கள்ளினும் காமம் பெரிது

**M.Jagadeesan** · **M.Jagadeesan** Mon Jan 18, 2016 10:50 am

சிவந்த நிறம் உனக்கு இல்லையென்றாலும் நீ
தொட்டால் ஒட்டிக்கொள்ளும் கருஞ்சாந்து நிறமல்ல !

அண்ணாந்து பார்க்கும் உயரம் இல்லையென்றாலும் நீ
குனிந்து பார்க்கும் அளவுக்குக் குட்டையல்ல !

சுசீலாவின் குரல் உனக்கு இல்லையென்றாலும்
மீண்டும் கேட்கத் தூண்டும் சுகந்தமான குரல் உனக்கு !

மருண்டு நோக்கும் மானின் விழிகள் இல்லையென்றாலும்
கண்டவுடன் இழுக்கும் காந்த விழிகள் உனக்கு !

முத்துப்பற்கள் உனக்கு இல்லையென்றாலும்
பார்த்தவரைப் பரவசமாக்கும் பச்சரிசிப் பல்வரிசை உனக்கு !

அன்னத்தின் நடை உனக்கு இல்லையென்றாலும்
தேர்போல நடந்து தெருவிலே ஊர்கோலம் வருகின்றாய் !

கால்பார்த்த கண்கள் காலே பார்த்திருக்க
கை பார்த்த கண்கள் கையே பார்த்திருக்க
உன் முழுவடிவும் பார்ப்பதற்கு என்னால் முடியவில்லை !

உண்டால் மட்டுமே இன்பம் தருவது கள்ளாகும்
ஆனால் நீயோ
கண்டாலும் நினைத்தாலும் களிப்பைத் தருகின்றாய் !

குறள் :

உள்ளக் களித்தலும் காண மகிழ்தலும்
கள்ளுக்கில் காமத்திற் குண்டு . ( புணர்ச்சி விதும்பல் - 1281 )

பொருள்:

நினைத்த அளவில் களிப்பு உண்டாதலும் , காணும் அளவில் மகிழ்வு தருவதும் மதுவுக்கு இல்லை ; ஆனால் காதலுக்கு உண்டு .

**T.N.Balasubramanian** · **T.N.Balasubramanian** Mon Jan 18, 2016 12:28 pm

அருமை அய்யா !

தற்காலம் என்றில்லை ,எக்காலத்திலும் ,எதிர்பார்ப்புகள் ---முதல் வரி .
அமைந்த பிறகு ,அனுசரிப்புகளும் சமாளிப்புகளும் ----ரெண்டாம் வரி

குறளும் பொருளும் அருமை கள்ளினும் காமம் பெரிது 103459460