மாயம் 20 கோடி -மர்ம நபர்கள் கில்லாடி வேலை

மாயம்  20 கோடி -மர்ம நபர்கள் கில்லாடி வேலை

அதிகாரிகள் அதிர்ச்சி

தமிழக அரசின் நகர்ப்புற வளர்ச்சி நிதி சேவைகள் நிறுவன பெயரில் பொதுத்துறை வங்கி ஒன்றில், 'நிரந்தர வைப்புத் தொகை' என அழைக்கப்படும் 'பிக்சட் டிபாசிட்'டில் போடப்பட்ட 23 கோடியில் 20 கோடி ரூபாயை நான்கு பேர் மிகவும் லாவகமாக வேறு வங்கிக்கு மாற்றி அபகரித்த அதிர்ச்சி தகவல் வெளியாகி உள்ளது.



தமிழகத்தில் நகர்ப்புற வளர்ச்சி திட்டங்களுக்காக ஒதுக்கப்படும் நிதியானது குறிப்பிட்ட நோக்கத்துக்கு பயன்படுத்தப்படும் வகையில், பொதுத்துறை வங்கிகளில் 'டிபாசிட்' செய்யப்பட்டு பராமரிக்கப் படும். தமிழக அரசின் பொதுத்துறை நிறுவனமான நகர்ப்புற வளர்ச்சி நிதி சேவைகள் நிறுவனம், இதற்கான பணிகளை மேற்கொள்ளும்.

இந்த வகையில் சமீபத்தில், குறிப்பிட்ட ஒரு திட்டத்துக்காக 23 கோடி ரூபாயை, நகர்ப்புற வளர்ச்சி நிதி சேவைகள் நிறுவனத்துக்கு தமிழக அரசு விடுவித்தது. இந்த நிதியை பொதுத்துறை வங்கி ஒன்றில் நிரந்தர வைப்புத் தொகையாக, சில மாதங்களுக்கு வைத்திருக்க முடிவு செய்யப்பட்டது.இப்படி முதலீடு செய்யப்பட்ட 23 கோடியில் 20 கோடி ரூபாய் போலி கணக்குகளுக்கு மாற்றப்பட்டு அபகரிக்கப்பட்டு உள்ளது.

பணம் மாயமானது எப்படி?: பணம் மாயமான பின்னணி குறித்த அதிர்ச்சி தகவல்கள்:

அரசு விடுவித்த நிதியை முதலீடு செய்வது
தொடர்பாக நகர்ப்புற வளர்ச்சி நிதி சேவைகள் நிறுவன உயர் அதிகாரி ஒருவர் சென்னை, வடபழனியில், தனியார் மருத்துவமனை வளாகத்தில் செயல்படும் பொதுத்துறை வங்கியின் கிளை மேலாளரை, அதே வங்கியின் ஈக்காடுத்தாங்கல் கிளை ஊழியர் ஒருவர் மூலமாக அணுகி உள்ளார். அதன்படி நிதியை வைப்புத் தொகையாக பெற வங்கியின் கிளை மேலாளரும் சம்மதித்தார்.

இதையடுத்து அரசுவிடுவித்த 23 கோடி ரூபாய் அந்த குறிப்பிட்ட வங்கி கிளையின் கணக்குக்கு, 'ஆன்லைன்' முறையில் மாற்றப்பட்டது. இந்தப் பணம் வந்த சில நாட்களில், 'நகர்ப்புற வளர்ச்சி நிதி சேவைகள் நிறுவனத்தைச் சேர்ந்தவர்கள்' என அறிமுகப்படுத்திக் கொண்ட நான்கு பேர், பொதுத்துறை வங்கி கிளை மேலாளரை அணுகியுள்ளனர்.

அப்போது, 'அரசு விடுவித்த நிதியை வைப்பு நிதியாக மாற்றாமல் 'கரன்ட் அக்கவுன்ட்' என, அழைக்கப் படும், நடப்பு கணக்கிலேயே வைத்திருக்கும்படி எங்கள் உயர் அதிகாரி கூறினார்' என தெரிவித்து, சில கடிதங்களை அளித்துள்ளனர்.

அவர்களின் கோரிக்கையை ஏற்ற வங்கி கிளை மேலாளரை அடுத்த சில நாட்களில் மீண்டும் தொடர்பு கொண்ட அந்த நபர்கள், நகர்ப்புற வளர்ச்சி நிதி சேவைகள் நிறுவனம் கணக்கில் உள்ள 23 கோடி ரூபாயில் 20 கோடி ரூபாயை, ஐதராபாத்தில் உள்ள நான்கு வெவ்வேறு வங்கி கணக்குகளுக்கு மாற்றும்படி அறிவுறுத்தியுள்ளனர்.

சுருட்டல்: அதன்படி நான்கு கணக்குகளுக்கு தலா ஐந்து கோடி ரூபாய் வீதம் 20 கோடி ரூபாய் மாற்றப்பட்டு உள்ளது. அதில் ஒரு கணக்கு குறித்து
ஐதராபாத்தைச் சேர்ந்த ஒரு பொதுத்துறை
வங்கியின் கிளை மேலாளர், பணம் அனுப்பிய வங்கி மேலாளரை தொடர்பு கொண்டு விசாரித்து உள்ளார்.

அப்போதுதான் நகர்ப்புற வளர்ச்சி நிதி சேவைகள் நிறுவனம் சார்பில் வந்த நபர்கள் கொடுத்த வங்கி கணக்குகள் தவறானவை என்பது, சென்னையில் உள்ள வங்கி அதிகாரிகளுக்கு தெரிய வந்தது.

உடன் வங்கி அதிகாரிகள், நகர்ப்புற வளர்ச்சி நிதி சேவை கள் நிறுவனத்தை தொடர்பு கொண்டு கேட்ட போது, '23 கோடி ரூபாயை நிரந்தர வைப்புத் தொகையில் செலுத்தியதற்கான சான்றிதழ் தங்களுக்கு வந்து விட்டது' என தெரிவித்து உள்ளனர்.

இல்லாத வைப்பு நிதிக்கு வங்கி பெயரில் அரசு நிறுவனத்துக்கு சான்றிதழ் அளித்தது யார் என்பது தெரியாமல் வங்கி அதிகாரிகள் குழப்பத்தில் ஆழ்ந்தனர்.

* அதிர்ச்சி: இந்த விவகாரம் தொடர்பாக நகர்ப்புற நிதி சேவைகள் நிறுவனம் அளித்த புகாரின் அடிப்படையில், காவல் துறை வழக்கு பதிவு செய்து உள்ளது; வங்கி அதிகாரி ஒருவரும், பணியாளர் ஒருவரும் 'சஸ்பெண்ட்' செய்யப்பட்டுள்ளதாக கூறப்படுகிறது.

அரசு நிதியை, மிகவும் லாவகமாக, கில்லாடித்தனமாக வேறு வங்கி கணக்குகளுக்கு மாற்றிய நபர்களின் செயல்பாடு குறித்து அறிந்த வங்கி அதிகாரிகளும், அரசு அதிகாரிகளும் அதிர்ச்சியில் உறைந்துள்ளனர்.

இதுகுறித்து விசாரித்த போது நகர்ப்புற வளர்ச்சி நிதி நிறுவனம் தரப்பிலும், வங்கி நிர்வாகம் தரப்பிலும் பதில் அளிக்க மறுத்து விட்டனர்.

நன்றி தினமலர்