வேடிக்கையாய் ஆரம்பித்து வேதனையில் முடியும், விழா கொண்டாட்டங்கள்

[You must be registered and logged in to see this image.]


விழாக்கள், முக்கியமாக குழந்தைகள் பங்கேற்கும் விளையாட்டுகள் நிறைந்த விழாக்களின் போது பெற்றோர் அதிக கவனத்துடன் இருக்க வேண்டும்.

சமூக ஊடகங்களில் கடந்த சில நாட்களாக, ஒரு வீடியோ வைரலாகி வருகிறது. சிறுவன் ஒருவனின் பிறந்த நாள் விழாவின்போது, நுரையைக் கொண்ட திரவத்தை (ஃபோம்) அதிகப்படியாகத் தெளித்து விளையாடுகின்றனர். அது மெழுகுவர்த்தியில் மீது பட்டு, முகத்தில் தீப்பிடிக்கிறது. விழாவுக்கு வந்த சிறுவர்கள் அதைப் பார்த்து அழுதுகொண்டே அலறுகின்றனர் . வீடியோவின் உண்மைத் தன்மையைப் பற்றி முழுமையாகத் தெரியாத நிலையிலும், அதைப் பார்க்கும்போது பயம் எழுகிறது.

விழாக்களின் போது கேளிக்கை, விளையாட்டுகள் இருக்கலாம். ஆனால், பெற்றோர்கள்தான் கவனமாக இருக்க வேண்டும் என்கின்றனர் நிபுணர்கள், இதுகுறித்து நம்மிடம் பேசிய ராஜன் ஐ கேர் தலைவர் மோகன்ராஜன், "விழாக்களில் பயன்படுத்தும் பார்ட்டி ஃபோம்கள் கண்களுக்குக் கெடுதலானவை. அவை கண் எரிச்சலுக்குக் காரணமாக அமையும். அதைப் பயன்படுத்தும்போது, பெற்றோர்களே கவனமாக இருக்க வேண்டும்" என்கிறார்.

பார்ட்டி ஃபோம்கள் எளிதில் தீப்பற்றக்கூடியவை. பெரும்பாலான பாட்டில்கள் எச்சரிக்கை வாசகங்களைத் தாங்கி வந்தாலும், மக்கள் அவற்றைப் பொருட்படுத்துவதில்லை. சுடர்களின் மீது அவற்றைப் பயன்படுத்த கூடாது என்று கூறப்பட்டிருந்தாலும், மக்கள் அவற்றை எரியும் மெழுகுவர்த்தியின் மீதே தெளிக்கின்றனர். சிறிய உருளை வடிவ கொள்கலனில் அடைக்கப்பட்டிருக்கும் ஃபோம் மற்றும் காகிதத்துண்டுகள் சுமார் 80 ரூபாயில் இருந்து 150 ரூபாய்க்கு விற்கப்படுகின்றன.

பலூனிலும் அலட்சியம் கூடாது

ஃபோம்கள் மட்டும் அல்லாது, பலூன்களும் ஆபத்தானவைதான். அதன் பயங்கரம் குறித்து, அப்பல்லோ குழந்தைகள் மருத்துவமனையின் மூத்த ஆலோசகர் இந்திரா ஜெயக்குமார், "சமீபத்தில் எங்கள் மருத்துவமனையில் ஆபத்தான நிலையில் இரு சிறுவர்களைக்கொண்டு வந்து சேர்த்தனர். என்ன ஆனது என்று கேட்டேன். மற்றவர்கள் பலூன் ஊதுவதைப் பார்த்து, இவனும் பலூன் ஊத முயற்சித்திருக்கிறான். ஆனால், எதிர்பாராத விதமாக பலூனை உறிஞ்சியதால், உயிருக்கே ஆபத்தாகி இருக்கிறது.

நீலம் பாயந்த நிலையில் சிறுவனைக் கொண்டு வந்து மருத்துவமனையில் சேர்த்திருக்கின்றனர். உடனடியாக அவனுக்கு முதலுதவி செய்து உயிரைக் காத்திருக்கின்றனர் மருத்துவர்கள்.

அலங்காரப் பொருட்களும் ஆபத்தானவைதான். ஜொலிப்பாகவும், வண்ணமயமாகவும் இருக்கும் பொருட்களைக் குழந்தைகள் எடுத்து வாயில் போட்டுக் கொள்ளவும் சாத்தியமுண்டு. அதனால் பெற்றோர்கள்தான் பிள்ளைகள் மேல் கவனமாக இருக்க வேண்டும்" என்கிறார்.

நன்றி ஹிந்து