'வேஸ்ட்'டான காஸ்ட்லி காரா? காசு பார்க்கலாம் ஜோரா!

by **krishnaamma** Thu Jan 28, 2016 12:52 pm

சென்னை மற்றும் புறநகர் பகுதிகளில், கடந்த ஆண்டு இறுதியில் ஏற்பட்ட மழை வெள்ளத்தால், ஏராளமானோர் தங்கள் உடைமையை இழந்தனர். இதில், பலரின் காஸ்ட்லி கார்களும் வீணாயின. இந்த கார்களை பயன்படுத்த விரும்பாத பலர், அவற்றை வந்த விலைக்கு விற்று விட்டனர். இந்நிலையில், கார்களை வந்த விலைக்கு விற்பதை விட, அதன் ஆயுட்கால வரியை திரும்பப் பெறுவதின் மூலம், அதிக பணம் கிடைக்கும் என்ற தகவலால், அடிமாட்டு விலைக்கு காரை விற்ற பலரும் புலம்பி வருகின்றனர்.

திரும்ப பெறுவது எப்படி?

ஆயுட்கால வரியை திரும்பப் பெறுவது எப்படி என்பது குறித்து, போக்குவரத்து துறையினர் கூறியதாவது:புதிய கார்களை வாங்கும் போது, பத்து லட்சம் ரூபாய்க்கு குறைவான கார்களுக்கு, 10 சதவீதமும், அதிக விலை கார்களுக்கு, 15 சதவீத வரியும் விதிக்கப்படுகிறது. கார் அல்லது வேறு எந்த வாகனமோ, முழுமையாக பாதிக்கப்பட்டால், அதை, பயன்படுத்தப் போவதில்லை என தெரிவித்து, ஆர்.சி., புத்தகத்தை வட்டார போக்குவரத்து அலுவலகத்தில் உரிமையாளர், 'சரண்டர்' செய்ய வேண்டும்.அதை, அதிகாரிகள் பார்வையிட்டு, சான்று அளிப்பர். பயன்பாட்டுக்குத் தக்கபடி, தொகை பிடித்தம் செய்யப்பட்டு, மீதி வரித்தொகை அவர்களுக்கு கொடுக்கப்படும். அடிமாட்டு விலைக்கு சொகுசு காரை விற்பதை விட, ஆயுள் வரியை திரும்பப் பெறுவது லாபகரமானது என்பது சிலருக்கு மட்டுமே தெரிந்துள்ளது.

'ஸ்கிராப்':

பல லட்சம் ரூபாய் ஆயுள் வரி செலுத்தி சொகுசு கார்களை வாங்கியவர்கள், இது தெரியாமல் விற்றதால், நஷ்டம் அடைந்து உள்ளனர். ஆயுள்வரி திரும்பப் பெறப்பட்ட வாகனத்தின் பதிவுச்சான்றில், பழைய இரும்பு (ஸ்கிராப்) என குறிப்பிடப்படும். அந்த காரை ஓட்டவோ, விற்கவோ முடியாது. அந்த கார், 'ஸ்கிராப்' என குறிப்பிடப்படுவதால், அதன் பாகங்களை காயலான் கடைகளில் விற்றும் காசு பார்க்கலாம்.இவ்வாறு அவர்கள் தெரிவித்தனர்.

தினமலர்