விவசாயிகள் தற்கொலை ஃபேஷனாகிவிட்டது! பாஜக எம்.பி. பேச்சால் சர்ச்சை

விவசாயிகள் தற்கொலை செய்து கொள்வது தற்போது ஃபேஷனாகிவிட்டது என்று பாஜக எம்.பி. கோபால் ஷெட்டி பேசியது சர்ச்சையை ஏற்படுத்தியுள்ளது.
-
உயிரிழந்த விவசாயிகளுக்கு அதிக இழப்பீடு வழங்குவதில் மாநிலங்களிடையே போட்டி நிலவுவதாகவும் அவர் தெரிவித்தார்.
இந்தக் கருத்துக்கு காங்கிரஸ் கட்சி கடும் கண்டனம் தெரிவித்துள்ளது. விவசாயிகள் நலனில் அக்கறையில்லாமல் மத்திய பாஜக அரசு பொறுப்பின்றி செயல்படுவதாகவும் அக்கட்சி விமர்சித்துள்ளது.
-
மகாராஷ்டிரத்தில் கடந்த ஒன்றரை மாதத்துக்குள் 124 விவசாயிகள் தற்கொலை செய்து கொண்டதாக அந்த மாநில அரசு மும்பை உயர் நீதிமன்றத்தில் அண்மையில் தெரிவித்தது.
-
கடந்த ஆண்டில் மட்டும் மகாராஷ்டிரத்தில் 1,000 விவசாயிகள் தற்கொலை செய்து கொண்டதாகத் தெரிகிறது. தேசியக் குற்றப் பதிவு ஆவணக் காப்பகத் தகவலின்படி, கடந்த 5 ஆண்டுகளில் 15,978 விவசாயிகள் மகாராஷ்டிரத்தில் தற்கொலை செய்து உயிரை மாய்த்துள்ளனர்.
-
விவசாயிகளின் தற்கொலை அதிகரித்து வருவது நாடு முழுவதும் அதிர்ச்சியை ஏற்படுத்தியுள்ள நிலையில், அதை கேலி செய்து பாஜக எம்.பி. கோபால் ஷெட்டி கருத்து வெளியிட்டது புதிய சர்ச்சையை ஏற்படுத்தியுள்ளது.
-
மும்பை அருகே புதன்கிழமை நடைபெற்ற நிகழ்ச்சியில் பங்கேற்ற அவர் இதுகுறித்து பேசியதாவது:
-
தற்கொலை செய்து கொண்ட அனைத்து விவசாயிகளும் வறுமை மற்றும் பட்டினி காரணமாக உயிரை மாய்த்துக் கொள்ளவில்லை. விவசாயிகள் தற்கொலை செய்து கொள்வது வழக்கமாகவும், ஃபேஷனாகவும் ஆகிவிட்டது.
உயிரிழந்த விவசாயிகளுக்கு மகாராஷ்டிர அரசு இழப்பீடாக ரூ.5 லட்சம் கொடுத்தால், பக்கத்து மாநிலங்கள் போட்டி போட்டுக் கொண்டு ரூ.7 லட்சம் இழப்பீடு வழங்குகின்றன என்றார் அவர்.
-
இந்தக் கருத்துக்கு காங்கிரஸ் கட்சியின் மும்பை நகரத் தலைவர் சஞ்சய் நிருபம் கடும் கண்டனம் தெரிவித்துள்ளார். மகாராஷ்டிரத்தில் விவசாயிகள் தற்கொலை செய்து கொள்ளும் சம்பவங்கள் அதிகரித்து வரும் நிலையில், ஷெட்டி இவ்வாறு கருத்து வெளியிட்டிருப்பது பாஜகவின் பொறுப்பற்ற தன்மையையே காட்டுகிறது என்று சஞ்சய் நிருபம் விமர்சித்துள்ளார்.
இதனிடையே, தாம் கூறிய கருத்தை ஊடகங்கள் திரித்து வெளியிட்டு விட்டதாக கோபால் ஷெட்டி விளக்கமளித்துள்ளார். இதுகுறித்து அவர் கூறியதாவது:
-
விவசாயிகள் தற்கொலை ஃபேஷனாகிவிட்டது என்று நான் கூறவில்லை. இழப்பீட்டுத் தொகையை வழங்குவதில் மாநிலங்கள் போட்டி போட்டுக் கொண்டு செயல்படுகின்றன என்றும் விவசாயிகள் தற்கொலைச் சம்பவங்களை ஒரே நாளில் நிறுத்த முடியாது என்றும் நான் தெரிவித்த கருத்து திரிக்கப்பட்டுவிட்டது என்றார் அவர்.
=
தினமணி