சியாச்சின் பனிச்சரிவில் மீட்கப்பட்ட ராணுவ வீரர் சிகிச்சை பலனின்றி உயிரிழந்தார்: நினைவு திரும்பாமலேயே உயிர் பிரிந்தது

சியாச்சின் பனிச்சரிவில் சிக்கி 6 நாட்களுக்குப் பிறகு மீட்கப்பட்ட ராணுவ வீரர் ஹனுமந்தப்பா சிகிச்சை பலனின்றி இன்று உயிரிழந்தார்.

உலகின் மிக உயரமான போர்க்களமான சியாச்சின் சிகரத்தில் கடந்த வாரம் ஏற்பட்ட பனிச்சரிவில் அங்கிருந்த இந்திய ராணுவ காவல்சாவடி பனியில் புதைந்தது. அங்கு காவல் பணியில் ஈடுபட்டிருந்த ஒரு ராணுவ அதிகாரி உள்பட 10 வீரர்கள் பனியில் புதைந்தனர்.

இவர்களில் 9 பேரின் உடல்கள் மீட்கப்பட்ட நிலையில், கர்நாடக மாநிலத்தை சேர்ந்த ஹனுமந்தப்பா என்ற வீரர் மட்டும் 6 நாட்களுக்குப் பிறகு உயிருடன் மீட்கப்பட்டு டெல்லி ராணுவ மருத்துவமனையில் சேர்க்கப்பட்டார். மைனஸ் 40 டிகிரி குளிரில் 6 நாட்களாக இருந்ததால் அவரது உடலின் பல்வேறு பாகங்கள் செயலிழந்து கோமா நிலைக்குச் சென்றார். அவரைக் காப்பாற்ற மருத்துவர்கள் தீவிர முயற்சி மேற்கொண்டுவந்தனர்.

அவரது உடல்நிலை தொடர்ந்து கவலைக்கிடமாகவே இருந்ததால், அவர் உயிர்பிழைக்க வேண்டி நாடு முழுவதும் பல்வேறு தரப்பினர் பிரார்த்தனை செய்தவண்ணம் இருந்தனர்.

கடந்த மூன்று நாட்களாக வெண்டிலேட்டர் மூலம் அவருக்கு செயற்கை சுவாசம் அளிக்கப்பட்டுவந்தது. தொடர்ந்து அவரது உடல்நிலையில் முன்னேற்றம் ஏற்படாத நிலையில், இன்று காலை 11.45 மணியளவில் ஹனுமந்தப்பா உயிரிழந்தார். 3 நாட்களாக வெண்டிலெட்டர் உதவியுடன் செயற்கை சுவாசம் அளிக்கப்பட்டு வந்தது. கோமாவில் இருந்து நினைவு திரும்பாமலேயே உயிர் பிரிந்தது.

அவர் எப்படியும் உயிர் பிழைத்து நாட்டிற்கு சேவை செய்ய தொடங்குவார் என்று அவரது குடும்பத்தினர் நம்பிக்கையுடன் எதிர்பார்த்து காத்திருந்தனர். ஆனால், அவர் தற்போது உயிரிழந்துவிட்டார் என்ற செய்தியைக் கேட்டதும் குடும்பமே சோகத்தில் மூழ்கியுள்ளது. -maalaimalar

கண்ணீர் அஞ்சலி

வீர வணக்கம்

  வீர வணக்கம்