என் காதல் இரகசியமானது..! – கோ. மன்றவாணன்

by **ayyasamy ram** Thu Feb 18, 2016 3:49 pm

-
என்
காதல்
இரகசியமானது
அது
அவளுக்கே தெரியாது என்பதால் !
–
அவள்
என் விழிகளி்ல் நனையாமல்
என் தெருவைக்
கடக்க முடியாது.
–
அவளின்
அகல விழிகளில்
பூமியில் உள்ள
புழு பூச்சிகள்
எல்லாம் தெரிகின்றன
என்னைத் தவிர !
–
என்
சிந்தனைப் பரப்பில்
சிறுநொடியும் விலகாது வலம்வருகிறாள்
அலங்காரத் தேரில்
அமர்ந்து!
–
அவள்
சிந்தனைக்குள் நுழைய முடியாது
திரும்புகிறது
என்
காதல் தீராநதி
–
என் இதயம்
லப்டப் லப்டப் என்பதை மறந்து
அவள்பெயரையே உச்சரிக்கின்றது
–
அவள்
இதயத்துக்கு
என் பெயரைத் தெரிவிக்க
கிளி விடு தூது அனுப்பினேன்
அப்புறம்தான் தெரிந்தது
அது ஊமைக்கிளி என்று!
–
காதல் எனும்
ஒருவழிப் பாதையில்
நான்மட்டும்
நடைபிணமாய் நடக்கையில்
–
கண்ணீர் விட்டுக்
கடந்து போகின்றன
ஈர மேகங்கள்….
–
————————–
நன்றி- கவிதை மணி

படம்- இணையம்