சர்க்கரை நோயைக் கட்டுப்படுத்தும் பாரம்பரிய நெல்!

-


கைவிரல் சம்பா, கருடன் சம்பா, இலுப்பைப்பூ சம்பா, கவுனி, பூங்கார் -
இவையெல்லாம் என்ன என்று கேட்கிறீர்களா?
இவை நம் பாரம்பரிய நெல் வகைகள். இந்த பாரம்பரிய நெல்
வகைகளைப் பாதுகாத்து, அவற்றின் விதைகளை பிற விவசாயிகளுக்கும்
வழங்கி வருகிறார் "நெல்' ஜெயராமன்.
-
இதற்காக அவருக்கு குடியரசுத் தலைவர் பிராணப் முகர்ஜி
"பாரம்பரிய நெல் சாகுபடியில் மேம்படுத்தப்பட்ட தொழில்நுட்பத்திற்கான
தேசிய அடிமட்ட கண்டுபிடிப்பிடிப்பு விருது -2015'- வழங்கினார்.
அதுமட்டுமல்ல, "பாரம்பரிய அறிவு மற்றும் உயிர் பன்மயம் பாதுகாப்புக்கான
காந்திய இளம் தொழில்நுட்ப கண்டுபிடிப்பு விருது (2015)' இவருக்குக்
கிடைத்திருக்கிறது.
-
அந்நிய மரபணு மாற்று விதைகளுக்கு மாற்றாக, வெள்ளம், வறட்சி
என மாறுபட்ட காலநிலைகளைத் தாங்கக்கூடிய நம் பாரம்பரிய நெல்
விதைகளை விவசாயிகளுக்கு வழங்கி வருகிறார் அவர். அதற்காகவே
ஜெயராமனுக்கு இந்த உயரிய விருது வழங்கப்பட்டிருக்கிறது.
-
திருவாரூர் மாவட்டம் திருத்துறைப்பூண்டியின் ஆதிரெங்கத்தில்
விவசாயப் பண்ணை ஒன்றை அவர் நடத்தி வருகிறார்.

-
அவரிடம் பேசியதிலிருந்து...
-
"விவசாயிகளின் பிரச்னைகளுக்காக நுகர்வோர் நீதிமன்றங்களில் நானே
வாதாடுவேன். அப்போதுதான் செயற்கை விவசாயத்தின் காரணமாக
மக்கள்படுகின்ற துன்பங்களையும் அதன் காரணமாக இயற்கை
விவசாயத்தின் அவசியத்தையும் புரிந்துகொண்டேன்.

இயற்கை விவசாயத்தை வலியுறுத்தி பிரச்சாரங்கள் செய்து கொண்டிருந்த
சூழலில் 2001 ஆம் ஆண்டு நம்மாழ்வாரின் தொடர்பு ஏற்பட்டது. அவருடன்
இணைந்து செயலாற்றத் தொடங்கினேன்.

அப்போதுதான் எனக்குப் பாரம்பரிய விவசாயத்தின் நுணுக்கங்கள் தெரிய
வந்தன.

தேடுதலில் பாரம்பரிய நெல் ரகங்கள் கிடைத்தாலும், அதனைப் பயிரிட்டுப்
பெருக்குவது சிரமமான பணியாக இருந்தது. ஆனால் எனக்கு படிப்படியாக
50 ரகங்கள் கிடைத்தன. அவற்றைப் பயிரிடும் அளவுக்கு என்னிடம் நிலம்
இல்லை. எனவே ஊர்க்காரர்களின் நிலத்தைப் பயன்படுத்தி, பாரம்பரிய
நெல் ரகங்களைப் பயிரிட்டேன்.

இதற்கான மார்க்கெட் தேவை.
அதேசமயம் விவசாயிகளுக்கு இவ்வகை நெல்லை விளைவிக்க விழிப்புணர்ச்சி
தேவை. எனவே 2006 -ஆம் ஆண்டு முதல் பாரம்பரிய நெல் திருவிழாவை
நடத்தி வருகிறேன். கலந்து கொள்ளும் விவசாயிகளுக்கு தலா 2 கிலோ
பாரம்பரிய நெல் விதைகளை வழங்குகிறோம்.

அவர்கள் அதனை விளைவித்து, அடுத்த ஆண்டு திருவிழாவில் 4 கிலோவாக
திருப்பித் தர வேண்டும். இதுவரை 14 ஆயிரம் விவசாயிகளுக்கு மேல்
எங்களிடமிருந்து விதை வாங்கிச் சென்று பாரம்பரிய நெல் வகைகளை
விளைவித்து வருகின்றனர்.

இதுவரை தேடிச் சேகரித்ததில் 87 வகை பாரம்பரிய நெல் வகைகள்
கிடைத்துள்ளன. இன்னும் 100க்கும் மேற்பட்ட பாரம்பரிய நெல் வகைகள்
தமிழத்தில் உள்ளன.

வறட்சி, வெள்ளம், புயல், பனி என எத்தகைய இயற்கைச் சூழல்களையும்
தாங்கக்கூடிய அற்புதமான நெல் வகைகள் நம்மிடம் உள்ளன. கார் என்ற
ஒரு நெல் வகை உண்டு. இது முழுக்க முழுக்க தண்ணீருக்குள்ளேயே நடவு
செய்யப்பட்டு தண்ணீரிலேயே வளரும்.

வயலில் தண்ணீர் இருக்கும்போதே அறுவடையும் செய்யலாம்.
வயலென்றில்லாமல், மீன்குட்டைகளில் ஊடு பயிராகவும் வளர்க்கலாம்;
அழுகிப் போகாது.

காட்டுயாணம், கவுனி வகைகள், மாப்பிள்ளை சம்பா போன்ற வகை
நெல்கள் சர்க்கரை நோயைக் கட்டுப்படுத்துகிறது.
அதைப்போலவே சளித்தொல்லை தொடங்கி, புற்றுநோய் வரை அனைத்து
நோய்களுக்கும் பாரம்பரிய நெல் வகைகள் அருமருந்தாக அமையும்.
கைவிரல் சம்பா, கருடன் சம்பா, இலுப்பைப்பூ சம்பா, கவுனி, பூங்கார்
போன்ற நெல் வகைகள் கடும் வறட்சியைத் தாங்கக் கூடியவை.

60 நாட்களில் வளரும் அறுபதாம் குறுவை தொடங்கி, 190 நாட்களில்
வளரும் ஒட்டடையான் ரகம் வரையில் பாரம்பரிய நெல் வகைகளில் பல
ரகங்கள் உள்ளன.

பாரம்பரிய நெல் வகைகளைப் பொருத்தவரை அதிகம் விளைச்சல்
கிடைக்காது என்கிற கருத்து திட்டமிட்டே பரப்பப்படுகின்றது.
அது பொய். பாரம்பரிய நெல் வகைகளின் மூலமாக 40 முதல் 50 மூட்டைகள்
வரை ஏக்கருக்கு அறுவடை செய்ய முடியும்.

அதுமட்டுமல்ல, செயற்கை விவசாயம் மூலம் ஒரு ஏக்கர் விவசாயம் செய்ய
18,000 ரூபாய் செலவாகிறது. ஆனால், இயற்கை முறையில் பாரம்பரிய
நெல் சாகுபடி செய்வதற்கு 8,000 ரூபாயே போதுமானது'' என்கிறார்
ஜெயராமன்.
-
-------------------
By - மன்முருகன்
தினமணி

மிகவும் நல்ல பதிவு அய்யா . நன்றி.