உனக்காக அனுப்புகிறேன்!!!

by kandhasami saravanan Mon Jan 11, 2016 4:07 pm

விடைபெறும் நேரத்தில்
விடைகொடுக்க முடியாமல் தவிப்பில் -உன்
விழிகள் தொடுத்த வினாக்கனையையும் மீறி
விதி விட்டபடி விடட்டும் என்று -நான்
விரைந்து வந்து விட்டேன் வெளிநாடு!

இங்கு

விழிமூடி உறங்க நினைத்தும்- உன்
விழிகள் தொடுத்த வினாக்களுக்கு தினமும்
விடையறிய விழைகின்றேன் ஆனால்
விடையொன்றும் அறிந்தபாடில்லை!

கிளி பேசும் மொழிகூட அறிந்த நான் - உன்
விழி பேசும் மொழி அறியானானேன்!

கடல்தாண்டி நான் வந்தாலும் என்
உடல் மட்டும் தான் இங்கே
உள்ளம் எப்போதும் உன்னோடுதான்!!!

எனைக்காண துடிக்கும்- உன்
ஈரவிழிகளுக்கு ஈரம் துடைக்கும் விரலாய்
இக்கவி வரிகளை அனுப்புகிறேன்!!!
க.சரவணன்

by **T.N.Balasubramanian** Mon Jan 11, 2016 4:30 pm

க.சரவணன் ,
கசக்கி பிழிந்து விட்டீர் உள்ளத்தை கவிதையால் .

"எனைக்காண துடிக்கும்- உன்
ஈரவிழிகளுக்கு ஈரம் துடைக்கும் விரலாய்
இக்கவி வரிகளை அனுப்புகிறேன்!!!"

இது டாப் .
அருமையாய் இருக்கு .

ரமணியன்

by kandhasami saravanan Mon Jan 11, 2016 4:37 pm

நன்றி ஐயா!

by K.Senthil kumar Mon Jan 11, 2016 8:40 pm

கவி வரிகள் தூதனுப்பி
கண் ஈரம் துடைத்தவனே

விதியென்று விட்டுச்சென்றாய்-இதுவே
கதி என்று நான் நினைத்தேன் –அதில்
சதி ஒன்றும் இல்லை என –உன்
மதியதனை கேட்டுச்சொல் –என்
மனமதனை ஆள்பவனே

கண் வழியும் ஈரமதை –உன்
கவி வரிகள் துடைக்குமென்றால் –என்
இதயத்தில் இருக்கும் அந்த
எடுத்தியம்பா வலியதனை
எது துடைக்கும் ......??

கே.செந்தில் குமார்