மார்கழி திருவாதிரை களி செய்யும் முறை

ஈசனே தம் அடியார் வீடு நாடிசென்று விரும்பிஉண்ட திருவாதிரை களியை ஆருத்ரா தரிசன நாளில் (26.12.2015) நடராஜ பெருமானுக்கு படைத்தல் சிறப்பு

அதை செய்யும் முறை அறியவே இப்பதிவு

செய்முறை:

தேவையான பொருள்கள்:

பச்சரிசி - 2 கப்
வெல்லம் - 400 கிராம்
நெய் - கால் கப்
முந்திரி - 10
திராட்சை - 15
தேங்காய் துருவல் - அரை கப்
ஏலக்காய் பொடி - அரை மேசைக்கரண்டி

தேங்காயைத் துருவி எடுத்துக் கொள்ளவும். தேவையான இதரப் பொருட்களையும் தயாராய் வைத்துக் கொள்ளவும்.

வெறும் வாணலியில் பச்சரிசியை போட்டு பொரிஅரிசியை போல 10 நிமிடம் வறுத்து எடுத்துக் கொள்ளவும்.

பிறகு அதை ஆறவைத்து மிக்ஸியில் போட்டு ரவை பதத்திற்கு அரைத்துக் கொள்ளவும். பிறகு மாவு சலிக்கும் சல்லடையை விட சற்று பெரிய துளையுடைய சல்லடையில் போட்டு சலித்து, சல்லடையில் மீதம் இருக்கும் அரிசியை மீண்டும் மிக்ஸியில் போட்டு ரவை போல் அரைத்து சலித்து எடுத்துக் கொள்ளவும்.

ஒரு பாத்திரத்தில் மூன்றரை கப் தண்ணீர் ஊற்றி நன்கு கொதிக்க விடவும். கொதித்ததும் அரை கப் தண்ணீரை எடுத்து வைத்து விடவும்.

பாத்திரத்தில் இருக்கும் தண்ணீரில், ரவை போல பொடித்த மாவை சிறிது சிறிதாக சேர்த்து, நன்கு கைவிடாமல் கட்டிவிழாதவாறு 5 நிமிடம் கிளறவும்.

தண்ணீர் கொதிக்கும் நேரத்தில் வேறொரு பாத்திரத்தில் வெல்லத்தை போட்டு கால் கப் தண்ணீர் ஊற்றி அடுப்பில் வைத்து வெல்லத்தை கிளறவும்.

வெல்லம் கரைந்து ஒரு கொதி வந்ததும், பாகு ஆவதற்கு முன்பதம் வரும் வரை கிளறவும். பிறகு அதை எடுத்து மாவுடன் ஊற்றி கிளறவும்.

மாவுடன் பாகு ஒன்றாக கலந்ததும் 10 நிமிடம் வேக விடவும். இடையில் அவ்வபோது கிளறி விடவும். ஏலப்பொடியை சேர்க்கவும்.

வாணலியில் ஒரு மேசைக்கரண்டி நெய் ஊற்றி அதில் முந்திரி, திராட்சை, தேங்காய்த் துருவல் போட்டு 3 நிமிடம் வதக்கவும்.

வதக்கியவற்றை களியுடன் சேர்த்து கிளறவும். மீதம் இருக்கும் நெய்யை ஊற்றி நன்கு கிளறி விட்டு 5 நிமிடம் கழித்து இறக்கி விடவும். மாவை தண்ணீரில் போட்ட பிறகு அடுப்பை மிதமான தீயில் வைத்து செய்யவும். கிளறும் போது களி சற்று கெட்டியாக இருந்தால், முன்பு எடுத்து வைத்த தண்ணீரை ஊற்றி கிளறிக் கொள்ளவும்.

திருவாதிரை களி ரெடி. இதனை குக்கரில் வைத்தும் செய்யலாம். வெல்லபாகை ஊற்றி நன்கு கிளறிய பிறகு குக்கரை மூடி 2 நிமிடம் கழித்து வெய்ட் போட்டு, 2 விசில் வந்ததும் இறக்கவும். பிறகு வறுத்த முந்திரி, திராட்சை சேர்க்கவும்

ஆகா இப்பவே சாப்பிடணும் போல் உள்ளது.

நல்ல பதிவு நன்றி...

ஆஹா மிகவும் ருசி .
நன்றி சிவா விஜய்.
இந்து பகுதியில் இருந்து
சமையல் குறிப்புகள் பகுதிக்கு மாற்றப்படுகிறது .

ரமணியன்

சிவ சிவ ....

அடியேனையும் அங்கிஹாரம் செய்தமைக்கு நிர்வாக குழுவினருக்கு என் தாழ்மையான வணக்கங்கள் ....

சிவா விஜய்

ஈகரை சாதி ,சமயம் வேறுபாடின்றி எல்லோரையும் வரவேற்கும் தமிழ் களஞ்சியம் .
ஈகரையில் சேர்ந்து சகோதர சகோதரிகள் என உறவுகள் அடைந்தவர்கள் அநேகர் .
வம்பு செய்பவர்கள் என அறியப்பட்டால்தான் நீக்கப்படுகிறார்கள்.
வாழ்த்துகள் சிவா விஜய்.
(தேர்ச்சிபெற்ற இசை கலைஞர் விஜய் சிவா வோ என முதலில் நினைத்தேன் )

ரமணியன்

ஆதிரைக் களி , படமே அருமையாக உள்ளது . தோசைபோல செய்துள்ளீர்கள் ! நன்று !

அருமை, நெய் கொஞ்சம் கூடுதலாக சேர்த்தால் சுவைக்கு குறைவே இருக்காது