசமான முயற்சி. இது ‘அம்மா’வோட தொண்டர்களுக்குப் புது உற்சாகத்தைக் கொடுக்கும்’னு சொன்னாங்க. கட்சிக்காரங்க இதுவரை யாரும் பாராட்டவும் இல்லை. எதிர்வினை செய்யவும் இல்லை. மத்தவங்களுக்கு எப்படியோ, எனக்கு ‘அம்மா’ என்னைக்குமே தெய்வம்தான்! அந்தத் தெய்வத்துக்குக் கோயில் கட்டுறதுல ஒரு குற்றமும் இல்லை" என்றார்.

நன்றி விகடன்