பத்மஸ்ரீ விருது எனது கடின உழைப்புக்கு கிடைத்த பலன்: நடிகை பிரியங்கா சோப்ரா

-
“பத்மஸ்ரீ விருதுக்கு என்னைத் தேர்வு செய்திருப்பது, எனது கடின உழைப்புக்கு கிடைத்த பலன்” என்று ஹிந்தி நடிகை பிரியங்கா சோப்ரா செவ்வாய்க்கிழமை கூறினார்.

“ஃபேஷன்’, “காமினி’, “7 கூன் மாஃப்’, “பர்ஃபி’, “மேரி கோம்’, “பாஜிராவ் மஸ்தானி’ உள்ளிட்ட ஹிந்தித் திரைப்படங்களில் நடித்தவர் பிரியங்கா சோப்ரா. தற்போது, “குவாண்டிகா’ என்னும் அமெரிக்க தொலைக்காட்சித் தொடரில் முக்கிய கதாபாத்திரத்தில் நடித்து வருகிறார். அந்தத் தொடரில் நடிப்பதற்காக, மக்கள் விருப்ப விருதுக்கு கடந்த மாதம் தேர்வு செய்யப்பட்டார்.

இந்நிலையில், அவருக்கு இந்தியாவின் நான்காவது உயரிய விருதான “பத்மஸ்ரீ’ விருதை மத்திய அரசு திங்கள்கிழமை அறிவித்தது.

தற்போது கனடாவின் மான்ட்ரியல் நகரில் உள்ள பிரியங்கா சோப்ரா, இதுதொடர்பாக, தொலைபேசி மூலமாக செவ்வாய்க்கிழமை அளித்த பேட்டி:

எனது எல்லையற்ற மகிழ்ச்சியை வார்த்தைகளால் விவரிக்க முடியவில்லை. அமெரிக்காவின் “மக்கள் விருப்ப விருது’, தற்போது “பத்மஸ்ரீ விருது’, இவை அனைத்தும் எனது கடின உழைப்புக்குக் கிடைத்த பலனாகவே கருதுகிறேன். எனக்கு வெற்றிகள் எளிதாகக் கிடைத்திடவில்லை.

மிகப் பெரிய கெளரவத்தோடு தொடங்கியுள்ள இந்த ஆண்டு, எனக்கு சிறப்பானதாக இருக்கும் எனக் கருதுகிறேன். ஒரு ராணுவ அதிகாரியின் மகளான எனக்கு, மத்திய அரசின் “பத்மஸ்ரீ விருது’ மேலும் சிறப்புடையதாக உள்ளது.

எனது உழைப்புக்கு அங்கீகாரம் கொடுத்த மக்கள் அனைவருக்கும் நன்றி தெரிவித்துக் கொள்கிறேன். இந்த விருது, இன்னும் சிறப்பாக செயல்பட வேண்டும் என ஊக்குவிப்பதற்காக வழங்கப்படுகிறது என்றே கருதுகிறேன்.

மேலும், திரைத் துறையில் பிரபலமானவர்களின் பட்டியலில் எனது பெயர் இடம்பெற்றிருப்பதைக் கண்டும் மகிழ்ச்சியடைகிறேன் என்றார் பிரியங்கா சோப்ரா.

–

தினமணி

வாழ்த்துகள்......

நம்முடைய விவசாயிகளுக்கு அவர்கள் அன்றாடும் உண்ணும் உணவுதான் அவர்களின் உழைப்புக்கு கிடைத்த பெரிய விருது....

இன்று விருது அறிவிப்பதெல்லாம் எதை வைத்து அறிவிக்கிறார்கள் என்பது நமக்கு தெரியாதா... என்ன ..?????