முதல் இருபது ஓவர் போட்டி: இந்தியா 188 ரன்கள் குவிப்பு

-
ஆஸ்திரேலியாவுக்கு எதிரான முதலாவது இருபது ஓவர் போட்டியில் இந்தியா ரன்கள் குவித்தது.

டாஸ் வென்ற ஆஸ்திரேலிய அணியின் கேப்டன் ஆரோன் பிஞ்ச் பவுலிங்கை தேர்வு செய்தார்.

இந்தியாவின் சார்பில் ரோஹித் சர்மாவும், ஷிகர் தவானும் ஆட்டத்தைத் தொடங்கினார். ஆரம்பம் முதலே அடித்து விளையாடினார் ரோஹித் சர்மா. அவர் இருபது பந்துகளில் ஒரு சிக்ஸர் நான்கு பவுண்டரிகள் உள்பட 31 ரன்களை குவித்தார். வெகுநாள்களுக்குப் பிறகு அணியில் இடம் பிடித்த ஷான் வாட்சன் சர்மாவை வீழ்த்தினார். இதைத் தொடர்ந்து ஷிகர் தவான் 5 ரன்களில் அதே ஓவரில் வீழ்ந்தார்.

ஒரு நாள் அணியிலிருந்து கழற்றிவிடப்பட்ட சுரேஷ் ரெய்னாவும், டெஸ்ட் அணி தலைவர் விராட் ஹோலியும் இணைந்து ரன்களை குவித்தனர். இந்த ஜோடி ஆஸ்திரேலியா பந்து வீச்சாளர்களைப் பதம் பார்த்தது.

அதிலும் ஹோலி மிகவும் ஆக்ரோஷமாக விளையாடினார். அவர் 55 பந்துகளில் 2 சிக்ஸர், 9 பவுண்டரிகள் உள்பட 90 ரன்கள் குவித்து ஆட்டமிழக்காமல் இருந்தார். ஹோலியும் ரெய்னாவும் மூன்றாவது விக்கெட்டுக்கு 134 ரன்கள் குவித்தனர். ரெய்னா 34 பந்துகளில் ஒரு சிக்ஸர், 3 பவுண்டரிகள் உள்ள 41 ரன்கள் குவித்து கடைசி ஓவரின் இரண்டாவது பந்தில் ஆட்டமிழந்தார்.

ரெய்னா ஆட்டமிழந்தவுடன் உள்ள வந்த இந்திய அணி கேப்டன் தான் சந்தித்த முதலாவது பந்திலேயே தனது 'பேவரைட் ஷாட்' ஹெலிகாப்டர் ஷாட் மூலம் சிக்ஸர் விளாசினார். அடுத்த பந்திலும் பவுண்டரி விளாச, இந்திய அணி 20 ஓவர் முடிவில் 188 ரன்கள் குவித்தது.

நெடுநாள்களுக்குப் பிறகு இந்திய அணியில் இடம் பிடித்த யுவராஜ் சிங்குக்கு விளையாடும் வாய்ப்பு கிடைக்கவில்லை.

இந்திய அணியில் அனுபவ வீரர்கள் ரெய்னா, யுவராஜ் சிங், நெக்ரா ஆகியோர் சேர்க்கப்பட்டடிருந்தனர். இது தவிர சுழல்பந்து வீச்சாளர்கள் ஜடேஜா மற்றும் அஸ்வின் ஆகியோரும் இடம்பிடித்துள்ளனர். ஆஸ்திரேலிய அணியில் அனுபவ வீரர்கள் வாட்சன் மற்றும் டைட் ஆகியோர் சேர்க்கப்பட்டிருந்தனர்.

இந்திய அணி விவரம்: ரோஹித் சர்மா, ஷிகர் தவான், விராட் ஹோலி, சுரேஷ் ரெய்னா, யுவராஜ் சிங், மகேந்திர சிங் தோனி, ஹர்திக் பாண்டியா, ரவீந்திர ஜடேஜா, ரவிச்சந்திரன் அஸ்வின், ஜாஸ்பித் பும்ரா, ஆஷிஸ் நெகரா.

ஆஸ்திரேலிய அணி விவரம்: ஆரோன் பிஞ்ச், டேவிட் வார்னர், ஸ்டீவன் ஸ்மித், கிரிஸ் லைன், ட்ரேவிஸ் ஹெட், ஷான் வாட்சன், மாத்யூ வாட், ஜேம்ஸ் பால்க்னர், கேன் ரிச்சட்சர்சன், கேமரூன் பாயிஸ், ஷான் டைட்.
-
dinamani